សាន ផានិត ត្រូវប៉ាន់នៅមណ្ឌលគីរី

2015-08-26 20:30:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់បទ "ទូរសព្ទប្រាប់ផង" សាន ផានិត ធ្លាប់ធ្លាក់ខ្លួនដុនដាបនាពេលកន្លង បច្ចុប្បន្ននេះចាប់ផ្ដើមមានជីវភាពប្រសើរជាងមុនហើយ ដោយលោកកំពុងតែកាក់កបជាមួយការងារ និងមុខជំនួញលើទឹកដីខេត្ត មណ្ឌលគីរី ជាទីដែលលោក និងភរិយារស់នៅបច្ចុប្បន្ន ។

មុខជំនួញ និងការងារ ដែល លោក សាន ផានិត កំពុងតែធ្វើលើទឹកដីភូមិភាគ ឦសាននៃប្រទេសកម្ពុជានេះមាន ហាងលក់សំលៀកបំពាក់ ជូនភ្ញៀវដើរលេង ព្រមទាំងមានរថយន្ត ផងដែរ ។

តារាចម្រៀងធ្លាប់សាងកេរ្តិ៍ឈ្មោះដល់ចំណុចកំពូលរូបនេះ បានរៀបរាប់ឲ្យដឹងថា ចាប់ផ្ដើមមករស់នៅលើទឹកដីខេត្ត មណ្ឌលគីរីភ្លាម ដំបូងឡើយបានធ្វើជាគ្រូបង្រៀនភាសាអង់គ្លេសឲ្យអង្គការមួយ និងបើកហាងលក់សំលៀកបំពាក់មួយកន្លែងក្បែរនោះ ដោយឲ្យភរិយាជាអ្នកមើលការខុសត្រូវ។ ធ្វើជាគ្រូបង្រៀនបានមួយរយៈពេលខ្លី លោកក៏បានផ្លាស់មកធ្វើការឲ្យរមណីយដ្ឋាន និងសណ្ឋាគារលើភ្នំ ដែលថៅកែរមណីយដ្ឋាននេះ គឺជាបងប្អូនធម៌នឹងគ្នា។

"កន្លែងខ្ញុំធ្វើរាល់ថ្ងៃហ្នឹង មាន រីសតផង ទិញលក់ដីផង ខ្ញុំធ្វើឲ្យគាត់ ខ្ញុំមានភាគលាភ ហើយមានគម្រោងទិញដីកន្លែងខ្លះ ខ្ញុំមានភាគហ៊ុនតិចតួចផងដែរ" សាន ផានិត បញ្ជាក់បន្ថែម។

បច្ចុប្បន្ននេះ សាន ផានិត មាននាទីជាអ្នកគ្រប់គ្រងទូទៅនៃ "រមណីយដ្ឋាន និងសណ្ឋាគារលើភ្នំ" ជាមួយគ្នានោះ លោកក៏ជាអ្នកជូនភ្ញៀវដើរលេង ហើយមានរថយន្តផ្ទាល់ខ្លួន១គ្រឿងសម្រាប់ជួលឲ្យភ្ញៀវផងដែរ។ "ឡាននេះខ្ញុំទើបតែទិញពីបង ថ្លៃ២ម៉ឺន ហើយខ្ញុំជួលឲ្យភ្ញៀវ១ថ្ងៃ ៧០ បូកទាំងខ្ញុំជូនភ្ញៀវដើរលេងផង បាន១ថ្ងៃ១០០ អីចឹងដែរ" លោក សាន ផានិត រៀបរាប់ពីចំណូលដែលរកបាន។

ចំពោះ ហាងលក់សំលៀកបំពាក់ដែលមានយីហោ " តារាភ្នំពេញលេខ១" ភរិយាជាអ្នកមើលការខុសត្រូវវិញ លោកប្រាប់ថា អាចរកបានចន្លោះពី៣០ម៉ឺន ទៅ ៥០ម៉ឺនរៀល ក្នុងមួយថ្ងៃផងដែរ។ ជាមធ្យម អតីតតារាចម្រៀងប្រចាំរស្មីស្ទឹងសង្កែរូបនេះនិយាយថា អាចរកចំណូលជូនក្រុមគ្រួសារបាន១០០០ ជាងទៅ ២០០០ ដុល្លារ ក្នុងមួយខែ។

នៅពេលដែលជីវិតចាប់ផ្ដើមមានការរីកចម្រើនជាបន្តបន្ទាប់លើទឹកដី មណ្ឌលគីរីបែបនេះ តារាចម្រៀងធ្លាប់មានប្រវត្តិប្រើប្រាស់គ្រឿងញៀន ប៉ុន្តែអាចកាត់ផ្ដាច់បានដោយជោគជ័យរូបនេះ មិនចង់ទៅរកស៊ីឯណាឆ្ងាយពីខេត្តមួយនេះឡើយ ដោយលោកលើកឡើងថា ទឹកដីមណ្ឌលគីរី គឺជាឱកាសមាសសម្រាប់លោកបច្ចុបុ្បន្ននេះ។

ហាងលក់សំលៀកបំពាក់ សាន ផានិត និងភរិយា(រូបថត៖ FB សាន ផានិត)

ដោយឡែក ពាក់ព័ន្ធទៅនឹងអាជីពសិល្បៈឯណេះវិញ តារាចម្រៀងទើបទទួលបានកូនប្រុសវ័យជាង៣ខែរូបនេះ មិនបោះបង់អាជីពដែលធ្វើឲ្យមហាជនស្គាល់លោកឡើយ ក្នុងនោះ ដើម្បីឲ្យទស្សនិកជននៅចាំមុខ ជារឿយៗ លោកតែងតែឡើងច្រៀងនៅតាមស្ថានីយទូរទស្សន៍ជាបន្តបន្ទាប់ តាមការអញ្ជើញពីអ្នកគ្រប់គ្រងកម្មវិធី៕

អានអត្ថបទ៖ ប៉ុបពីថា ផ្លាស់ប្ដូរសង្សារច្រើនគឺមានមូលហេតុ អានអត្ថបទ៖ ម្ដាយ អូនម៉ី ព្រួយបារម្ភរឿងការសិក្សារបស់កូន អត្ថបទ៖ ខុត សីហា