តារាច្រើនដួងទទួលប័ណ្ណសរសើរពីការអប់រំចរាចរណ៍
- 2015-08-31 17:49:00
- ចំនួនមតិ 0 | ចំនួនចែករំលែក 0
តារាច្រើនដួងទទួលប័ណ្ណសរសើរពីការអប់រំចរាចរណ៍
ចន្លោះមិនឃើញ
តារាចម្រៀង តារាកំប្លែង និងតារាសម្ដែងជាច្រើនដួងរបស់កម្ពុជា បានទទួលប័ណ្ណសរសើរ បន្ទាប់ពីពួកគេស្ម័គ្រចិត្តចូលរួមយុទ្ធនាការស្ដីពី “រួមគ្នាគោរពនិងអនុវត្តន៍ច្បាប់ចរាចរណ៍នៅកម្ពុជា”។
យុទ្ធនាការស្ដីពី “រួមគ្នាគោរព និងអនុវត្តន៍ច្បាប់ចរាចរណ៍នៅកម្ពុជា” ដែលផ្ចុងផ្ដើមដោយ Home Media សហការជាមួយក្រសួងព័ត៌មាន ក្រសួងមហាផ្ទៃ និងក្រសួងសាធារណការ និងដឹកជញ្ជូនមានតារាចូលរួមជាច្រើន ក្នុងនោះមានដូចជា លោក ខេមរៈ សិរីមន្ត លោក ខាន់ ជែមស៍ នាយ ចាប ចៀន កញ្ញា អ៊ុន អាលីហ្សា ជាដើម ដោយសិល្បករសិល្បការិនី ទាំងអស់ដែលបានចូលរួម ពួកគេមិនបានគិតប្រាក់នោះឡើយ។ ដូច្នេះហើយពួកគេទទួលបានប័ណ្ណសរសើរម្នាក់មួយៗ។
គ្រប់ខ្លឹមសារនៃបទចម្រៀង ក៏ដូចជាពាក្យពេចន៍ទាំងអស់ដែលពួកគេចូលរួម សុទ្ធតែបានលើកឡើង ទាក់ទងនឹងការអប់រំចរាចរណ៍ទាំងអស់។ លោក ខេមរៈ សិរីមន្ត ដែលធ្លាប់រងគ្រោះក្នុងគ្រោះថ្នាក់ចរាចរណ៍ បានស្នើពលរដ្ឋទាំងអស់ ធ្វើចរាចរណ៍តាមដងផ្លូវ ត្រូវតែគោរពច្បាប់ចរាចរណ៍ឲ្យបានល្អបំផុត ជាពិសេស សម្រាប់អ្នកជិះម៉ូតូ ត្រូវតែពាក់មួកសុវត្ថិភាពឲ្យបានត្រឹមត្រូវជាដាច់ខាត។
"ជីវិតមនុស្សយើងមិនមានលក់នៅលើទីផ្សារឡើយ រឿងគ្រោះថ្នាក់ចរាចរណ៍នេះ បើហ៊ានប្រហែសតែមួយភ្លែតនេះ ច្បាស់ជាមានមហន្តរាយធំជាក់ជាមុនខាន ដូចនេះសូមគោរពច្បាប់ឲ្យបានទាំងអស់គ្នា "សិរីមន្ត ថ្លែងទៅកាន់ទស្សនិកជននៅមុខមហោស្រពកោះពេជ្រ កាលពីចុងសប្ដាហ៍កន្លងទៅ បន្ទាប់ពីលោកច្រៀងបទ "គ្រោះថ្នាក់ចរាចរណ៍" របស់លោកចប់ ។
តាមការលើឡើងរបស់ Home Media យុទ្ធនាការស្ដីពី “រួមគ្នាគោរព និងអនុវត្តន៍ច្បាប់ចរាចរណ៍នៅកម្ពុជា” បានធ្វើឡើងតាំងតែពីដើមឆ្នាំ២០១៥ ។ យុទ្ធនាការមួយនេះក្រោមរូបភាពនៃការធ្វើសិក្ខាសាលា និងការប្រគំតន្ត្រីតាមបណ្ដាខេត្ត និងចុះអប់រំច្បាប់ចរាចរណ៍ នៅតាមសហគមន៍ជាដើម។ជាមួយគ្នានោះមានពលរដ្ឋជាច្រើនម៉ឺននាក់ ត្រូវបានទទួលពីការអប់រំយុទ្ធនាការនោះ។
តាមរបាយការណ៍ដែលចេញដោយ ក្រសួងសាធារណការ និងដឹកជញ្ជូនឆ្នាំ២០១៤ ករណីគ្រោះថ្នាក់ចរាចរណ៍កើតមានចំនួន ៤ ៦៤៥ ករណី ដោយមានជនរងគ្រោះចំនួន ១៥ ៣១៥ នាក់។ ក្នុងចំណោមជនរងគ្រោះសរុប មានអ្នកស្លាប់ចំនួន ២ ២២៦ នាក់ និងរបួសធ្ងន់ ៦ ០០៥ នាក់ (គិតជាមធ្យមភាគមានអ្នកស្លាប់ច្រើនជាង ៦នាក់ និងរបួសធ្ងន់ជិត ១៧នាក់ក្នុងមួយថ្ងៃ)។ ចំនួនអ្នកស្លាប់បានកើនឡើង ១៤% និងអ្នករបួសធ្ងន់ បានកើនឡើង ៦% បើធៀបនឹងឆ្នាំ ២០១៣។ តាមការវាយតម្លៃពីក្រុមអ្នកជំនាញ គ្រោះថ្នាក់ចរាចរណ៍នេះបានធ្វើឲ្យកម្ពុជា ខាតបង់រហូតដល់ទៅ៣០០ លានដុល្លារអាមេរិកក្នុង១ឆ្នាំ៕
អានអត្ថទ៖ រកឃើញម្ចាស់ពានឯកមហោស្រពតន្ត្រី និងចម្រៀងសកលថ្នាក់ជាតិ ២០១៥
អត្ថបទ៖ ខុត សីហា