ធ្លាយបេក្ខជនជិត១ម៉ឺននាក់ បោះបង់ចោលប្រលងបាក់ឌុបលើកទី២

2014-10-14 16:24:54
ចំនួនមតិ 0 | ចំនួនចែករំលែក 0

ចន្លោះមិនឃើញ

អាចជាតួលេខច្រើនបំផុត ក្នុងរយៈពេល១០ ឆ្នាំចុងក្រោយនេះ គឺមានបេក្ខជនជិត ១ ម៉ឺននាក់ បានបោះបង់ចោលការប្រលងសញ្ញាបត្រ មធ្យម សិក្សាទុតិយភូមិ(បាក់ឌុប)។ ការបោះបង់ដ៏ច្រើននេះ បានកើតឡើង ខណៈក្រសួងអប់រំ កែទម្រង់ស៊ីជម្រៅលើវិស័យអប់រំ ពិសេសការប្រលងបាក់ឌុបតែម្តង។

លោក រស់ សាលីន មន្រ្តីអ្នកនាំពាក្យក្រសួងអប់រំយុវជន និងកីឡា បានប្រាប់ Sabay ថា មានបេក្ខជន ៧០៨៣ នាក់ នៅទូទាំងប្រទេសបានបោះបង់ចោលការប្រលងបាក់ឌុបលើកទី២ នេះ។ ការប្រលងបាក់ឌុបលើកទី២ នេះមានបេក្ខជនប្រលង ៦៧០០០ នាក់។

ចំនួនអវត្តមានដែលមានរហូតដល់ ១០ % នៃចំនួនបេក្ខជនសរុប ត្រូវបានលោក រស់ សាលីន បន្ថែមថា អ្នកទាំងនោះអាចមានសមត្ថភាពទាប ឬដោយប្រការណាមួយ ដែលយើងមិនអាចដឹង។ តែទោះជាយ៉ាងណាការប្រលងមួយថ្ងៃកន្លងមកគឺបានប្រព្រឹត្តិទៅល្អប្រសើរទាំងបច្ចេកទេស រួមទាំងសន្តិសុខសណ្តាប់ធ្នាប់ ពោលមិនមានភាតុភាពអ្វីធំដុំ រំខានដល់ការប្រលងឡើយ ។ លោកថា បេក្ខជនមានស្មារតីមុះមុត និងប្រឹងប្រែងប្រលង មិនពឹងផ្អែកលើព្រុយ៉ុងនោះទេ។ "នេះគឺជាការវិវឌ្ឍន៍មួយយ៉ាងល្អប្រសើរ ព្រោះការប្រលងលើកទី២នេះគ្មានការជ្រួលច្របល់លើការបែកធ្លាយវិញ្ញាសា ឬសំណៅឯកសារនោះទេ”។

ជុំវិញបញ្ហានេះ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជបានថ្លែងថា នេះគឺជាចំនួនអវត្តមានដ៏ច្រើនមិនធ្លាប់មានពីមុនមក ដោយសារបេក្ខជនទាំងអស់នោះ មិនមានទំនុកចិត្តលើសមត្ថភាពខ្លួន។ ប៉ុន្តែលោកគាំទ្រការកែទម្រង់របស់ក្រសួងអប់រំ ទោះការកែទម្រង់នេះរាងយឺតពេលបន្តិចក្តី ព្រោះនៅឆ្នាំ២០១៥ ពេលអាស៊ានធ្វើសមាហរណ៍កម្ម យើងទាមទារការប្រកួតប្រជែងខ្លាំងណាស់។

ការប្រលងបាក់ឌុបមានបេក្ខជន ៦៧០០០ នាក់ ដោយចែកជា ១១៧ មណ្ឌល។ ចំណែកលទ្ធផលប្រលងនឹងប្រកាសនៅថ្ងៃទី៤ ខែវិច្ឆិកា ឆ្នាំ២០១៤៕

អានអត្ថបទ៖ បាក់ឌុបព្រឹកមិញបេក្ខជនភាគច្រើនធ្វើមិនបាន ៥០% ទេ! ចុចត្រង់នេះ

អត្ថបទ៖មៃ សុខលីម