មានអ្នកប្រាប់Sabay នូវល្បិចពីក្រោយរបរលក់សាំងដប

2015-06-26 17:44:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ការលក់សាំងច្រកដប សាំងធុង និងហ្គារ៉ាស នៅតែមានការលេចឮថា អាជីវករបន្តកេងចំណេញលើរង្វាស់រង្វាល់ពីអតិថិជន។

លោកសុធា ម្នាក់ក្នុងចំណោមអ្នកត្អូញត្អែរជាច្រើននោះ បានអះអាងថាដឹងច្បាស់រឿងនេះ។ លោកប្រាប់ព្រឹកមិញនេះថា៖ "ហ្នឹងជារឿងពិត បើមិនធ្វើអ៊ីចឹង លក់អត់ចំណេញ"។

A) សាំងដប - ចំពោះសាំងដប អ្នកលក់ខ្លះប្រើល្បិចក្រឡុកកាវ ដើម្បីឱ្យសាច់ដបខាងក្នុងក្រាស់។ - ដបមានចំណុះ កន្លះលីត្រ ១លីត្រ និង២លីត្រ តែអ្នកលក់ចាក់សាំងបញ្ចូលដបមិនគ្រប់ចំណុះ។

តាមវិធីនេះក្រុមអាជីវករខិលខូច អាចចំណេញបាន៣ទៅ៤លីត្រក្នុងមួយកាន។

B) សាំងធុង

ចំពោះសាំងធុងនេះវិញ អ្នកលក់ក៏មានវិធីស៊ីដែរ គឺឱ្យជាងធ្វើកែវខុសខ្នាត ដែលមានចំនួនក្រិតកៀកគ្នាបំផុត។ ក្នុង១លីត្រ អ្នកលក់ទុច្ចរិតអាចស៊ីបាន២០% ខណៈមួយកាន ពួកគេអាចស៊ីបានដល់ទៅ៦លីត្រ។

C) ប្រេងឥន្ធនៈតាមស្ថានីយ

ចំណែក សុផល ធ្លាប់មានបទពិសោធន៍ ត្រូវគេកេងចំណេញ បានប្រាប់ឱ្យ Sabay ថា បុគ្គលិកស្ថានីយខ្លះចាក់ប្រេងសាំង មិនគ្រប់លីត្រទេ។ លោកថា "ខ្ញុំចាក់សាំងដប មើលទៅឃើញច្រើន តែបើចាក់ហ្គារ៉ាស់វិញ តិចមែនទែន។ បុគ្គលិកខ្លះខូចណាស់ បើយើងអត់មើល បន្លំយើងហើយ ឬបើមិនដូច្នេះទេ អាចឧបករណ៍វ៉ាល់វាស់មិនត្រូវចំនួនលីត្រ"។ ចង់ដឹងច្បាស់សូមចុចអាន ជម្រះមន្ទិលរឿងសាំងមិនគ្រប់លីត្រតាមស្ថានីយ...

D) ប្រុងប្រយ័ត្នចំពោះប្រេងសាំងលក់រាយរងតាមផ្លូវ

សាំងលក់រាយរងតាមផ្ទះ តាមផ្លូវ ជាពិសេសសាំងដប និងសាំងធុង គ្មានសុវត្ថិភាពចំពោះសុខភាពម៉ូតូប៉ុន្មានទេ ព្រោះប្រេងប្រភេទនេះ តែងត្រូវបានគេលាយបង្កើនបរិមាណ និងលក់បញ្ចុះតម្លៃ។

លោកសុធាបានបង្ហើបឱ្យដឹងទៀតថា ប្រេងសាំង១កាន អាជីវករខិលខូច យកទៅលាយជាមួយប្រេងកាត ៥លីត្រទៅ១០លីត្រ ឬលាយនឹងអ្វីផ្សេង។

"ចង់ចំណេញច្រើន គេលាយប្រេងកាត១០លីត្រ តែបើចង់ចំណេញតិច គេលាយប្រេងកាត៥លីត្រ។ ម៉ូតូចាស់ៗចាក់ទៅមិនសូវអីទេ តែបើម៉ូតូថ្មីចាក់ទៅហ្នឹងថាសាំង លាយតែម្ដង"។ មួយទៀតគេលាយដើម្បីលក់បញ្ចុះតម្លៃ។ យកពីគេ១កាន ១២ម៉ឺនរៀល យកមកលាយរួច លក់វិញ១០ម៉ឺនរៀល"។ សុធាបញ្ជាក់។

ដោយឡែកកាលពីចុងខែមករា ឆ្នាំ២០១៥ មន្ត្រីជំនាញអគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានចុះត្រួតពិនិត្យតាមស្ថានីយប្រេងឥន្ធនៈ ក្រោយមានមន្ទិលសង្ស័យពីអតិថិជនថា មានការស៊ីចំនួនលីត្រ និងប្រេងគុណភាពអន់ ហើយជាលទ្ធផលបង្ហាញថា ត្រឹមត្រូវទាំង បរិមាណ និងគុណភាព៕