បាតុភូតចន្ទគ្រាស និង Supermoon នឹងកើតមានចុងខែនេះ

2015-09-02 20:45:46
ចំនួនមតិ 0 | ចំនួនចែករំលែក 0

ចន្លោះមិនឃើញ

បាតុភូតចន្ទគ្រាស និងបាតុភូតព្រះចន្ទពណ៌ក្រហមពេញវង់ធំ (Supermoon) នឹងកើតមានឡើងព្រមគ្នាដ៏កម្រ នាចុងខែកញ្ញានេះ។

ទីភ្នាក់ងារអវកាសណាសា បានឲ្យដឹងថាបាតុភូតនេះ នឹងកើតមាននៅថ្ងៃទី២៨ ខែកញ្ញា វេលាម៉ោង ១១:១១យប់ (Eastern Time) ត្រូវនឹងម៉ោង ១០:១១នាទីព្រឹកថ្ងៃបន្ទាប់នៅកម្ពុជា។ យ៉ាងណាក្ដី បណ្ដាប្រទេសនៅអាស៊ីអាគ្នេយ៍មិនអាចមើលឃើញបានទេ ពោលគឺមានតែនៅតំបន់អាមេរិកខាងត្បូង អាមេរិកខាងជើង អាហ្រ្វិក អាស៊ីខាងលិច តំបន់ប៉ាស៊ីហ្វិកភាគខាងកើត និងតំបន់អឺរ៉ុបប៉ុណ្ណោះដែលអាចមើលឃើញ។

បាតុភូត Supermoon នេះនឹងអាចឲ្យគេឃើញព្រះចន្ទមានទំហំធំជាងមុន១៤ភាគរយ និងភ្លឺច្បាស់ជាងមុន។ ជាមួយគ្នានេះ ក៏នឹងកើតមានបាតុភូតចន្ទគ្រាសព្រមគ្នាផងដែរ ដោយព្រះចន្ទដើរស្ថិតនៅក្រោយភពផែនដីនៅពេលដែលព្រះអាទិត្យចាំងពន្លឺមក។ ព្រះចន្ទនឹងមានពន្លឺពណ៌ក្រហមឈាម ដោយទទួលពន្លឺជះសល់ពីការបាំងនៃស្រមោលភពផែនដី។ ចំណែកបាតុភូតព្រះចន្ទពេញវង់ធំ ឬ Supermoon គឺកើតឡើងដោយសារគន្លងព្រះចន្ទមានរាងជាអេលីប ដូចនេះនៅពេលដែលព្រះចន្ទពេញវង់ដើរដល់ចំណុចកៀកបំផុត ក្បែរភពផែនដី វានឹងបង្ហាញឲ្យយើងឃើញថាព្រះចន្ទមានទំហំធំប្លែកពីធម្មតា។

ទីភ្នាក់ងារអវកាសណាសាបានបញ្ជាក់ថាបាតុភូតកម្រនេះបានកើតមានលើកចុងក្រោយ តាំងតែពីឆ្នាំ១៩៨២មកម្ល៉េះ ហើយវានឹងមិនកើតមានទៀតនោះទេរហូតដល់ឆ្នាំ២០៣៣៕