តន្ត្រីករ ចឹក ស៊ីណាត ជិះម៉ូតូពីភ្នំពេញទៅបង្រៀនភ្លេងខ្មែរតាមខេត្ត

2015-07-29 12:00:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែស្រលាញ់ និង មិនចង់ឱ្យបាត់បង់ទៅ តន្ត្រីករបុរាណវ័យក្មេង ចឹក ស៊ីណាត បានជិះម៉ូតូពីភ្នំពេញទៅបង្រៀនឧបករណ៍ភ្លេងខ្មែរ ដល់ក្មេងៗរស់នៅតាមបណ្ដាខេត្ត ដោយមិនខ្លាចនឿយហត់។

លោកបានប្រាប់ Sabay ថា ការសម្រេចដូច្នេះ ក៏ព្រោះតែមានក្ដីសង្ឃឹមថា កូនអ្នកភូមិទាំងនោះ អាចបន្តផ្សព្វផ្សាយភ្លេងខ្មែរ និងវប្បធម៌ខ្មែរបានកាន់តែច្រើនកុំឱ្យបាត់បង់ទៅ។ លោកនិយាយថា៖ “ខ្ញុំដើរសួរចាស់ៗទៅ ភ្លេងខ្មែរខ្លះពួកគាត់អត់ស្គាល់ទេ ចុះទម្រាំក្មេងៗវិញ។ តើពួកគេរំពឹងអីវិញ?"។

តន្ត្រីកររូបនេះ បន្ថែមថា បច្ចុប្បន្នកំពុងបង្រៀនក្មេងៗនៅខេត្តកំពង់ស្ពឺ ព្រោះនៅជិតរាជធានីភ្នំពេញងាយស្រួលជិះម៉ូតូទៅមក។ ហើយជាគម្រោងបន្ទាប់លោក នឹងទៅបង្រៀននៅខេត្តពោធិ៍សាត់បន្តទៀតតាមគម្រោងរបស់អ្នកស្រី កែវ ច័ន្ទបូរណ៍ ដែលសាងសាលាទីនោះ។ ដោយឡែក ខេត្តសៀមរាបជាទឹកដីកំណើត ក៏ស្ថិតនៅក្នុងគម្រោងដូចគ្នាដែរ។

អ្នកប្រគំបទ" See You Again” ដោយឧបករណ៍ភ្លេងបុរាណរូបនេះ ក៏មានពេលវេលាខ្លះ បង្រៀនសិស្សនៅផ្ទះរបស់លោកនៅភូមិ បាយាប សង្កាត់ភ្នំពេញថ្មី។

អតីតកូនសិស្សរបស់ព្រឹទ្ធាចារ្យ សុខ ឌុច ខាងលើអះអាងថា ក្មេងៗទាំងនោះសុទ្ធសឹងតែមានទេពកោសល្យសិល្បៈ និង មានការខិតខំប្រឹងប្រែងរៀន។ ប្រការនេះ ធ្វើឱ្យលោកមានទឹកចិត្តបង្រៀនផ្ទេរចំណេះដឹងភ្លេងខ្មែរប្រកបដោយក្ដីសង្ឃឹម។ លោកអះអាងថា៖" សង្ឃឹមថា ក្មេងទាំងអស់បន្តពីខ្ញុំ និងធ្វើឱ្យប្រទេសយើងមានវប្បធម៌របស់ខ្លួនពេញលេញ ហើយមិនចម្លងបរទេសទេ"។

ចឹក ស៊ីណាត មានវ័យ ២៨ ឆ្នាំហើយ និង ចាប់ផ្ដើមបង្រៀនសិស្សផ្នែកឧបករណ៍តន្ត្រីបុរាណជាច្រើនប្រភេទតាំងពីឆ្នាំ ២០០៩ មកម្ល៉េះ តាមរយៈអង្គការនានា។ ចឹក ស៊ីណាត ចាត់ទុកថា នេះជាការបន្តវេនពីលោកគ្រូរបស់លោកជាច្រើនរូបធ្លាប់បានផ្ទេរចំណេះដឹងផ្នែកតន្ត្រីបុរាណនេះ រួមមានព្រឹទ្ធាចារ្យ សុខ ឌុច ជាដើម។ តន្ត្រីកររូបនេះអះអាងថា នឹងមិនធ្វើឱ្យលោកគ្រូទាំងអស់ ខកបំណងឡើយ៕

អានអត្ថបទ៖ អ៊ីវ៉ា ជម្រះទំនាក់ទំនងនាង និងតារាកំប្លែង ប៉ុមពុយ

អានអត្ថបទ៖ ឯក សុវណ្ណរ័ត្ន ថតតួឆ្នាសលើកដំបូង