ស្រីស្អាតបង្ហាញវិធីស្ទីមមុខប្រសិទ្ធភាពបំផុតរក្សាស្បែកមុខស្រស់ថ្លាតាមបែបធម្មជាតិ

2015-07-16 16:58:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការថែរក្សាសម្រស់ឲ្យស្អាតស្រស់ថ្លា មានវិធីច្រើនខុសៗគ្នា ដោយខ្លះជ្រើសរើសវិធីផ្លូវកាត់ប្រើឡេគីមី ឯខ្លះទៀតមិនលេងផ្លូវកាត់ដោយប្រើវិធីធម្មជាតិងាយៗ បើទោះបីរាងស៊ីពេលបន្តិចក៏ដោយ។ ហានិភ័យត្រង់ថា ប្រើឡេគីមី ស្អាតបានតែមួយរយៈពេល គ្រោះថ្នាក់ស្បែកនាពេលអនាគត!

ទំព័រសុខភាព និងសម្រស់នេះ Sabay សូមណែនាំប្រិយមិត្តនារីៗគ្នាយើងពីវិធីស្ទីមមុខឲ្យស្បែកភ្លឺស្រស់ថ្លាតាមបែបធម្មជាតិ ដែលវិធីនេះជាក្បួនរបស់អឺរ៉ុបមានប្រសិទ្ធភាពបំផុត និងបង្ហាញជូនដោយស្រីស្អាតម្ចាស់សាឡនវ័យក្មេង Mini Angel។

អត្ថប្រយោជន៍៖

ស្បែកមុខភ្លឺស្រស់ថ្លា គ្មានខ្លាញ់
ស្បែកមុខគ្មានឡើងមុន
ចេញជាតិពុលជាប់លើស្បែកមុខ ព្រោះពេលស្ទីមរន្ធញើសស្បែកមុខនឹងបើកធំ ហើយចេញជាតិពុល និងធូលី
បំបាត់ស្ត្រេស
សម្រួលចលនាដង្ហើមដល់អ្នកមានតឹងច្រមុះ។

សម្ភារៈ៖

ចានគោមមួយ
ក្រូចឆ្មារហាន់ជាចំណិតស្ដើងៗ (១ចំហៀងក្រូច)
ទឹកក្ដៅដាំពុះ
កូនកន្សែងពោះគោ

វិធីស្ទីម៖

លុបលាងមុខជាមួយទឹកស្អាតធម្មតា
ដាក់ទឹកក្ដៅដាំពុះក្នុងចានគោម
ច្របាច់ក្រូចក្នុងទឹកក្ដៅក្នុងចានគោម និងដាក់សម្បកក្រូចត្រាំចោល
ចាប់ផ្ដើមស្ទីមមុខ ដោយឈ្ងោកមុខបន្តិចពីលើចានគោមកំពុងក្ដៅហុយៗកម្ពស់ពី៥ ទៅ៧ សង់ទីម៉ែត្រ និងប្រើកន្សែងពោះគោទូលលើក្បាលបន្តិច ដើម្បីរក្សាកម្ដៅចេញពីទឹក។
ស្ទីមរយៈពេល ៥នាទី សម្រាប់អ្នកមានស្បែកមុខស្ដើង និងរយៈពេល ៨នាទី សម្រាប់អ្នកមានស្បែកមុខធម្មតា។
ក្រោយស្ទីម រង់ចាំរយៈពេលពី ១៥ ទៅ២០នាទីដើម្បីឲ្យស្បែកមុខឈប់ក្រហមរាងត្រជាក់វិញ សឹមទៅលុបលាងមុខដោយទឹកស្អាតធម្មតា។
ធ្វើបែបនេះ ២ដងក្នុងមួយសប្ដាហ៍ ស្បែកមុខអ្នកនឹងគ្មានជាតិពុល ឡើងមុន ហើយធានាថាភ្លឺស្រស់ថ្លាតាមបែបធម្មជាតិទៀតផង
អ្នកអាចអនុវត្តពេលព្រឹក ឬពេលល្ងាច អាស្រ័យលើពេលវេលាទំនេររបស់អ្នក។