ឧកញ៉ា ឃ្លោក ចង់បានងារមួយបន្ថែមទៀត

2015-08-27 15:06:38
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងនាយ ឃ្លោក ដែលបានឡើងងារ ឯកឧត្ដម ហើយទើបតែទទួលបានងារជា ឧកញ៉ា មួយបន្ថែមទៀតកាលពីពេលថ្មីៗនេះ បានប្រាប់ Sabay ថា លោកចង់បានងារមួយបន្ថែមទៀតនៅក្នុងសមាគមសិល្បករខ្មែរ។

មូលហេតុដែលនាំឲ្យឧកញ៉ា ឃ្លោក ចង់បានមុខងារមួយទៀតនៅក្នុងសមាគមសិល្បករខ្មែរ ក៏ព្រោះតែនាយចង់ចូលរួមជាមួយសមាគម ដើម្បីជួយដល់សិល្បករសិល្បការិនីចាស់ៗ ដែលកំពុងជួបបញ្ហាជីវភាព ឬសុខភាពជាដើម។ "ខ្ញុំបច្ចុប្បន្នអាចមានលទ្ធភាពជួយពួកគាត់ តែខ្ញុំចង់ឲ្យសមាគមតែងតាំងតំណែងអ្វីមួយឲ្យសមទៅនឹងកិត្តិយសខ្ញុំ ទើបខ្ញុំចូលរួមជាមួយ "។ ឧកញ៉ា ឃ្លោក លើកឡើង។

តំណែងដែល លោក ឧកញ៉ា ឃ្លោក ចង់បាននោះ មិនមែនជាប្រធានឬអនុប្រធានសមាគមសិល្បករនោះឡើយ។ ផ្អែកតាមការលើកឡើងរបស់អតីតតារាកំប្លែងក្នុងក្រុមនាយកុយនេះ គឺលោកចង់ធ្វើប្រធានកិត្តិយសក្នុងសមាគមសិល្បករខ្មែរ ។ "ត្រឹមប្រធាន កិត្តិយសអីបានហើយ ខ្ញុំពេញចិត្តទៅជួយ" ។ នាយឃ្លោក បញ្ជាក់បន្ថែម។

ជុំវិញការលើកឡើងនេះ លោក សុះ ម៉ាច ប្រធានសិល្បករខ្មែរបានសម្ដែងអារម្មណ៍សប្បាយរីករាយជាខ្លាំង នៅពេលដែលទទួលដំណឹងនេះ ដោយលោកប្រាប់ថានឹងទាក់ទងទៅនាយឃ្លោកផ្ទាល់ដើម្បីបញ្ជាក់លំអិតបន្ថែមទៀត។ "ខ្ញុំកំពុងតែត្រូវការអ្នកជួយផង រឿងនេះខ្ញុំនឹងយកដាក់ប្រជុំជាមួយក្រុមប្រឹក្សាភិបាល ដើម្បីសម្រេចនៅសប្ដាហ៍ក្រោយ ហើយខ្ញុំគិតថា ក្រុមប្រឹក្សានឹងធ្វើតាមសំណើរបស់គាត់"។ លោក សុះ ម៉ាច ថ្លែង។

បច្ចុប្បន្នតំណែងជាប្រធានកិត្តិយសសមាគមសិល្បករខ្មែរដែល នាយ ឃ្លោក ចង់បាននេះ ស្ថិតនៅលើលោក អៀង ស៊ីធុល។ តែបើតាមការបញ្ជាក់លោក សុះ ម៉ាច ឆាប់ៗនេះក្រុមប្រឹក្សាភិបាលសមាគមសិល្បករ គ្រោងរើរុះ និងបន្ថែមតំណែងមួយចំនួនទៀតក្នុងសមាគម។

ប្រសិនបើ នាយ ឃ្លោក ព្រមចូលជាមួយសមាគមសិល្បករពិតមែននេះ នាយអាចមកកាន់តួនាទីអនុប្រធានកិត្តិយស ត្បិតអីតំណែងនេះ នៅមិនទាន់មានអ្នកមកកាន់នៅឡើយ។ ចំពោះតំណែងថ្មីដែលសមាគមគ្រោងបង្កើតនោះ គឺទីប្រឹក្សាសមាគមសិល្បករ ដែលតំណែងនេះ លោក សុះ ម៉ាច បញ្ជាក់ថា ត្រូវមនុស្សដែលមានសមត្ថភាពច្រើនមកធ្វើការជាមួយ។

ចម្លើយពិតថា ឧកញ៉ា ឃ្លោក នឹងទទួលបានតំណែងអ្វីជាក់ច្បាស់ពីសមាគមសិល្បករខ្មែរនោះ នៅមិនទាន់ច្បាស់នៅឡើយទេ ដោយរង់ចាំលោក សុះ ម៉ាច ទៅជួបចរចាជាមួយនាយឃ្លោកសិន៕

អានអត្ថបទ៖ សាន ផានិត ត្រូវប៉ាន់នៅមណ្ឌលគីរី អានអត្ថបទ៖ ភាពយន្តបុរាណខ្មែរ ២ សាច់រឿងស្រដៀងគ្នានឹងរឿងហូលីវូដ

អត្ថបទ៖ ខុត សីហា