អ្នកលក់ទុរេនសាច់ដុំ ៦កង់ ធ្វើឲ្យនារីជាច្រើនប៉ងទៅទិញ

2015-07-12 19:23:53
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបភាពប៉ុន្មានសន្លឹកបង្ហាញពីបុរសសង្ហាឈរលក់ទុរេន ដែលសារព័ត៌មានមួយរបស់ប្រទេសចិនយកទៅបង្ហោះលើបណ្ដាញសង្គម កំពុងធ្វើឲ្យនារីជាច្រើនជជែកគ្នាក្លាយជាប្រធានបទថ្មីមួយ។ អ្វីដែលធ្វើឲ្យគេចាប់អារម្មណ៍ គឺអ្នកលក់ទុរេននោះមានសាច់ដុំធំៗ និងមុខមាត់សង្ហាខុសពីអ្នកលក់ទូទៅ។

តាមពិត បុរសនៅក្នុងរូបភាពនោះមិនមែនជាអ្នកលក់ទុរេនផ្ទាល់ទេ គេគ្រាន់តែយកពេលវេលាមកជួយពូ និងមីងប៉ុណ្ណោះ។ អាជីពពិតរបស់គេ គឺជាកីឡាករកាយវប្បកម្មម្នាក់របស់ប្រទេសម៉ាឡេស៊ី ដែលធ្លាប់ចូលរួមប្រកួតជាច្រើនកម្មវិធី។

រូបភាពដែលកំពុងល្បីល្បាញនេះ ត្រូវបុរសសង្ហាបង្ហោះចូលហ្វេសប៊ុកកាលពីជិត ២០ម៉ោងមុន តាមគណនីមួយដែលមានឈ្មោះរបស់គេផ្ទាល់គឺ Jordan Yeoh។ អមជាមួយរូបភាព បុរសលេងសាច់ដុំរូបនេះ បានសរសេរថា "អ្នកលក់នៅផ្សារ ហាក់ដូចជាកំពុងពេញនិយម... អ៊ីចឹងខ្ញុំទៅជួយមីង ពូខ្ញុំ លក់ទុរេន"។

ក្រោយពេលបង្ហោះរួច អ្នកលេងបណ្ដាញសង្គមជាច្រើន ពិសេសសុភាពនារី បានចែករំលែកជាង ១ម៉ឺនដង។ កាលពីយប់មិញនេះ បណ្ដាញសង្គមរបស់សារព័ត៌មានចិន Shanghaiist បានយកបង្ហោះតទៀត ធ្វើឲ្យមនុស្សជាច្រើន មានការងឿងឆ្ងល់ថា ហេតុអ្វីបុរសរូបរាងសង្ហាបែបនេះ បែរជាមកឈរលក់ទុរេនទៅវិញ៕