ភោជនីយដ្ឋានគុក មានពិតនៅចិន

2015-08-26 22:50:43
ចំនួនមតិ 0 | ចំនួនចែករំលែក 0

ចន្លោះមិនឃើញ

អាចជាភោជនីយដ្ឋានដ៏ចម្លែកមួយនៅប្រទេសចិន ព្រោះការរចនាកន្លែងទទួលទានដូចគ្នានឹងស្ថានភាពជាក់ស្ដែងក្នុងពន្ធនាគារ ដែលទាក់ទាញអារម្មណ៍មនុស្សជាច្រើនឲ្យចូលទៅភ្លក់រសជាតិ។

សារព័ត៌មានក្នុងស្រុកចិន CFP បានដាក់បង្ហាញភោជនីយដ្ឋានមួយនៅខេត្ត Jilin ភាគខាងជើងប្រទេសចិន ដែលតុបតែងហាងអាហាររបស់ខ្លួន រួមទាំងប្រដាប់ប្រដាប្រើប្រាស់ និងរបស់របរដាក់តាំង ដូចនៅក្នុងពន្ធនាគារ។

មិនត្រឹមតែរបស់របរប្រើប្រាស់នោះទេ មុខម្ហូបពិសេសមួយចំនួនក៏ត្រូវបានចម្អិនឡើងដូចអាហារក្នុងពន្ធនាគារប្រទេសចិន តួយ៉ាង Combo meal ដែលជានំប៉័ងលាយពោតចំហុយ។ ចំណែកឯអ្នកបម្រើនៅក្នុងភោជនីយដ្ឋានវិញ ស្លៀកពាក់ដូចទៅនឹងឆ្មាំគុក។

ក្នុងបទសម្ភាសន៍ជាមួយសារព័ត៌មាន ម្ចាស់ហាងបានឲ្យដឹងថា ការធ្វើបែបនេះគឺដើម្បីទាក់ទាញភ្ញៀវឲ្យចូលញ៉ាំ និងពញ្ញាក់ស្មារតីរបស់ពួកគេឲ្យជៀសឆ្ងាយពីការប្រព្រឹត្តបទល្មើសនានា៕