បង្គាចាក់បញ្ចូលជ័រមានដាក់លក់លើទីផ្សារចិន
- 2015-07-18 00:04:26
- ចំនួនមតិ 0 | ចំនួនចែករំលែក 0
បង្គាចាក់បញ្ចូលជ័រមានដាក់លក់លើទីផ្សារចិន
ចន្លោះមិនឃើញ
បន្ទាប់ពីមានរឿងអាស្រូវទាក់ទងនឹងសាច់ជ្រូកច្រកទឹក សាច់ហួសកាលកំណត់ ៤០ឆ្នាំ និងឈាមទាក្លែងក្លាយ ពេលនេះប្រទេសចិនបានប្រទះរឿងនឹកស្មានមិនដល់មួយទៀត គឺបង្គាចាក់បញ្ចូលជ័រដាក់លក់លើទីផ្សារ។
អាជីវករម្នាក់នៅខេត្ត Zhejiang ប្រទេសចិនកំពុងស្ថិតក្រោមការស៊ើបអង្កេត បន្ទាប់ពីប្រទះឃើញបង្គាមួយចំនួននៅក្នុងហាងមានចាក់បញ្ចូលជ័រអន្ធិលម្យ៉ាងធ្វើពីឆ្អឹង។ បង្គាទាំងនេះ ត្រូវនារីឈ្មោះ Zheng ទិញបាននៅផ្សារមួយក្នុងក្រុង Wenzhou។
នារីរូបនេះបានប្រទះឃើញសារជាតិម្យ៉ាងដូចចាហួយហូរចេញពីក្បាល និងខ្លួនបង្គា។ នាងមិនច្បាស់ថាវាអាចទទួលបានឬអត់នោះទេ ព្រោះមិនហ៊ានសាកល្បង។ Zheng បានប្រាប់រឿងនេះដល់បណ្ដាញសារព័ត៌មាន ហើយអាជ្ញាធរក៏បានបើកការស៊ើបអង្កេតភ្លាមៗ។
មនុស្សមួយចំនួនជឿជាក់ថា សារជាតិដែលគេមិនទាន់អាចសន្និដ្ឋានបានច្បាស់នេះ គឺជាជាតិជ័រអន្ធិលៗធ្វើពីឆ្អឹង ចំណែកឯអ្នកផ្សេងទៀតព្រួយបារម្ភថា វាអាចជាជ័រប្លាស្ទិក។ អ្នកលក់បង្គាបានអះអាងថា ខ្លួនមិនធ្លាប់បានធ្វើរឿងបែបនេះឡើយ ហើយក៏មិនស្គាល់ថាវាជាអ្វីដែរ។ លោកបានបញ្ជាក់ថា អាហារសមុទ្រទាំងនេះ នាំចូលពីអ្នកចែកចាយផ្សេងទៀត។ យ៉ាងណាក្ដី អ្នកលក់រូបនេះត្រូវប៉ូលិសនាំខ្លួនទៅធ្វើការសាកសួរ។
អ្នកលក់គ្រឿងសមុទ្រមួយចំនួនបានលាតត្រដាងថា បន្ទាប់ពីបង្គាកកចាប់ផ្ដើមរលាយវិញ ខ្លួនវានឹងស្ងួតហើយរួមតូច ដូចនេះហើយទើបអ្នកខ្លះចាក់បញ្ចូលជ័រដើម្បីឲ្យទៅឃើញស្រស់ល្អ និងបង្កើនទម្ងន់៕
ចុចអាន៖ ស្រោមអនាម័យក្លែងក្លាយជិត ៣៥លានស្រោម ត្រូវគេចាប់បាន
ចុចអាន៖ អង្ករក្លែងក្លាយធ្វើពីប្លាស្ទិកកំពុងរីករាលដាលនៅអាស៊ី
ប្រែសម្រួល៖ គង់ វិសាល ប្រភព៖ shanghaiist