ប្រើម៉ាស៊ីនគិតលេខពេលប្រឡងបាក់ឌុបល្អ ឬមិនល្អ?

2015-07-20 23:09:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រើប្រាស់ម៉ាស៊ីនគិតលេខនៅក្នុងការប្រឡងថ្នាក់ជាតិមធ្យមសិក្សាទុតិយភូមិនៅតែជាប្រធានបទជជែកពិភាក្សាឥតដាច់ក្នុងចំណោមមហាជន ក៏ដូចជាអ្នកធ្វើការពាក់ព័ន្ធនឹងវិស័យអប់រំផ្ទាល់ជុំវិញសារៈសំខាន់ និងផលប៉ះពាល់របស់វា។

លោក ប៊ូ រ៉ាដា អាយុ ២៦ឆ្នាំ បុគ្គលិកវិស្វករក្រុមហ៊ុនសាងសង់ឯកជនមួយបានលើកឡើងថា ការប្រើប្រាស់ម៉ាស៊ីនគិតលេខនៅពេលប្រឡងល្អផង និងមិនល្អផង។ លោករៀបរាប់ថា «តាមពិតទៅ ការប្រើប្រាស់ម៉ាស៊ីនគិតលេខគឺល្អសម្រាប់អ្នកធ្វើការវិស័យសំណង់ដូចខ្ញុំ ព្រោះវាងាយ និងរហ័ស។ តែពេលខ្លះ គ្មានកាស្យូ (ម៉ាស៊ីនគិតលេខ) យើងត្រូវប្រើខួរក្បាលខ្លះដែរ អីចឹងបើរៀនបង្វឹកខួរក្បាលខ្លះក៏ល្អដែរ"។ បុរសសម្បុរស្រអែមខ្ពស់ស្រាវយល់ថា ការប្រើម៉ាស៊ីនគិតលេខពេលប្រឡងមានផលល្អ និងមិនល្អម៉្យាងម្នាក់។

កុល វិរៈ បុគ្គលិកអង្គការក្រៅរដ្ឋាភិបាលមិនគាំទ្រឲ្យមានការប្រើម៉ាស៊ីនគិតលេខពេលប្រឡងទេ។ លោកនិយាយថា «ខ្ញុំយល់ថា ពេលរៀន គ្រូបង្រៀនឲ្យយើងថ្នឹកនឹងការគិតលេខប្រើមាត់ហើយ។ អីចឹងដល់ពេលប្រឡង មិនចាំបាច់ខ្វល់រឿងម៉ាស៊ីនគិតលេខអីទេ ប្រើតែខួរក្បាលហ្នឹងក៏គិតចេញដែរ។ បើយើងប្រើ អ្នកផ្សេងអត់ប្រើម៉េចស្មើភាពគ្នា?»។

ផ្ទុយពីការលើកឡើងខាងលើកញ្ញា កៅ សុកជា គរុនិស្សិតវិទ្យាស្ថានជាតិអប់រំគាំទ្រឲ្យមានការប្រើប្រាស់ម៉ាស៊ីនគិតលេខនៅពេលប្រឡង។ កញ្ញាលើកឡើងថា «ខ្ញុំយល់ថា វា (ការប្រើម៉ាស៊ីនគិតលេខ) ល្អ ព្រោះវាចំណេញពេលវេលា ហើយសម័យឥលូវបើគាត់ចេះក៏ល្អដែរព្រោះពេលចេញទៅអនុវត្តការងារពិតក៏ប្រើម៉ាស៊ីនគិតលេខដើម្បីជំនួយញឹកញាប់ដែរ»។ គរុនិស្សិតវ័យ ២៤ ឆ្នាំ បន្ថែមថា ការចេះប្រើម៉ាស៊ីនគិតលេខដោះស្រាយសមីការធំៗក៏តម្រូវឲ្យអ្នកប្រើចេះប្រើដែរទើបដោះស្រាយចេញ ដូច្នេះវាមិនអាក្រក់ទេ ដែលអនុញ្ញាតឲ្យមានការប្រើម៉ាស៊ីនគិតលេខនៅពេលប្រឡង។

ស្រដៀងគ្នានេះដែរ រដ្ឋា សិស្សវិទ្យាល័យបាក់ទូកដែលត្រៀមប្រឡងបាក់ឌុបនៅពេលខាងមុខថា ប្រើម៉ាស៊ីនគិតលេខជាការល្អ។ យុវតីរាងស្រាវស្ដើងបញ្ជាក់ថា «មិនមែនដោយសារខ្ញុំត្រូវប្រឡងឆ្នាំហ្នឹងបាននិយាយអីចឹងទេបង។ សម្រាប់ខ្ញុំគិតថា សម័យនេះហើយ បច្ចេកវិទ្យាក៏ជឿនលឿនដែរ អីចឹងបើយើងរៀនការប្រើកាស្យូក៏ល្អច្រើនដែរ ព្រោះយើងចាំបាច់អីយកខួរក្បាលទៅគិតលើរឿងហ្នឹង (លេខ) ច្រើនពេក ម៉េចមិនទុកវាទៅប្រើអីផ្សេង?»។ សិស្សវិទ្យាល័យរូបនេះចង់ឲ្យគ្រូៗបំពាក់បំប៉នជំនាញប្រើម៉ាស៊ីនគិតលេខដល់សិស្សទើបជាការល្អ ហើយសម្រាប់កញ្ញាគឺ រៀនការប្រើម៉ាស៊ីនគិតលេខដោះស្រាយសមីការសំខាន់ៗតាមរយៈក្លឹបសិក្សាចែករំលែកចំណេះដឹងក្នុងចំណោមមិត្តភ័ក្ដិគ្នាឯង។

នៅលើទំព័រ Facebook របស់ក្រសួងអប់រំ យុវជន និងកីឡាបង្ហោះថ្មីៗនេះថា នឹងមិនអនុញ្ញាតឲ្យប្រើម៉ាស៊ីនគិតលេខពេលប្រឡងមធ្យមសិក្សាទុតិយភូមិឡើយ។ ចំពោះមូលហេតុក្បាលម៉ាស៊ីនផ្នែកអប់រំរៀបរាប់ដូចខាងក្រោមនេះ៖

«បេក្ខជនមិនអាចប្រើម៉ាស៊ីនគិតលេខក្នុងពេលប្រឡងបានទេ។ ហេតុផលមិនអនុញ្ញាតឲ្យប្រើម៉ាស៊ីនគិតលេខ គឺដើម្បីធានានូវសមភាព និងយុត្តិធម៌សម្រាប់បេក្ខជនទាំងអស់។ ការរៀបចំនូវវិញ្ញាសានីមួយៗបានគិតគូរយ៉ាងល្អិតល្អន់ផ្អែកទៅតាមពេលវេលាដែលបានកំណត់។ ម៉ាស៊ីនគិតលេខ មានច្រើនប្រភេទរាប់មិនអស់ មានមុខងារប្រើប្រាស់ តិច ឬច្រើនទៅតាមតម្លៃខ្ពស់ ឬទាប ដែលពុំមានសមធម៌ និងយុត្តិធម៌សម្រាប់បេក្ខជនទាំងអស់។ ការគិតលេខដោយខួរក្បាលនឹងបង្កើនភាពរស់រវើកធ្វើឲ្យមានការចងចាំបានល្អ»។