ព័ត៌មានចុងក្រោយ! ធ្លាក់យន្តហោះឥណ្ឌូណេស៊ី អ្នកស្លាប់បន្តកើនឡើងច្រើនទៀត

2015-07-01 16:48:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានចុងក្រោយ ដែលទើបចេញផ្សាយលើសារព័ត៌មាន BBC បានបញ្ជាក់ថា មនុស្សទាំង ១២២នាក់លើយន្តហោះ Hercules C-130 របស់ប្រទេសឥណ្ឌូណេស៊ី រួមទាំងអ្នកនៅលើដីមួយចំនួនទៀត អាចបាត់បង់ជីវិតទាំងអស់កើនឡើងដល់ ១៤១នាក់។

មន្ត្រីរបស់ប្រទេសឥណ្ឌូណេស៊ី បានបញ្ជាក់ឲ្យដឹងនៅថ្ងៃពុធនេះថា មានមនុស្សសរុបទាំងអស់ ១២២នាក់នៅលើយន្តហោះដែលជួបគ្រោះថ្នាក់ក្នុងក្រុង Medan។ ក្នុងចំណោមនោះ មានអ្នកដំណើរ ១១០នាក់ និងក្រុមការងារលើយន្តហោះ ១២នាក់។ ចំណែកអ្នកស្លាប់មួយចំនូនធំទៀត គឺជាប្រជាជននៅតំបន់កើតហេតុផ្ទាល់។

បន្ទាប់ពីធ្លាក់ចំលំនៅឋានពីរខ្នង និងសណ្ឋាគារមួយ យន្តហោះយោធាធុនធំនោះបានផ្ទុះឆេះចេញជាអណ្ដាតភ្លើង។ របាយការណ៍ភ្លាមៗកាលពីវេលាថ្ងៃត្រង់ម្សិលមិញបានចេញផ្សាយថា មនុស្សយ៉ាងតិច ៣០នាក់បាត់បង់ជីវិត។ ទោះយ៉ាងណា ព័ត៌មានចុងក្រោយបានបញ្ជាក់ថា មនុស្សទាំង ១២២នាក់ អាចស្លាប់ទាំងអស់ បូករួមជាមួយអ្នករស់នៅទីនោះជាច្រើនទៀត។

ប្រតិបត្តិការទាញយកសាកសពចេញពីយន្តហោះ បានផ្អាកបណ្ដោះអាសន្ននាពេលយប់ជ្រៅ និងបន្តឡើងវិញនៅពេលព្រឹកនេះ។ មនុស្សដែលស្លាប់ភាគច្រើន ត្រូវគេជឿជាក់ថាជាសាច់ញាតិនៃក្រុមការងារលើយន្តហោះផ្ទាល់។ គេនៅមិនទាន់ទទួលបានព័ត៌មានច្បាស់ថា មានមនុស្សផ្សេងក្រៅពីអ្នកដំណើរលើយន្តហោះ បានស្លាប់នៅតំបន់កើតហេតុឬយ៉ាងណានោះទេ។

អ្វីដែលគួរឲ្យចាប់អារម្មណ៍នាពេលនេះ គឺយន្តហោះដែលធ្លាក់នោះ ជាប្រភេទយន្តហោះដឹកទំនិញយោធា ប៉ុន្តែបែរជាមានដឹកអ្នកដំណើរយ៉ាងច្រើន។ អ្នករាយការណ៍របស់សារព័ត៌មានBBC ក្នុងក្រុងហ្សាកាតា អ្នកស្រី Alice Budisatrijo បាននិយាយថា កងកម្លាំងយោធាកំពុងស៊ើបអង្កេតរកការពិត ថាតើអ្នកជិះលើយន្តហោះ ជាអ្នកដំណើរបង់ប្រាក់ដែលត្រូវហាមឃាត់ ឬយ៉ាងណា។