កុមារា ទួន ឆានឈុន ភ័យខ្លួនពេលពេញកំលោះ

2015-06-29 15:53:59
ចំនួនមតិ 0 | ចំនួនចែករំលែក 0

ចន្លោះមិនឃើញ

កុមារា ទួន ឆានឈុន អតីតបេក្ខជនផ្កាយរះក្នុងសួនលេខ៣ បានប្រាប់ថា រូបគេកំពុងតែមានការព្រួយបារម្ភខ្លះៗចំពោះសំឡេង ខ្លាចបែកសំឡេងពេលពេញកំលោះ។

"មានការបារម្ភខ្លះដែរបងណាមួយឥឡូវខ្ញុំនៅក្មេងសំឡេងនៅមានគេទទួលស្គាល់ប៉ុន្តែមិនប្រាកដថាពេលធំពេញកំលោះទៅសំឡេងខ្ញុំមិនដឹងទៅជាយ៉ាងណា"។ ឆានឈុន ថ្លែង។ ទោះជាយ៉ាងណា ឆានឈុន បានបង្ហាញពីគោលជំហរដោយមិនមានការភ័យខ្លាចខ្លាំងនោះទេ ព្រោះនៅមានការសិក្សាដែលជាប្រទីបចម្លងកុមារារូបនេះដោយមិនមែនចាំតែពឹងលើការច្រៀងមួយមុខនោះទេ។

តារាចម្រៀងមាឌតូចសម្លេងផ្អែម រូបនេះពោលបន្ថែម៖ "ពិបាកដែរ ស្តាយគឺស្តាយហើយបងប៉ុន្តែបើសិនជាសម្លេងខ្ញុំបែកមែន ហើយគ្មានអ្នកគាំទ្រទេខ្ញុំនឹងឈប់ដោយខ្លួនឯងហើយបន្តការសិក្សារបស់ខ្ញុំឲ្យបានចប់ចុងចប់ដើម"។

ឆានឈុន និងមិត្តភ័ក្ដិប្រឡងក្នុងកម្មវិធីផ្កាយរះក្នុងសួន លីដា វីរៈបុត្រ និងជ័យ សុវ៉ាត

កុមារាម្នាក់នេះ និយាយដាច់ខាតថា ការសិក្សាគឺសំខាន់ណាស់ក្នុងនោះរូបគេមិនអាចចោលបានទេបើទោះជាការងារសិល្បៈនៅតែបន្តក៏ដោយ។

ទួន ឆានឈុន វ័យ ១៤ឆ្នាំ មានស្រុកកំណើតនៅខេត្តតាកែវ។ រូបគេជាកូនពៅក្នុងចំណោមបងប្អូនចំនួន៤រូបគេ។ ទួន ឆានឈុន ជាបេក្ខជនជាប់ចំណាត់ថ្នាក់លេខ៣នៅក្នុងកម្មវិធី"ផ្កាយរះក្នុងសួន"របស់ទូរទស្សន៍អប្សរាកាលពីឆ្នាំ២០១៣។ បច្ចុប្បន្ន ឆានឈុន ជាប់មមាញឹកទាំងការសិក្សា និងសិល្បៈ៕

អត្ថបទ៖ ថា ម៉ាលីដា