ស៊ន ដាវីន រៀបរាប់ពីចំណងស្នេហ៍ជាមួយ វ៉ន វីវ៉ា

អង្គារ, 14 តុលា 2014 14:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីតេក្វាន់ដូជម្រើសជាតិកម្ពុជា ស៊ន ដាវីន និងអ្នកប្រដាល់ជើងខ្លាំងទម្ងន់ធ្ងន់របស់កម្ពុជា វ៉ន វីវ៉ា បានបង្ហាញជាផ្លូវការហើយនូវពិធីភ្ជាប់ពាក្យរបស់គេ កាលពីថ្ងៃអាទិត្យ ទី១២ ខែតុលា ឆ្នាំ២០១៤ នេះ។ ចង់ដឹងសាមីខ្លួនខាងស្រី ស៊ន ដាវីន និយាយអ្វីខ្លះពីរឿងស្នេហារបស់ខ្លួនជាមួយ វ៉ន វីវ៉ា មុនពេលឈានដល់ដំណាក់កាលនេះ។

ម្ចាស់មេដាយប្រាក់កីឡាស៊ីហ្គេម ស៊ន ដាវីន បានលើកឡើងថា រូបនាង និងលោក វ៉ន វីវ៉ា បានស្គាល់គ្នា និងចាប់ផ្ដើមរាប់អានគ្នា កាលពីទៅចូលរួមព្រឹត្តិការណ៍កីឡាស៊ីហ្គេមឆ្នាំ២០១១នៅប្រទេសឥណ្ឌូណេស៊ីមកម្ល៉េះ ប៉ុន្តែកាលនោះគ្រាន់តែជាទំនាក់ទំនងធម្មតាតែប៉ុណ្ណោះ។ បន្ទាប់ពីនោះមក អ្នកទាំងពីរតែងតែលេងឆាតតាមហ្វេសប៊ុក ជាពិសេសនិយាយលើកទឹកចិត្ត និងជូនពរគ្នាមុនឡើងប្រកួតជាដើម។

និយាយពីទំនាក់ទំនងស្នេហាវិញ ដាវីន បានលើកឡើងថា នាងនិងលោក វ៉ន វីវ៉ា ទើបតែចាប់ផ្ដើមស្រឡាញ់គ្នាបានតែមួយឆ្នាំប៉ុណ្ណោះគឺនៅថ្ងៃខួបកំណើតរបស់ប្អូនស្រីនាង កញ្ញា ស៊ន សៀវម៉ី ម្ចាស់មេដាយមាស Asian Games 2014។ «ខ្ញុំលេងឆាតមួយគាត់យូរៗទៅក៏ចាប់ផ្ដើមមើលចិត្តគ្នាទៅវិញទៅមក ហើយក៏យល់ចិត្តគ្នា អាចរស់នៅមួយគ្នាបាន។ ពួកយើងស្រឡាញ់គ្នាដោយអារម្មណ៍ទាំងពីរនាក់តែម្ដង»។ នេះជាការបញ្ជាក់របស់ ដាវីន។

កីឡាការិនីកម្ពស់ខ្ពស់រូបនេះបានបន្ថែមថា តាំងពីចាប់ផ្ដើមស្រឡាញ់គ្នាជាមួយលោក វ៉ន វីវ៉ា មក អ្នកទាំងពីរមិនដែលទាស់ទែងពាក្យសម្ដី ឬឈ្លោះប្រកែកគ្នាម្ដងណាឡើយ។

ងាកទៅផ្ដោតលើអាពាហ៍ពិពាហ៍វិញ ដាវីនប្រាប់ថា៖ «ម៉ាក់អត់ទាន់ដេញវេលាផង តែគ្រោងនឹងរៀបការនៅដើមឆ្នាំក្រោយបង»។ នាងបន្តថា រូបនាងផ្ទាល់ និងក្រុមគ្រួសារមិនជឿលើអបិយជំនឿ ឬការមើលខែឆ្នាំត្រូវគ្នា ល្អឬមិនល្អយ៉ាងណានោះទេ ពីព្រោះមានគូស្រករខ្លះខែឆ្នាំល្អ ប៉ុន្តែក្រោយរៀបការរួចនៅតែបែកគ្នាដដែល រីឯម្ដាយរបស់នាងគ្រាន់តែចង់បានថ្ងៃល្អដើម្បីរៀបអាពាហ៍ពិពាហ៍ឲ្យអ្នកទាំងពីរតែប៉ុណ្ណោះ។

ផ្ដោតទៅលើថ្លៃបណ្ដាការវិញ កូនស្រីនៃគ្រួសារដែលមានកម្ពស់ខ្ពស់រូបនេះមិនបានបញ្ជាក់យ៉ាងណានោះទេ ដោយបានរុញឲ្យទៅមើលលើទំព័រហ្វេសប៊ុករបស់ខ្លួន និងអ្នកពាក់ព័ន្ធដើម្បីស្វែងយល់ដោយខ្លួនឯង។ បើផ្អែកតាមហ្វេសប៊ុករបស់ វ៉ន វីវ៉ា ដែលបានបង្ហោះរូបភាពពិធីភ្ជាប់ពាក្យជាច្រើនសន្លឹកក្នុងនោះក៏មានរូបភាពមួយបានបង្ហាញពីចិញ្ចៀនពីរវង់ និងក្រដាសប្រាក់១០០ដុល្លារចំនួន៧ខ្ទាស់នៅក្នុងពិធីភ្ជាប់ពាក្យនេះផងដែរ ដែលនេះប្រហែលជាចំណុចដែលសាមីខ្លួនចង់បង្ហាញពីថ្លៃបណ្ដាការហើយ៕