ចង្កឹះខ្មែរ ស្នាដៃខ្មែរ គ្មានជាតិគីមី ១០០%

2015-07-02 13:09:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនខ្មែរជាច្រើនគ្រួសារ រស់នៅខេត្តស្ទឹងត្រែង និងក្រចេះ បានផលិតចង្កឹះធម្មជាតិចេញពីដើម "ទ្រាំង" គ្មានជាតិគីមី ១០០%។

បើតាមជំនឿគេយកមែកដើមទ្រាំងទៅដាក់ក្នុងផ្ទះ ដើម្បីការពារខ្មោចព្រាយ តែយ៉ាងណាដើមនេះក៏អាចយកមកធ្វើចង្កឹះ មានគុណភាពផងដែរ។

លោក សិត គឹមសុង អតីតអ្នកសម្របសម្រួលគម្រោង របស់អង្គការ PYD អេស្ប៉ាញប្រចាំនៅកម្ពុជា ប្រាប់ Sabay ថា ចង្កឹះដើមទ្រាំងផលិតដោយដៃខ្មែរផ្ទាល់ មិនប្រើម៉ាស៊ីន មិនលាបថ្នាំ ឬ ដាក់ថ្នាំការពារមេស៊ីទេ គឺធម្មជាតិ ១០០% ។

អតីតអ្នកសម្របសម្រួលរបស់ PYD រូបនេះថ្លែងថា អង្គការបង្កើតគម្រោងផលិតចង្កឹះដើមទ្រាំងនេះឡើង ក្នុងគោលបំណងជួយរកការងារដល់ប្រជាជនខ្មែរ រកចំណូលផ្គត់ផ្គង់ជីវភាពគ្រួសារ និង កាត់បន្ថយការប្រើប្រាស់ចង្កឹះមានសារធាតុគីមី។

"អង្គការបើកវគ្គបណ្ដុះបណ្ដាលនៅចុងឆ្នាំ ២០១២ ដើម្បីជួយបង្កើតមុខរបរដល់ពួកគាត់។ ចង្កឹះហ្នឹងមានគុណភាពល្អ កាន់តែប្រើកាន់តែខ្មៅរលោង" លោក គឹមសុង បញ្ជាក់។ ឱ្យកាន់តែច្បាស់នោះ លោក ចាប សុបញ្ញា ប្រធានផ្នែកអភិវឌ្ឍន៍សេដ្ឋកិច្ច និងសង្គមរបស់អង្គការ PYD ថ្លែងថា ផលិតកម្មចង្កឹះទ្រាំងចាប់ផ្ដួចផ្ដើមឱ្យដំណើរការដោយ លោកស្រី សន សុខា ប្រធានមន្ទីរកិច្ចការនារីខេត្តស្ទឹងត្រែង ក្រោមកិច្ចសហការ និងគាំទ្រទាំងបច្ចេកទេស និងហិរញ្ញវត្ថុពី អង្គការសន្តិភាព និងអភិវឌ្ឍន៍ PYD ក្នុងក្របខ័ណ្ឌគម្រោងមជ្ឈមណ្ឌលអភិវឌ្ឍស្ត្រី។

លោកបន្តថា សហគមន៍ភូមិមន ឃុំអន្លង់ជ្រៃ ស្រុកថាទ្បាបរិវាត់ បានបង្កើតជាក្រុមផលិតចង្កឹះពីដើមទ្រាំងមុនគេ ដោយប្រើប្រាស់ជំនាញពីដូនតា ហើយត្រូវបានកែសម្រួលគុណភាព ដោយក្រុមការងារមជ្ឈមណ្ឌលអភិវឌ្ឍស្ត្រីខេត្តស្ទឹងត្រែង និង លោក ម៉ី បាំង អតីតបុគ្គលិកអង្គការសន្តិភាព និងអភិវឌ្ឍន៍ របស់ប្រទេសអេស្ប៉ាញ នាចុងឆ្នាំ ២០១២ និងដើមឆ្នាំ ២០១៣។

"ដោយស្នាដៃផលិតនេះមានគុណភាពល្អ និងគួរឱ្យចាប់អារម្មណ៍ អង្គការសន្តិភាព និងអភិវឌ្ឍន៍ បានសម្រេចចិត្តរួមគ្នាជាមួយមន្ទីរកិច្ចការនារីខេត្តស្ទឹងត្រែង ក្នុងការបង្រៀនបន្តមកក្រុមផលិតនៅខេត្តក្រចេះ"។ លោក សុបញ្ញា បញ្ជាក់។

យ៉ាងណាមិញលោកឱ្យដឹងថា គ្រូបច្ចេកទេសក្នុងការបង្រៀនផលិតកម្មនេះ គឺជាគ្រូបង្គោលមកពីសហគមន៍ភូមិមន ខេត្តស្ទឹងត្រែង ដោយមិនមានបុគ្គលិកអង្គការជាអ្នកបង្រៀនឡើយ។

ចង្កឹះមួយបាច់មាន ១០ គូ ស្មើនឹង ៧០០០ រៀល ហើយបើអតិថិជនកុម្ម៉ង់ នឹងមានសេវាដឹកជញ្ជូនដល់ផ្ទះ ទាំងក្នុងនិងក្រៅទីក្រុងភ្នំពេញ ដោយមិនគិតពីចំនួនបាច់ឡើយ។

ប្រិយមិត្តអាចបញ្ជាទិញចង្កឹះនេះបានតាមរយៈ មន្ត្រីមជ្ឈមណ្ឌលស្ត្រីខេត្ត និងតំណាងអង្គការសន្តិភាព និងអភិវឌ្ឍនៅភ្នំពេញ តាមលេខទូរសព្ទ៖ ០១២ ៦៣០ ៦០២ / ០១៧ ២៦៧ ៧៦២ / ០៩២ ២២២ ៧១១៕