Balotelli អត់បានហ្វឹកហាត់ជាមួយ Liverpool ដោយសារសាច់ញាតិស្លាប់

2015-07-07 22:28:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Mario Balotelli បានខកខានហ្វឹកហាត់ ថ្ងៃដំបូងជាមួយក្រុម Liverpool ដើម្បីត្រៀមប្រកួតមិត្តភាពម្សិលមិញ ដោយសារតែសាច់ញាតិរបស់ខ្លួន ដែលត្រូវជាឪពុកចិញ្ចឹមតាំងពីក្មេង បានស្លាប់។

ក្រុម Liverpool ចេញហ្វឹកហាត់លើកដំបូងម្សិលមិញ

កីឡាករអ៊ីតាលី ត្រូវត្រឡប់ទៅចូលរួមជាមួយមិត្តរួមក្រុម នៅទីលានហ្វឹកហាត់ Melwood កាលពីថ្ងៃច័ន្ទ ប៉ុន្តែបន្ទាប់ពីឭព័ត៌មានសោកសៅ ដែលឪពុកចិញ្ចឹមកីឡាកររូបនេះស្លាប់ ក្លិបក៏ចេញច្បាប់អនុញ្ញាតឲ្យដកខ្លួនពីក្រុមសិនបាន។

Balotelli ដែលកើតនៅទីក្រុង Brescia ភាគខាងជើងប្រទេសអ៊ីតាលី គឺត្រូវបានឪពុកចិញ្ចឹមលោក Francesco មើលថែតាំងពីនៅវ័យកុមារ ៣ឆ្នាំមកម្ល៉េះ ប៉ុន្តែឪពុកចិញ្ចឹមរូបនេះ បានបាត់បង់ជីវិត កាលពីចុងសប្ដាហ៍កន្លងទៅ ដោយពុំបានបញ្ជាក់ពីមូលហេតុ។

យោងតាមរបាយការណ៍ ក្លិបហង្សក្រហម នៅតែរំពឹងថាអតីតខ្សែប្រយុទ្ធក្រុម Manchester City នឹងអាចចូលរួមជាមួយក្រុមទៅប្រកួតមិត្តភាពលក្ខណៈទេសចរណ៍បាន ដែលនឹងចាប់ផ្ដើមនៅចុងសប្ដាហ៍នេះ។

Liverpool នឹងត្រូវចាកចេញពីប្រទេសអង់គ្លេស មកកាន់តំបន់អាស៊ីអាគ្នេយ៍យើងនេះនៅថ្ងៃអាទិត្យ ខណៈដែលពួកគេ នឹងត្រូវប៉ះ Thai All Stars នៅថ្ងៃអង្គារ ទី១៤ ខែកក្កដា និងប៉ះក្រុមនៅប្រទេសអូស្ត្រាលី២ Brisbane Roar, Adelaide United មុននឹងប៉ះក្រុម Malaysia XI បន្តទៀត៕

-ចុចអាន៖ Balotelli នឹងនៅបន្តជាមួយ Liverpool ទៀត រដូវកាលក្រោយ

ប្រែសម្រួល៖ វិន ជីវ័ន្ត ប្រភព៖ dailymail