Mourinho៖ ចាញ់ Man City ជាលទ្ធផលក្លែងក្លាយ Chelsea លេងល្អជាងនៅតង់ទី២

2015-08-17 15:52:27
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការ Jose Mourinho របស់ក្រុម Chelsea បានលើកឡើងថា លទ្ធផលក្រុមរបស់លោកចាញ់ Manchester City ៣-០ គឺជាលទ្ធផលក្លែងក្លាយ ហើយតោខៀវគួរតែទទួលបានលទ្ធផលល្អជាងនេះ ព្រោះនៅតង់ទី២ ក្រុមរបស់លោកលេងបានល្អជាង។

៣គ្រាប់របស់ម្ចាស់ផ្ទះយប់មិញនេះ គឺរកបានដោយ ខ្សែប្រយុទ្ធ Sergio Aguero បានទម្លុះសំណាញ់ទីរបស់ Asmir Begovic បានសម្រេចនៅនាទី៣១ មុនពេលខ្សែការពារប្រធានក្រុម Vincent Kompany តែតបន្ថែមគ្រាប់ទី២នាទី៧៩ ខណៈខ្សែបម្រើនាំលេង Fernandinho ជាអ្នករកគ្រាប់ទី៣នៅ៥នាទីមុនចប់ការប្រកួត។

អ្នកចាត់ការរហស្សនាម "Special One” បានប្រាប់ដល់ Sky Sports ថា៖ "ក្រុមដែលល្អបំផុតនៅតង់ទី២ គឺជា Chelsea ប្រាកដណាស់។ យើងលំបាកបន្តិចនៅតង់ទី១ យើងមិនបានបង្កើតឱកាសច្រើន ហើយអ្នកចាំទីរបស់យើងជួយសង្គ្រោះបាន២ទៅ៣លើកដែរ។ ប៉ុន្តែនៅតង់ទី២ គឺខុសគ្នា បើ ១-០ រហូតដល់នាទី៧០ ហើយលទ្ធផលចប់ ៣-០ គឺពិតជាលទ្ធផលក្លែងក្លាយ។ Chelsea គឺជាក្រុមល្អបំផុត នៅពេញតង់ទី២"។

បុរសសញ្ជាតិព័រទុយហ្គាល់ បានដូរប្រធានក្រុម John Terry ចេញក្រោយចប់តង់ទី១ និងបានធ្វើឲ្យគ្រប់គ្នាមានការភ្ញាក់ផ្អើលខ្លាំង ព្រោះថានេះជាលើកដំបូងហើយ ដែលខ្សែការពារកណ្ដាល ត្រូវអ្នកចាត់ការរូបនេះដូរចេញ ក្នុង១៧៧ប្រកួត។ យ៉ាងណាក្ដី លោក Mourinho ក៏បកស្រាយថា ការដូរ Terry ចេញគឺជាយុទ្ធសាស្ត្ររបស់លោក ហើយរូបគេនៅតែជាប្រធានក្រុមដ៏ល្អ៕

ចុះប្រិយមិត្តយល់ថា Chelsea លេងល្អជាងនៅតង់ទី២ ដូច Mourinho លើកឡើងដែរទេ?

-ចុចអាន៖ Man City បំបាក់ Chelsea ៣-០ តែ Pellegrini ថាគួរតែស៊ីបាន៣ទៀត

ប្រែសម្រួល៖ វិន ជីវ័ន្ត ប្រភព៖ mirror