ម៉ាសបិទមុខដំឡូងបារាំងធម្មជាតិធ្វើឲ្យស្បែកមុខសតឹងស្អាត ១០០%

2015-07-23 15:31:02
ចំនួនមតិ 0 | ចំនួនចែករំលែក 0

ចន្លោះមិនឃើញ

សប្ដាហ៍មុន ទំព័រសុខភាព និងសម្រស់របស់ Sabay បានបង្ហាញពីវិធីស្ទីមមុខឲ្យស្បែកភ្លឺថ្លាទន់ល្មើយតាមបែបធម្មជាតិដែលណែនាំដោយស្រីស្អាត បរមី ហៅ Mini Angel។ ហើយចុះ ប្រិយមិត្តមានសាកល្បងហើយនៅ? មិត្តអ្នកអានលួចខ្សឹបថា មានប្រសិទ្ធភាពរបស់គេមែន!

អានអត្ថបទ៖ ស្រីស្អាតបង្ហាញវិធីស្ទីមមុខប្រសិទ្ធភាពបំផុតរក្សាស្បែកមុខស្រស់ថ្លាតាមបែបធម្មជាតិ

ដោយឡែក ថ្ងៃនេះ អ្នកជំនាញខាង Makeup អាជីពវ័យក្មេងរូបនេះ បាននាំយកវិធីថែរក្សាសម្រស់មួយទៀត គឺម៉ាសបិទមុខធម្មជាតិធ្វើពីដំឡូងបារាំង និងទឹកដោះគោស្រស់ ដែលមានប្រសិទ្ធភាពក្នុងការបន្តឹង និងធ្វើឲ្យស្បែកមុខស១០០%។

* អត្ថប្រយោជន៍

ធ្វើឲ្យស្បែកមុខតឹងមិនជ្រីវជ្រួញ ក្មេងជាងវ័យ
ធ្វើឲ្យស្បែកមុខស ម៉ត់ រលោង
បំបាត់ខ្លាញ់លើផ្ទៃមុខ
បំបាត់ជាតិពុល និងធូលីលើផ្ទៃមុខ

* សម្ភារៈ

ដំឡូងបារាំង ១ ដុំ
ទឹកដោះគោស្រស់
កូនចានតូចមួយ

* វិធីធ្វើ

ចិតសម្បកដំឡូងចេញឲ្យអស់ រួចលាងទឹកឲ្យស្អាត
ស្ងោរដំឡូងបារាំងនោះរហូតដល់ផុយរលួយដល់ថ្នាក់ដាក់ស្លាបព្រាសង្កត់បែកខ្ទេច
ដាក់ដំឡូងស្ងោររួចក្នុងកូនចាន ហើយយកស្លាបព្រាសង្កត់កិនឲ្យម៉ត់ខៃ
ទុកដំឡូងកិននោះឲ្យត្រជាក់ រួចចាក់ទឹកដោះគោស្រស់ចូល ឲ្យល្មមប៉ិៗបន្តិច។ ការប្រើប្រាស់ទឹកដោះគោនេះ នឹងអស់ច្រើន ដោយសារដំឡូងបារាំងបឺតស្រូបខ្លាំង។

* វិធីបិទម៉ាស

លាងសម្អាតផ្ទៃមុខនឹងទឹកស្អាត
យកល្បាយដំឡូងបារាំងនោះមានលាបថើៗលើស្បែកផ្ទៃមុខ ហើយទុកចោលរយៈពេល ១៥ នាទី។ ជាក់ស្ដែង ត្រឹម ៥ នាទីដំបូង អ្នកនឹងមានអារម្មណ៍ថាស្បែកមុខតឹងម្ដងបន្តិចៗ ស្ទើរទ្រាំមិនបាន។
បន្ទាប់ពីសម្អាតម៉ាសហើយ អ្នកអាចលាងសម្អាតផ្ទៃមុខនឹងទឹកស្អាតត្រជាក់ធម្មតា។ ហាមដាច់ខាត ប្រើហ្វមលាងមុខមកលាងសម្អាត ព្រោះពេលប្រើម៉ាស រន្ធញើសស្បែកមុខបើករីកធំ។ ប្រើទឹកស្អាតត្រជាក់ធម្មតា ដើម្បីឲ្យរន្ធញើសស្បែករួមតូចវិញ។
អនុវត្តវិធីបិទម៉ាសនេះ ២ ដងក្នុងមួយសប្ដាហ៍ នៅពេលព្រឹក ឬយប់ អាស្រ័យលើពេលវេលាទំនេររបស់អ្នក។