តារា​ចម្រៀង​ចង្វាក់ Country អាមេរិក Taylor Swift ទើប​តែ​​ជាប់​ឈ្មោះ​​ទទួល​បាន​ពាន​រង្វាន់​ជា​ស្ត្រី​ឆ្នើម​ប្រចាំ​ឆ្នាំ​២០១៤ (Woman of the Year) ដោយ​ទស្សនាវដ្ដី​ Billboard ​​ដែល​នេះ​ជា​ពាន​រង្វាន់​សម្រាប់​សិល្ប​ការិនី​ដែល​ "ទទួល​បាន​ជោគជ័យ​គួរ​ឲ្យ​កោតសរសើរ​ក្នុង​វិស័យ​ចម្រៀង រួម​ជាមួយ​ភាព​ជា​អ្នក​ដឹកនាំ និង​គំនិត​ច្នៃ​ប្រឌិត ក្នុង​រយៈ​ពេល ១២​ខែ​ចុង​ក្រោយ​នេះ"។

លោក Janice Min ​ជា​នាយក​គ្រប់គ្រង​ម្នាក់​ក្រុមហ៊ុន​កម្សាន្ត Guggenheim Media បាន​និយាយ​ថា "ក្នុង​នាម​ជា​តារា​ចម្រៀង​ដែល​មាន​ឥទ្ធិពល​បំផុត​ក្នុង​ជំនាន់​របស់​នាង Taylor Swift ទទួល​បាន​ជោគជ័យ​ដ៏​ច្រើន​លើសលប់​លើ​តារាង Billboard។ តាំង​ពី​ប្រឡូក​ក្នុង​អាជីព​ចម្រៀង​ពី​ឆ្នាំ​២០០៦​មក នាង​ធ្លាប់​បាន​ជាប់​ចំណាត់​ថ្នាក់​កំពូល​លើ​តារាង Billboard Hot 100 ចំនួន ៦០​លើក ដែល​ជា​ចំនួន​ច្រើន​បំផុត​ប្រៀបធៀប​នឹង​តារា​ចម្រៀង​ស្រី​ដទៃ។ ពួក​យើង​ពិត​ជា​រំភើប​ខ្លាំង​ណាស់​ ក្នុង​ការ​ប្រកាស​ឈ្មោះ​នាង ជា​ស្ត្រី​ឆ្នើម​ប្រចាំ​ឆ្នាំ​របស់ Billoard ជា​លើក​ទី​ពីរ"។​​

ជា​ការ​ពិត នេះ​មិន​មែន​លើក​ទី​មួយ​ឡើយ ដែល Taylor Swift ទទួល​បាន​ពាន​រង្វាន់​នេះ ហើយ​នាង​គឺ​ជា​តារា​ស្រី​ទី​មួយ​ដែល​អាច​ទទួល​បាន​ពាន​រង្វាន់​នេះ​ពីរ​ដង។

ទស្សនាវដ្ដី Billboard នឹង​ប្រគល់​ពាន​រង្វាន់​នេះ​ដល់ Taylor Swift ក្នុង​ព្រឹត្តិការណ៍​ប្រចាំ​ឆ្នាំ Women in Music លើក​ទី​៩ នៅ​ថ្ងៃ​ទី​១២ ខែ​ធ្នូ នៅ​មជ្ឈមណ្ឌល Cipriani Wall Street ទីក្រុង​ញីវយ៉ក។

Taylor Swift មិន​ត្រឹម​តែ​ជា​តារា​ចម្រៀង​ដែល​ទទួល​បាន​ពាន​រង្វាន់ Grammy ចំនួន​៧ និង​ជា​តារា​ចម្រៀង​ស្រី​វ័យ​ក្មេង​បំផុត​ក្នុង​ប្រវត្តិសាស្ត្រ​ដែល​អាច​ទទួល​បាន​ពាន​រង្វាន់ "Album of the Year” ពី​កម្មវិធី Grammy នោះ​ទេ ប៉ុន្តែ​តារា​វ័យ ២៤​ឆ្នាំ​រូប​នេះ ​ក៏​ជា​តារា​ចម្រៀង​ដែល​មាន​អាល់ប៊ុម​លក់​ដាច់​ជាង​គេ​ក្នុង​ប្រវត្តិសាស្ត្រ​ដែរ ហើយ​នាង​គឺ​ជា​តារា​ចម្រៀង​ស្រី​តែ​ម្នាក់​គត់ ដែល​មាន​អាល់ប៊ុម​លក់​ដាច់​ ១លាន​បន្ទះ​ ក្នុង​រយៈ​ពេល ១​សប្ដាហ៍​ដំបូង ដល់​ទៅ​ពីរ​អាល់ប៊ុម (អាល់ប៊ុម "Speak Now” ឆ្នាំ​២០១០ និង​អាល់ប៊ុម "RED” ឆ្នាំ​២០១២ ៕

 អានអត្ថបទ៖ Angelina Jolie ទទួល​គោរមងារ​ស្ត្រី​កិត្តិយស​ពី​ម្ចាស់​ក្សត្រីយ៍ Elizabeth II

ប្រែ​សម្រួល៖ វ៉ាន់ថន ប្រភព៖ eonline