សៅ សុខា តែងតាំង ជួន ណារិន្ទ ដឹកនាំជម្រើសជាតិទៅ Suzuki Cup 2014 ខ្លាចមានបញ្ហាមិនប្រក្រតីកើតឡើងទៀត

2014-09-16 22:25:39
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកនាយឧត្ដមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានសម្រេចតែងតាំង លោកឧត្ដមសេនីយ៍ត្រី ជួន ណារិន្ទ ស្នងការរងនៃស្នងការដ្ឋាននគរបាលរាជធានីភ្នំពេញ និង ជាសមាជិកគណៈកម្មាធិការប្រតិបត្តិសហព័ន្ធកីឡាបាល់ទាត់កម្ពុជា ឱ្យធ្វើជាជាប្រធានប្រតិភូដឹកនាំក្រុមកីឡាករជម្រើសជាតិកម្ពុជា ទៅចូលរួមប្រកួតជម្រុះពានរង្វាន់បាល់ទាត់ធំប្រចាំតំបន់អាស៊ាន AFF Suzuki Cup 2014។

លោក ជួន ណារិន្ទ (រាប់ពីស្ដាំទី៣)

ការសម្រេចបែបនេះដោយផ្អែកតាមលិខិតលេខ ៤៣២/១៤ ស.ណ/ស.ប.ក ចុះថ្ងៃទី ៩ កញ្ញា ចេញដោយលោក សៅ សុខា ផ្ទាល់បានបញ្ជាក់យ៉ាងច្បាស់ថា យោងតាមការសម្រេចរបស់អង្គប្រជុំគណៈកម្មាធិការប្រតិបត្តិសហព័ន្ធកីឡាបាល់ទាត់កម្ពុជា កាលពីថ្ងៃទី ២ កញ្ញា ឆ្នាំ ២០១៤ និង ជាសេចក្ដីត្រូវការចាំបាច់របស់សហព័ន្ធ។

គោលបំណងសំខាន់នៃការតែងតាំងនេះគឺដើម្បីជំរុញការលើកទឹកចិត្ត ការពង្រឹងវិន័យ និង សន្តិសុខ របស់ក្រុមជម្រើសជាតិ ក្នុងយុទ្ធនាការប្រកួតជម្រុះពានរង្វាន់មួយនេះ។

ការសម្រេចបែបនេះរបស់ថ្នាក់ដឹកនាំកំពូលសហព័ន្ធកីឡាបាល់ទាត់កម្ពុជា ទំនងជាចង់ជម្នះពាក្យចចាមអារ៉ាមមិនប្រក្រតីកើតមាននាពេលកន្លងមកក្នុងក្រុមបាល់ទាត់ជម្រើសជាតិកម្ពុជា បន្ទាប់ពីសម្រេចដាក់ពិន័យព្យួរកីឡាករចំនួន ៣ នាក់រួមមាន កែវ សុខង៉ន, ទុំ សារ៉ាយ និង សុខ រិទ្ធី មិនឱ្យចូលរួមសកម្មភាពបាល់ទាត់ថ្នាក់ជាតិចំនួន ៦ ខែ និង សកម្មភាពបាល់ទាត់អន្តរជាតិចំនួន ១២ ខែ កាលពីថ្ងៃទី ១៣ ឧសភា ឆ្នាំ ២០១៤ កន្លងទៅ៕

ថ្នាក់ដឹកនាំក្នុងសមាជិកប្រតិបត្តិរបស់សហព័ន្ធបានទៅចូលរួមដឹកនាំផ្ទាល់បែបនេះហើយ តើអាចបង្កើនទំនុកចិត្តដល់ក្រុមជម្រើសជាតិកម្ពុជា បានកម្រិតណា?

ព័ត៌មានកីឡាជាច្រើនទៀតសូមចុចទីនេះ...

អត្ថបទ៖ ម៉ឺន រស្មី