ម្ដាយ អូនម៉ី ព្រួយបារម្ភរឿងការសិក្សារបស់កូន

2015-08-25 21:07:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ដាយ អូនម៉ី មានការព្រួយបារម្ភចំពោះអនាគតរបស់កូនស្រី ខណៈនាងកំពុងមមាញឹកក្នុងការងារសិល្បៈជាងពេលមុន ដោយត្រូវសុំច្បាប់សាលាជាញឹកញាប់ ដើម្បីទៅចូលរួមថតកុន ឬថតស្ប៉តពាណិជ្ជកម្មជាដើម។

អ្នកស្រី សោម រចនា ប្រាប់ថា៖ “ ឆ្នាំនេះគាត់រវល់ការងារសិល្បៈច្រើនពេកទៅ រៀនអត់សូវដិតដល់ ត្រូវសុំច្បាប់គ្រូ ជួនកាលប៉ះចំថ្ងៃប្រលងក៏មានដែរ ខ្ញុំនិយាយប្រាប់ត្រង់ហ្មង!"។ អ្នកស្រីបន្តថា មានបំណងចង់ឱ្យ អូនម៉ី បញ្ចប់បរិញ្ញាបត្រពីសាកលវិទ្យាល័យណាមួយនៅក្នុងស្រុក និងបានឃើញអនាគតដ៏ល្អរបស់កូន។

ប៉ុន្តែ ស្ថិតក្នុងភាពស្រពិចស្រពិលនៅឡើយទេ ព្រោះ អូនម៉ី ទើបបញ្ចប់ថ្នាក់ ១១ នៅវិទ្យាល័យបាក់ទូកប៉ុណ្ណោះ ខណៈកូនស្រីរូបនេះបានចំណាយពេលលើការងារសិល្បៈច្រើនជាងការរៀនសូត្រ។

ទោះបីជាយ៉ាងណាស្ត្រីវ័យ ៤០ ឆ្នាំរូបនេះបញ្ជាក់ថា កន្លងមកមិនដែលស្ដីបន្ទោស ឬហាមប្រាមចំពោះការសម្រេចចិត្តរបស់ អូនម៉ី ជាកូននោះទេ។ អ្នកស្រីបន្តថា ការលះបង់គ្រប់បែបយ៉ាង ក៏ព្រោះតែការស្រលាញ់ ហើយខ្លាចកូនស្រីមិនសប្បាយចិត្ត ឈានដល់គិតក្នុងផ្លូវមិនល្អ។ ម្ដាយរូបនេះតែងស៊ូទ្រាំទៅណាមកណាជាមួយកួនស្រីជានិច្ច ដោយមិនទុកចិត្តចំពោះមជ្ឈដ្ឋានខាងក្រៅនោះទេ ខណៈកូនស្រីនៅក្មេង មិនទាន់ស្គាល់ការរាក់ជ្រៅ ។

អ្នកស្រីបញ្ជាក់ថា៖" ខ្ញុំចង់ឱ្យកូនស្រី នៅក្នុងសិល្បៈរៀនសូត្របានច្រើន ប៉ុន្តែបើគាត់រវល់សិល្បៈហើយមិនអាចបន្តរៀនទេ ក៏មិនដឹងធ្វើម៉េចដែរ ព្រោះម្ដាយបានប្រឹងប្រែងហើយ"។ អតីតសិល្បការិនីរូបនេះបន្ថែមថា គ្រប់យ៉ាងស្ថិតលើការសម្រេចចិត្តរបស់ អូនម៉ី ជាកូននៅឡើយ។ ទោះបីជាការសិក្សាមានការធ្លាក់ចុះពិតមែន ប៉ុន្តែអ្នកម្ដាយយុវតីរូបនេះអះអាងថា កូនស្រីមិនដែលមានបំណងបោះបង់ការសិក្សាឡើយ៕

អានអត្ថបទ៖ លី ច័ន្ទសីហា អវត្តមានគូស្នេហ៍ដែលជាកូនមន្ត្រីធំក្នុងថ្ងៃពិសេស

អានអត្ថបទ៖ មើលតារាស្រី ៧ ដួងនេះ នរណាស្លៀកឯកសណ្ឋានកូនសិស្សស្អាតជាងគេ?

អត្ថបទ៖ សំ ជំនាញ