ឡានតម្លៃ៤,៨លានដុល្លាររបស់ Floyd មានអ្វីពិសេស?

2015-09-01 18:05:07
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ កំពូលអ្នកប្រដាល់ Floyd Mayweather បានបង្អួតនូវរថយន្តចុងក្រោយបំផុតដែលខ្លួនបានទិញក្នុងតម្លៃក៏ខ្ពស់មួយគឺដល់ទៅ ៤,៨លានដុល្លារ។ ហើយមានប្រិយមិត្តមួយចំនួនប្រាកដជាចង់ដឹងថា រថយន្តដែលអ្នកប្រដាល់មួយរូបនេះបានទិញមានចំណុចពិសេសអ្វីខ្លះបានជាថ្លៃដល់ថ្នាក់នេះ?

អញ្ចឹងកុំបង្អង់យូរ ទៅតាមដានការបកស្រាយពីសមត្ថភាពរបស់រថយន្តតម្លៃ ៤,៨លានដុល្លារទាំងអស់គ្នា៖

Floyd បានឲ្យដឹងត្រួសៗតាមរយៈបណ្ដាញសង្គមថា រថយន្តដែលគេបានទិញគឺជារថយន្តម៉ាក Koenigsegg ម៉ូដែល CCXR Trevita ផលិតឡើងដោយរោងចក្រ ULTRA Boutique Automobile។ ក្រុមហ៊ុនបានឲ្យដឹងថា រថយន្តម៉ូដែល CCXR Trevita នេះផលិតឡើងតែបីគ្រឿងប៉ុណ្ណោះក្នុងពិភពលោក ដោយមានមកជាមួយនូវសមត្ថភាពដ៏ខ្លាំងអស្ចារ្យស័ក្ដិសមជាកំពូលរថយន្ត។

យោងតាម Koenigsegg រថយន្តនេះមានបំពាក់នូវម៉ាស៊ីនប្រភេទ V8 ទំហំ៤,៨លីត្រ កម្លាំង ១០១៨សេះ អាចបង្កើនសន្ទុះល្បឿនពី០ទៅ១០០គ.ម/ម៉ ក្នុងពេលត្រឹមតែ ២,៩វិនាទី និងបរបានក្នុងល្បឿនលឿនបំផុតប្រហែល ៤១០គ.ម/ម៉។ រថយន្តនេះមានបណ្ដោយ ៤,២៩៣ម៉ែត្រ ទទឹង១,៩៩៦ម៉ែត្រ កម្ពស់១,១១៤ម៉ែត្រ និង និងមានទម្ងន់ ១២៨០គីឡូក្រាម។

ចំពោះការបើកបរក្នុងរយៈចម្ងាយ១០០គីឡូម៉ែត្រស៊ីសាំងអស់ប្រមាណ១៨ទៅ២១លីត្រ អាស្រ័យលើស្ថានភាពផ្លូវ។ ចំណុចពិសេសជាងគេនោះគឺការរចនារូបរាងរបស់រថយន្តនេះដោយពណ៌របស់វាមិនមែនបានមកពីការលាបថ្នាំនោះទេ គឺតួខ្លួនរបស់វាផលិតពីសារធាតុកាបូនពណ៌ស ដែលមានសភាពចែងចាំងដូចជាគ្រាប់ពេជ្រពេលត្រូវពន្លឺព្រះអាទិត្យ។ នេះគឺជាការរចនាដ៏ពិសេសមួយរបស់ Koenigsegg សម្រាប់រថយន្តដែលផលិតមានចំនួនកំណត់មួយនេះ៕

-ចុចអាន៖ ប្រយ័ត្នអាសាបង់ធំ បើនៅតែបើករថយន្តពេលទ្រនិចសាំងធ្លាក់ដល់បាត

ប្រែសម្រួល៖ ហៃ សុខហេង ប្រភព៖ koenigsegg