សហគមន៍អាណិកជនខ្មែរនៅប្រទេសល្បីៗជួយបង្ហាញវប្បធម៌ខ្មែរនៅបរទេស

2014-10-13 18:12:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនភៀសខ្លួនខ្មែរជាច្រើនបានធ្វើដំណើរទៅរស់នៅសហរដ្ឋអាមេរិក បារាំង កាណាដា និងអូស្ត្រាលី ភាគច្រើនអំឡុងទសវត្ស១៩៨០។ បច្ចុប្បន្ននេះ ទីក្រុង ឬកន្លែង ដែលជនភៀសខ្លួនខ្មែរតាំងទីលំនៅ បានក្លាយជាសហគមន៍ដ៏ធំ រហូតមានការទទួលស្គាល់ទៀតផង។

សហគមន៍ខ្មែរនៅអាមេរិក

ក្នុងឆ្នាំ១៩៧៩ ប្រជាជនខ្មែរចាប់ផ្ដើមធ្វើដំណើរទៅកាន់សហរដ្ឋអាមេរិកក្នុងនាមជាជនភៀសខ្លួន។ រដ្ឋាភិបាលអាមេរិកអនុញ្ញាតឲ្យជនភៀសខ្លួនខ្មែរ១៥០ ០០០នាក់ ទៅតាំងទីលំនៅក្នុងក្រុង ឬរដ្ឋផ្សេងៗ។ តាមការធ្វើជំរឿនក្នុងឆ្នាំ២០១០ មានប្រជាជនខ្មែរទាំងកើតនៅអាមេរិក និងធ្វើអន្តោប្រវេសន៍មកអាមេរិក ប្រមាណជា២៧៦ ៦៦៧ ឬ០,០៩%នៃប្រជាជនអាមេរិកទាំងអស់ កំពុងរស់នៅលើទឹកដីនេះ។ សហគមន៍សំខាន់ៗដែលប្រជាជនខ្មែររស់នៅមានដូចជារដ្ឋ California (ក្រុង Long Beach, Stockton, Fresno, Oakland, Modesto), រដ្ឋ Massachusetts (ក្រុង Lowell), រដ្ឋMinnesota (Twin Cities), រដ្ឋPennsylvania (ក្រុង Philadelphia), រដ្ឋRhode Island (ក្រុង Providence) និងរដ្ឋ Washington (ក្រុង King County)។

ប្រជាជនខ្មែរនៅទីនោះក៏បង្កើតទីក្រុងរបស់ខ្លួនជាផ្លូវការ Cambodia Town ក្នុងទីក្រុង Long Beach រដ្ឋ California ក្នុងឆ្នាំ២០១២ទៀតផង។

សហគមន៍ខ្មែរនៅបារាំង ក្នុងឆ្នាំ១៩៨៩ មានជនភៀសខ្លួនខ្មែរត្រួសៗប្រមាណជា៥០ ០០០នាក់បានមកដល់ប្រទេសបារាំង។ តាមការជំរឿនឆ្នាំ២០១១ មានប្រជាជនខ្មែរទាំងកើតនៅប្រទេសបារាំង និងអន្តោប្រវេសន៍មកប្រទេសបារាំង ប្រមាណជា៨០ ០០០នាក់ ដោយភាគច្រើនរស់នៅទីក្រុងប៉ារីស និងទីក្រុង Lyon។ នៅប៉ារីស១៣ គេឧស្សាហ៍ឮប្រជាជននិយាយភាសាខ្មែរ និងមានហាងមួយចំនួនមានស្លាកយីហោជាអក្សរខ្មែរផងដែរ។ ប៉ុន្តែប្រជាជនខ្មែរក៏មានរស់នៅកន្លែងផ្សេងៗទៀត ក្នុងប្រទេសបារាំងនោះដែរ។

សហគមន៍ខ្មែរនៅកាណាដា ប្រជាជនខ្មែររស់នៅប្រទេសកាណាដា អ្នកខ្លះកើតនៅទីនោះ ប៉ុន្តែអ្នកខ្លះទៀតគឺទៅពីប្រទេសកម្ពុជា។ នៅក្នុងជំរឿនឆ្នាំ២០១១ បង្ហាញថា មានប្រជាជនខ្មែរប្រមាណជា៣៤ ៣៤០ ឬស្មើនឹង០,១ភាគរយនៃប្រជាជនទាំងអស់ក្នុងប្រទេសកាណាដា។ ចំនួនប្រជាជនខ្មែរភាគច្រើនគឺរស់នៅក្នុងសង្កាត់ Jane and Finch នៃទីក្រុង Toronto។ ប៉ុន្តែក្រៅពីនេះ ប្រជាជនខ្មែរក៏មានរស់នៅទីក្រុង Montreal ខេត្ត Quebec, ខេត្តOntario, និងខេត្ត Alberta ផង។

សហគមន៍ខ្មែរនៅអូស្ត្រាលី រដ្ឋាភិបាលអូស្ត្រាលីបានអនុញ្ញាតឲ្យជនភៀសខ្លួនខ្មែរ១០ ០០០នាក់មកតាំងទីលំនៅរបស់ខ្លួនក្នុងទីក្រុង និងរដ្ឋផ្សេងៗនៅទូទាំងប្រទេស ក្នុងសម័យសង្គ្រាមស៊ីវិលនៅកម្ពុជា។ សហគមន៍ខ្មែរធំៗឃើញមានចាក់ឫសនៅទីក្រុងSydney ក្នុងរដ្ឋ New South Wales និង រដ្ឋ Victoria។ បើយោងតាមការស្ទង់មតិរបស់រដ្ឋាភិបាលអូស្ត្រាលីតាំងពីឆ្នាំ២០០៦ មានប្រជាជនខ្មែរសរុប២៥ ៥៤៩នាក់រស់នៅក្នុងប្រទេសនេះ។