រឿង “អាកុក អាច្រវា" មានជនបរទេស ២០ នាក់ ចូលរួមសម្ដែង

ព្រហស្បតិ៍, 9 កក្កដា 2015 15:31
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង “អាកុក អាច្រវា" ជាភាពយន្តខ្មែរដំបូង ដែលមានជនបរទេសចូលរួមសម្ដែងច្រើនជាងគេ ក្នុងចំណោមភាពយន្តនានាកន្លងមក។ នេះបើតាមការអះអាងរបស់លោក ហ៊ុយ យ៉ាឡេង ចាងហ្វាងផលិតកម្ម មាតុចក្រហ្វីលម៍។

លោកបញ្ជាក់ថា នេះជាភាពយន្តខ្មែរ មានលក្ខណៈអន្តរជាតិ ហើយលោកបានប្រមូលជនបរទេសប្រមាណ ២០ នាក់កំពុងរស់នៅប្រទេសកម្ពុជា មកចូលរួមសម្ដែងនៅក្នុងរឿងនេះ តាមសាច់រឿងតម្រូវ។ អ្នកដឹកនាំរឿងនិយាយថា៖" សាច់រឿងរៀបចំមានលក្ខណៈអន្តរជាតិ អាចយកទៅបញ្ចាំងនៅក្រៅប្រទេសទៀតផង។ ដូច្នេះតម្រូវឱ្យមានជនបរទេសសម្ដែងច្រើនអ៊ីចឹងហើយ"។

អតីតដៃគូរបស់ផលិតកម្ម មហាហង្ស ដដែលបន្ថែមថា ភាពយន្តរឿង"អាកុក អាច្រវា" បានបញ្ចប់ដំណើរការថតជាស្ថាពរប៉ុន្មានថ្ងៃមុននេះ ដោយចំណាយដើមទុនប្រមាណ ១០ ម៉ឺនដុល្លារ។ លោកអះអាងថា ភាពយន្តសហការជាមួយផលិតកម្ម ជេត លើកដំបូងនេះ គឺជា គំនិតផ្ដួចផ្ដើមថ្មីមួយនៅក្នុងប្រទេសកម្ពុជា ដែលមិនទាន់មានអ្នកធ្វើនៅឡើយទេ។

ជាមួយគ្នានោះ អ្នកដឹកនាំរឿងខាងលើមានសុទិដ្ឋិនិយមថា វណ្ណកម្មទី ២ នឹងក្លាយជាទស្សនីយភាពមួយប្លែក សម្រាប់ទស្សនិកជនមិនខាន។ លោកបន្ថែមទៀតថា បើគ្មានអ្វីប្រែប្រួលទេ រឿង" អាកុក អាច្រវា" គ្រោងចាក់បញ្ចាំងតាមរោងភាពយន្តនានានៅភ្នំពេញ នៅមុនរដូវភ្ជុំមកដល់។ យ៉ាងណា ពេលនេះកំពុងដំណើរការកាត់ត និងសិក្សាពីតម្រូវការរបស់រោងភាពយន្តបរទេស៕

អានអត្ថបទ៖ ផលិតកម្មចម្រៀងចំនួន ៦ ទើបបង្កើតថ្មី នៅឆ្នាំ ២០១៥ នេះ

អានអត្ថបទ៖ ទោះធ្លាយរូបផ្អែមល្ហែមថ្មីៗជាមួយ នីអូ តែ តូតា ថាអ្វីៗនៅចំហ