ក្មេងល្ហក់តែមានសមត្ថភាពធ្វើការក្នុងក្រុមហ៊ុនទំនើបបំផុតនៅអាស៊ី

2015-07-20 17:39:45
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីខ្មែរ ងួន ភួងទេពសុនិច បានក្ដាប់ឱកាសការងារនៅក្រៅស្រុកក្នុងក្រុមហ៊ុនទំនើបបំផុតមួយនៅអាស៊ី ខណៈដែលកញ្ញាទើបមានអាយុ ២១ ឆ្នាំ ដែលឱកាសនេះមិនមែនជាភាពងាយស្រួលសម្រាប់គ្រប់គ្នាសុទ្ធតែអាចទទួលបាននោះទេ។

នៅអាយុ១៧ឆ្នាំ សុនិច បានអាហារូបករណ៍ ១០០% សម្រាប់បន្តការសិក្សានៅសកលវិទ្យាល័យមហាសារ៉ាខាម (Mahasarakham University) លើជំនាញគ្រប់គ្រងពាណិជ្ជកម្មអន្តរជាតិ ក្នុងប្រទេសថៃ ដែលសាលាចេញអោយទាំងថ្លៃសិក្សា ការស្នាក់នៅ ការព្យាបាលជំងឺ ទិដ្ឋាការ និងប្រាក់បៀវត្សប្រចាំខែសម្រាប់ផ្គត់ផ្គង់លើការហូបចុក។ កញ្ញានិយាយថា ដោយសារតែមុខវិជ្ជាគ្រប់គ្រងពាណិជ្ជកម្មអន្តរជាតិគួរអោយចាប់អារម្មណ៍ ហើយក៏ពុំសូវមានអ្នករៀនជំនាញនេះនៅខ្មែរផងនោះ ដូច្នេះទើបគិតថាវាជាឱកាសមួយដែលគួរតែរៀនមុខវិជ្ជានេះ ព្រោះការងារគ្រប់គ្រងបែបអន្តរជាតិបែបនេះនៅប្រទេសខ្មែរនៅពុំទាន់ជឿនលឿននៅឡើយ។ អំឡុងសិក្សានៅប្រទេសថៃ អតីតសិស្សវិទ្យាល័យបាក់ទូកធ្លាប់ជាជយលាភីមេដាយប្រាក់ផ្នែកអក្សរសាស្ត្រខ្មែររូបនេះប្រាប់ថា នាងមិនគិតតែប្រឹងរៀនមួយមុខនោះទេ គឺឆ្លៀតស្វែងរកការចុះកម្មសិក្សានៅក្រុមហ៊ុន ឬចូលរួមសកម្មភាពផ្សេងៗមិនថារបស់សាលាឬសង្គមនោះឡើយ ដើម្បីបានបទពិសោធន៍ជាទុននៅពេលធ្វើការងារ ក៏ដូចជាងាយឆាប់សម្របខ្លួនទៅនឹងវប្បធម៌ថ្មី ភាសា ការទំនាក់ទំនងផងដែរ។ សុនិចបានចូលរួមដូចជា ការបោះជំរុំ ការធ្វើបដិសណ្ឋារកិច្ចភ្ញៀវបរទេស ការចាត់តាំងពិព័រណ៍ ការសម្ដែងសិល្ប:វប្បធម៌ខ្មែរក្នុងកម្មវិធីផ្សេងៗរបស់សាលាជាដើម ព្រមទាំងធ្វើជាប្រធានសមាគមនិស្សិតខ្មែរនៅសកលវិទ្យាល័យមហាសារ៉ាខាម និងទូតនិស្សិត (student ambassador) ទៀតផង។ ក្រៅពីនេះ សុនិចក៏បានចុះកម្មសិក្សាក្នុងក្រុមហ៊ុនស្រាបៀធំបំផុតទី ១ ប្រចាំប្រទេសថៃ គឺក្រុមហ៊ុនសិង្ហារ (Singha Corporation) ដែលឱកាសចូលរួមនេះត្រូវប្រកួតប្រជែងចម្រាញ់យកបេក្ខជនចុងក្រោយចំនួន៥០រូបប៉ុណ្ណោះ ដើម្បីចុះកម្មសិក្សាចំនួន៣ខែ។

លើសពីនេះ ដោយឃើញថា ការបង្រៀនភាសាអង់គ្លេសនៅប្រទេសថៃមានតម្លៃថ្លៃខ្លាំង ដូច្នេះសុនិចក៏បើកថ្នាក់បង្រៀនភាសាអង់គ្លេសដល់និស្សិតថៃដើម្បីរកកម្រៃបន្ថែម និងដើម្បីបង្កើនបទពិសោធន៍ថែមទៀត។

បើទោះបានចូលរួមការងារច្រើននៅប្រទេសថៃហើយក្ដី យុវតីរាងតូចច្រឡឹងរូបនេះហាក់មិនអស់ចិត្តចង់ស្រវាឱកាសស្រង់ពិសោធន៍នៅបណ្ដាប្រទេសផ្សេងៗទៀត។ ម្ល៉ោះហើយនៅពេលមានកម្មវិធីនានាដែលប្រកាសតាមអ៊ីនធឺណិត សុនិចមិនសូវអាក់ខានឡើយ ដោយកន្លងមកបានទៅដូចជា ហុងកុង ហ្វីលីពីន ជប៉ុន ព្រមទាំងប្រទេសបារាំង ដើម្បីចូលរួមការបោះជំរុំ សិក្ខាសាលា និងសិក្សាបន្ថែម។

ក្នុងឆ្នាំ២០១៥ថ្មីៗនេះ សុនិចទើបបានបញ្ចប់ការសិក្សារបស់ខ្លួន ហើយក៏ទទួលបានការងារនៅប្រទេសថៃតែម្ដងក្នុងក្រុមហ៊ុន IMPACT Exhibition Management Co., Ltd. ជាក្រុមហ៊ុនចាត់ការតាំងពិព័រណ៍មួយក្នុងចំណោមក្រុមហ៊ុនពិព័រណ៍ធំៗ និង ទំនើបបំផុតនៅអាស៊ី ដែលកញ្ញាមានតំណែងជាអ្នកប្រតិបត្តិផ្នែកទីផ្សារ (Marketing Executive)។ កញ្ញាថា ការងារនេះត្រូវចាត់ចែងរៀបចំគម្រោងការសម្រាប់តាំងពិព័រណ៍ផ្សេងៗ រៀបចំប្លង់ និងផ្សព្វផ្សាយការតាំងពិព័រណ៍ ព្រមទាំងទាក់ទងក្រុមហ៊ុនក្នុងស្រុកនិងក្រៅស្រុកដែលមានគម្រោងមកតាំងពិព័រណ៍។

បើទោះនិស្សិតទៅរៀននៅបរទេសភាគច្រើនពេលបញ្ចប់ការសិក្សា រមែងសម្រុកមកធ្វើការក្នុងប្រទេសកំណើតរបស់ខ្លួន តែអ្នកមានស្រុកកំណើតនៅភ្នំពេញរូបនេះ ចង់បន្តនៅប្រទេសថៃដើម្បីធ្វើការងារ ។ សុនិច ថា ការដែលកញ្ញាសម្រេចចិត្តធ្វើការនៅប្រទេសថៃមុននឹងមកកម្ពុជា ព្រោះចង់ដកស្រង់បទពិសោធន៍ការងារនិងរបៀបធ្វើការងារដែលអាចយកមកចែករំលែកដល់ប្រទេសកម្ពុជាក្នុងការអភិវឌ្ឍប្រទេសក្នុងវិស័យពាណិជ្ជកម្ម ពេលដែលយុវតីរូបនេះត្រឡប់មកប្រទេសខ្មែរវិញនារយៈពេល ៣ ទៅ ៤ ឆ្នាំខាងមុខទៀត។

លើសពីនេះ សុនិចចង់សន្សំលុយអោយបានច្រើនព្រោះនៅថៃបានប្រាក់ខែខ្ពស់ ដោយសារនៅថ្ងៃអនាគតក្រោយពេលត្រឡប់មកពីប្រទេសថៃវិញ កញ្ញានឹងយកលុយទាំងនោះមកបើកជាពាណិជ្ជកម្មផ្ទាល់ខ្លួនផ្នែកសេវាកម្មដែលមានលក្ខណ:ជាប្រព័ន្ធច្បាស់លាស់ ដើម្បីអោយប្រទេសខ្មែរមានលក្ខណៈសេវាកម្មទំនើបដូចនៅប្រទេសគេដែរ ជាជាងចាំអោយជនបរទេសមកបើកអោយយើងជាជនជាតិខ្មែរក៏គួរតែមានគំនិតក្នុងវិស័យពាណិជ្ជកម្មដែរ។ បើប្រទេសយើងមានពាណិជ្ជកម្មទំនើបៗដែលកើតចេញពីគំនិតនិងស្នាដៃរបស់កូនខ្មែរនោះគឺជាការប្រសើរខ្លាំងណាស់។

កញ្ញាប្រាប់ថា សម្រាប់អ្នកដែលមានបំណងចង់ធ្វើការនៅក្រៅប្រទេស អ្វីដែលចាំបាច់បំផុតនោះ គឺភាសា ទាំងភាសាអង់គ្លេសនិងភាសារបស់ប្រទេសដែលនឹងធ្វើការនោះ ព្រោះវាសំខាន់ណាស់ក្នុងការទំនាក់ទំនងពេលកំពុងធ្វើការ និងក្នុងការរស់នៅផងដែរ។ ដោយឡែកប្រទេសថៃ ចំណេះដឹងភាសាអង់គ្លេសតែមួយមុខមិនគ្រប់គ្រាន់នោះទេ ត្រូវតែចេះភាសាថៃយ៉ាងស្ទាត់ជំនាញផងដែរទើបទទួលបានការងារ។ កត្តាមួយទៀតដែលសំខាន់នោះគឺបទពិសោធន៍ មានតែសញ្ញាប័ត្រតែមួយមុខមិនគ្រប់គ្រាន់ក្នុងការរកការងារល្អៗធ្វើនោះទេ ព្រោះគ្រប់ក្រុមហ៊ុនគេត្រូវការអ្នកចេះធ្វើ មិនមែនអ្នកដែលពូកែតែទ្រឹស្ដីមួយមុខនោះឡើយ។

កញ្ញាបន្ថែមថា៖ "បើទោះជាយើងគ្មានបទពិសោធន៍ធ្វើការក្នុងក្រុមហ៊ុនពីមុនមកក្ដី តែសកម្មភាពផ្សេងៗដែលយើងធ្លាប់ធ្វើនៅសាលា ដូចជាការងារសមាគមជាដើម ក៏អាចរាប់បញ្ចូលក្នុងបទពិសោធន៍ការងារផងដែរ។ ដូច្នេះហើយ អ្នកសិក្សាទាំងអស់គ្នាគួរតែយកចិត្តទុកដាក់ក្នុងការងារសង្គមផ្សេងៗអោយបានច្រើន កុំមើលរំលងអោយសោះ ព្រោះចំណេះដឹងតែក្នុងសៀវភៅមួយមុខមិនអាចបង្រៀនយើងគ្រប់គ្រាន់ទេ គឺយើងទទួលបានតែទ្រឹស្ដីប៉ុន្តែខ្វះការអនុវត្ត"៕

សូមអាន ៖ យុវជនម្នាក់ចាប់ជំនាញសិក្សាពីព្រះពុទ្ធសាសនា ទោះរៀនចប់ក៏មិនស្ដាយក្រោយ

អត្ថបទ៖ លឹម សុនា