លែងលះប្ដីភ្លាម ម៉ៅ ស៊ីណាត ទៅកែសម្ផស្សអស់១២៥០០ដុល្លារ

2015-08-21 20:31:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងទើបនឹងលែងលះ ប្ដី អ្នកនាង ម៉ៅ ស៊ីណាត បានសារភាពថា បានទៅកែសម្ផស្សអស់ទឹកប្រាក់រហូតដល់ទៅ១២៥០០ ដុល្លារអាមេរិក។

លើដងខ្លួនដែលអ្នកនាងម៉ៅ ស៊ីណាត សម្រេចចិត្តកែនោះ មានដូចជា ច្រមុះ ថ្ពាល់ និង ថ្ងាស នេះបើតាមការរៀបរាប់របស់សាមីខ្លួនប្រាប់Sabay ។ អ្នកមេម៉ាយកូន១រូបនេះបានថ្លែងថា មូលហេតុដែលនាំឲ្យសម្រេចចិត្តកែដូច្នេះ ក៏ព្រោះតែអ្នកនាងមិនសូវពេញចិត្តនឹងសម្រស់ដែលមានបច្ចុប្បន្ន ហើយចង់ឲ្យនៅក្មេងជាងនេះ ក៏សម្រេចចិត្តធ្វើតែម្ដងទៅ។ "ចង់ស្អាតបានធ្វើ តែឥឡូវហ្នឹងបងកែតែច្រមុះសិន ហើយមិនទាន់រួចរាល់ទេ ព្រោះ Doctor ជាប់ទៅកូរ៉េ អាទិត្យក្រោយបានមកវិញ រួចពីច្រមុះបានយើងកែកន្លែងផ្សេងៗទៀត" ។

ចំពោះមន្ទីរពេទ្យដែលអ្នកនាងម៉ៅ ស៊ីណាតទៅធ្វើនោះ ត្រូវបានតារាចម្រៀងស្រីរូបនេះប្រាប់ថា មិនបានទៅធ្វើនៅក្រៅប្រទេសនោះទេ ពោលគឺធ្វើនៅមជ្ឈមណ្ឌលកែសម្ផស្សមួយក្នុងរាជធានីភ្នំពេញ ដែលគេធ្វើតាមស្តង់ដារកូរ៉េទាំងអស់ ផ្សំនឹងមជ្ឈមណ្ឌលនេះបញ្ចុះថ្លៃពិសេសឲ្យនាងផង។

ចំពោះពេលវេលាថា ធ្វើរួចរាល់នៅពេលណានោះ តារាចម្រៀងស្រីដែលមានអតីតប្ដីជាមេធាវីល្បីឈ្មោះ ហើយទើបតែចែកផ្លូវគ្នាកាលពីពេលថ្មីៗនេះបន្ទាប់ពីរស់នៅជាមួយអស់ពេល១៦ឆ្នាំនោះថ្លែងថា មិនទាន់អាចកំណត់បានទេ ព្រោះដូចដឹងស្រាប់ កែច្រើនកន្លែងបែបនេះគឺត្រូវប្រើពេលយូរបន្តិចហើយ៕