ក្រោយមានរឿងជាមួយ ចំរុង ឥឡូវ អ៊ិន សុភិន ឲ្យកូនស្រីការជាមួយ ប៉ែន តុលា ចុងឆ្នាំជាកំហិត

2015-08-31 20:40:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយមានបញ្ហាជាមួយនឹង ប៉ែន ចំរុង ប៉ុន្មានថ្ងៃមុន អ៊ិន សុភិន ចាងហ្វាងផលិតកម្មមហាហង្សបង្ខំកូនស្រីឲ្យការជាមួយ ប៉ែន តុលា អតីតគូដណ្ដឹងកូនស្រីចុងឆ្នាំនេះជាកំហិត ក្នុងនោះលោកប្រាប់ថាអត់ខ្វល់ទោះក្នុងលក្ខខណ្ឌអ្វីក៏ដោយ។

អ៊ិន សុភិន បង្ហើបដូច្នេះ ខណៈនៅក្នុងថ្ងៃធ្វើសន្និសីទកាសែតកាលពីថ្ងៃ២៧សីហាកន្លងទៅ ដែលគ្រានោះលោកបាននិយាយសរសើរ តារាសម្តែង ប៉ែន តុលា ថាជាមនុស្សល្អ និងនៅតែចាំព្រមធ្វើគ្រប់បែបយ៉ាងដើម្បី ដាលីស ផ្ទុយពី ប៉ែន ចំរុង ដែលមិនបានធ្វើអ្វីមួយសម្រាប់គ្រួសារលោកសោះ តែមានតែការកេងប្រវ័ញ្ចពីលោកជានិច្ចទៀត។ ដូច្នេះហើយ លោកនៅតែបន្តឆន្ទៈថា ចង់ពួកគេរៀបការជាមួយគ្នាជានិច្ច។

"បើចំរុង គេស្រលាញ់កូនខ្ញុំពិត គេច្បាស់ជាហ៊ានលះបង់អ្វីគ្រប់យ៉ាងដើម្បីមនុស្សដែលខ្លួនស្រលាញ់ ទោះមិនបានលះបង់លុយកាក់ ក៏លះបង់កម្លាំងកាយចិត្តដែរ។ ប៉ុន្តែ ចំរុង វិញមានគំនិតចង់តែកេងប្រវ័ញ្ចពីខ្ញុំជានិច្ចតាំងពីពេលវេលា លុយកាក់ ព្រមទាំងមើលងាយគ្រួសារខ្ញុំទៀតផង"។

ចាងហ្វាងខាងលើបន្ថែមទៀតថា៖ " មិនដូច តុលា ទោះបីជាពួកយើងបានផ្តាច់ពាក្យក៏ដោយ ប៉ុន្តែគេនៅតែមកជួយមើលខុសត្រូវផលិតកម្មពេលដែលទៅចុះថតនៅទីណាមួយ ឬក៏មានការសម្ពោធរឿងគឺ តុលា តែងតែមកជួយជានិច្ច"។

ដូច្នេះហើយ លោកសម្រេចថា នឹងឲ្យកូនស្រីរៀបការជាមួយតារាប្រុសរូបនេះ ចុងឆ្នាំនេះជាកំហិត ដោយមិនខ្វល់ថាមានបញ្ហាអ្វីឡើយ។ យ៉ាងណាមិញ ភិន សុដាលីស បានបង្ហោះវីដេអូឃ្លីបមួយធ្វើការប្រឆាំងនឹងឪពុករបស់នាង ដោយប្រាប់ថាដាច់ខាតមិនរៀបការជាមួយ ប៉ែន តុលា ឡើយ ដោយសម្អាងថា អតីតគូដណ្ដឹងរូបនេះ ជាមនុស្សធ្លាប់រៀបការ និងម្យ៉ាងប្រើអំពើហិង្សាមកលើរូបនាងទៀតក្រោយពេលភ្ជាប់ពាក្យរួច។

“ ខ្ញុំមិនអាចរួមរស់ជាមួយ តុលា បានទេ...រាល់ថ្ងៃប៉ាដាក់សំពាធមកលើខ្ញុំគ្រប់គ្រាន់ហើយ រហូតខ្ញុំក្លាយជាមនុស្សកើតជំងឺផ្លូវចិត្តហើយពួកគាត់អត់ទទួលយកភាពឈឺចាប់របស់ខ្ញុំទេ...ជាចុងក្រោយខ្ញុំចង់សួរថា តើរវាងកូនស្រីបង្កើតខ្លួនឯងជាមួយនឹង អ្នកដទៃតើប៉ាជ្រើសយកមួយណា?"។ ដាលីស ថ្លែង។

នាងបន្តទៀតថា កន្លងមកនាងបានតាមការផ្ចុងផ្ដើមរបស់អ្នកមានគុណម្ដងហើយ តែឃើញថាខុស។ ដូច្នេះពីពេលនេះ នាងសុំសម្រេចចិត្តខ្លួនឯងម្ដង ព្រោះនាងមានវ័យសមល្មមនឹងធ្វើការសម្រេចចិត្តខ្លួនឯងបានហើយ។

រឿងរ៉ាវផ្ទុះជម្លោះរវាងចាងហ្វាងផលិតកម្មមហាហង្សជាមួយ ប៉ែន ចំរុង បានកើតឡើងកាលពីថ្ងៃទី២៧ សីហា សប្ដាហ៍មុន ដោយ អ៊ិន សុភិន បានបើកសន្និសីទបង្ហាញថា លោកមានទំនាស់ រហូតដល់ប្រើហិង្សាជាមួួយតារាប្រុសរូបនេះថែមទៀតផង ក្រោយពីដឹងថាកូនស្រីខ្លួនលួចមានទំនាក់ទំនងជាមួយគ្នា។ ត្រលប់ទៅកាលពីថ្ងៃទី៣១ ខែមិនា ឆ្នាំ២០១៣ ភិន សុដាលីស និង ប៉ែន តុលា បានភ្ជាប់ពាក្យជាមួយគ្នាយ៉ាងឱឡារិក។ ប៉ុន្តែក្រោយមកមិនទាន់បានមួយឆ្នាំស្រួលបួលផង ពួកគេក៏បានបែកគ្នាវិញ។ ដោយឡែកមូលហេតុពេលនោះ គឺដឹងត្រឹមតែថា ពួកគេមានរឿងរ៉ាវរកាំរកូសនឹងគ្នា៕

រឿងរ៉ាវឪពុក ភិន សុដាលីស ទាត់៣ជើង ប៉ែន ចំរុង ទាក់ទងអត់បានតែបងប្រុសនិយាយជំនួស

ផ្ទុះរឿងឪពុក ភិន សុដាលីស ទាត់ ប៉ែន ចំរុង ៣ជើងយប់មិញ

អត្ថបទ៖ ថា ម៉ាលីដា