ក្រោយ​ទទួល​បាន​ជោគជ័យ​ជា​បន្តបន្ទាប់​នៅ​ក្នុង​ស្រុក កំពូល​តារា​សម្ដែង​ចិន Fan Bingbing ​កំពុង​​មាន​​ទីផ្សារ​កាន់​តែ​​​ច្រើនជាមួយ​ផលិតកម្ម​បរទេស ដោយ​ថ្មី​ៗ​នេះ នាង​​បាន​​ចូល​សម្ដែង​ក្នុង​ខ្សែ​ភាពយន្ត​ជា​ច្រើន​មាន​ទាំង​អាមេរិក បារាំង កូរ៉េ​ និង​ជប៉ុន។

តារា​សម្ដែង​វ័យ ៣៤ឆ្នាំ​រូប​នេះ​ នឹង​លេច​មុខ​ក្នុង​ខ្សែ​ភាពយន្ត​អន្តរជាតិ​​ថ្មី​ៗ​បន្តបន្ទាប់ ដូច​ជា "The Moon and The Sun(អាមេរិក)”, “The Lady in the Portrait (ចិន-បារាំង)” និង "Lady of The Dynasty (សហការ​ផលិត​ដោយ​ចិន បារាំង និង​ជប៉ុន)”។

នៅ​ក្នុង​ខ្សែ​ភាពយន្ត​បែប​ព្រេង​និទាន​របស់​អាមេរិក "The Moon and The Sun” តារា​ចំណូល​ខ្ពស់​បំផុត​នៅ​ចិន​រូប​នេះ នឹង​សម្ដែង​ជា​តួ​នាង​មច្ឆា ដែល​ត្រូវ​ស្ដេច​បារាំង Louis XIV ចាប់​បាន។ Fan Bingbing បាន​និយាយ​នៅ​ពេល​ចូលរួម​ក្នុង​កម្មវិធី​មួយ​នា​ពេល​ថ្មី​ៗ​នេះ​ថា "ខ្ញុំ​បាន​ចូល​សម្ដែង​រឿង​នេះ គឺ​ដោយ​សារ​ខាង​ផលិតករ​គាត់​មើល​ឃើញ​ថា​ មុខ​ខ្ញុំ​សម​ដើរ​តួ​ជា​នាង​មច្ឆា​បំផុត"។

ដោយ​ឡែក​ខ្សែ​ភាពយន្ត "The Lady in the Portrait” បរិយាយ​ពី​ជម្លោះ​​កើត​ឡើង​ក្នុង​អំឡុង​រាជវង្ស​ឈីង (ឆ្នាំ​១៦៤៤ ដល់ ១៩១១) ដែល​រៀបរាប់​ដោយ​វិចិត្រករ​បារាំង​ម្នាក់។ Fan Bingbing សម្ដែង​ជា​តួ​ម្ចាស់​ក្សត្រិយ៍​ចិន​មួយ​អង្គ​​ដែល​មាន​មុខ​លើ​ផ្ទាំង​គំនូរ​របស់​វិចិត្រករ​ម្នាក់​នោះ។​​​​

ចំពោះ​ខ្សែ​ភាពយន្ត "Lady of the Dynasty” Fan Bingbing នឹង​សម្ដែង​ជា​គូ​ស្នេហ៍​របស់​អធិរាជ​ចិន Xuanzong ក្នុង​សម័យ​រាជវង្ស​ថាង។ ភាពយន្ត​បែប​ប្រវត្តិសាស្រ្ត​ដែល​នឹង​ចេញ​បញ្ចាំង​នៅ​ថ្ងៃ​ទី​៣០ ខែ​កក្កដា ខាង​មុខ​នេះ ក៏​មាន​ការ​ចូលរួម​សម្ដែង​ពី​តារា​ល្បី​ហុងកុង Leon Lai Ming ដែរ។

ក្រៅ​ពី​ភាពយន្ត​ទាំង ៣​ខាង​លើ​នេះ តួ​ឯក​ស្រី​រឿង​ "The Empress of China” ត្រូវ​បាន​ទាក់ទង​ឲ្យ​​សម្ដែង​តួ​ឯក​ក្នុង​ខ្សែ​ភាពយន្ត​ចិន – អាមេរិក "The Sorjouner” ប៉ុន្តែ​តារា​រូប​នេះ​មិន​ទាន់​សម្រេច​ចិត្ត​​ថា​នឹង​ចូល​សម្ដែង​ ឬ​ក៏​អត់ នៅ​ឡើយ​ទេ ៕

ចុចអាន៖Fan Bingbing ​បង្ហោះ​រូបភាព​ជាមួយ​មិត្ត​ប្រុស ប្រាប់ពី​ចំណង​ស្នេហា​​ដល់​អ្នក​គាំទ្រ

ចុចអាន៖សំលៀក​បំពាក់ Brand ​ស្អាត​ៗ ស៊ីវិល័យ របស់​តារា​សាច់​ខ្ចី Fan Bingbing

ប្រែ​សម្រួល៖ វ៉ាន់ថន ប្រភព៖ china