អ្នកច្បាប់ពន្យល់ពីការធ្វើកិច្ចសន្យាលក់-ទិញជាលាយលក្ខណ៍អក្សរប្រកបដោយសុវត្ថិភាព

2015-09-09 16:17:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ការទិញលក់របស់របរប្រើប្រាស់ប្រចាំថ្ងៃរាប់តាំងពី ម៉ូតូ ឡានរហូតដល់ផ្ទះតែងមានជាប្រចាំក្នុងជីវភាពរស់នៅប្រចាំថ្ងៃរបស់ប្រជាជនកម្ពុជា។ ប្រជាពលរដ្ឋមួយចំនួនមានការយល់ដឹងពីតម្លៃ និងអត្ថប្រយោជន៍នៃការធ្វើកិច្ចសន្យាលក់-ទិញជាលាយលក្ខណ៍អក្សរ ព្រមទាំងធ្វើឡើងបានត្រឹមត្រូវតាមច្បាប់ និងនីតិវិធីជាធរមាន តែមួយចំនួនមិនទាន់បានយល់ច្បាស់ពីចំណុចនេះនៅឡើយ។ លោក នាក់ សើគីរីន សារការី មកពីមន្ទីរសារការីសេដ្ឋាវិទូ នៃព្រះរាជាណាចក្រកម្ពុជា ដែលមានបទពិសោធន៍ផ្នែកច្បាប់ស្រាប់ទៅលើបញ្ហានេះនឹងពន្យល់ពីអត្ថប្រយោជន៍នៃការធ្វើកិច្ចសន្យាលក់-ទិញជាលាយលក្ខណ៍អក្សរ និងនីតិវិធីនៃការផ្ទេរកម្មសិទ្ធិ ដោយសង្ខេប និងយ៉ាងសាមញ្ញ ដើម្បីមានភាពងាយស្រួលយល់សម្រាប់អ្នកអានទូទៅ ។

លោក នាក់ សើគីរីន សារការី មកពីមន្ទីរសារការីសេដ្ឋាវិទូ

ដំបូង អ្នកច្បាប់វ័យក្មេងពន្យល់ពីសារៈសំខាន់នៃការធ្វើកិច្ចសន្យាលក់-ទិញជាលាយលក្ខណ៍អក្សរថា អាចជួយធានានូវសន្តិសុខទាំងភាគីអ្នកទិញ និងភាគីអ្នកលក់ សម្រាប់ជាភស្តុតាងនៅពេលមានជម្លោះណាមួយកើតឡើង។ លោកលើកឧទាហរណ៍ថា ភាគីក និងភាគីខ ជាមនុស្សស្គាល់គ្នាធ្វើការទិញ-លក់ម៉ូតូដោយកិច្ចសន្យាផ្ទាល់មាត់ គ្មានសាក្សី ដោយមិនបានធ្វើឡើងជាលាយលក្ខណ៍អក្សរ និងមិនបានផ្ទេរកម្មសិទ្ធិត្រឹមត្រូវ។ បើទោះជាបានព្រមព្រៀងគ្នាក្ដី តែឈ្មោះកម្មសិទ្ធិករ គឺនៅតែជាឈ្មោះរបស់ភាគីកដែលជាអ្នកលក់ដដែល។ ប្រសិនបើភាគីខជ្រុះបាត់កាតគ្រី ហើយត្រូវភាគីករើសបាន និងទាមទារថាម៉ូតូជាកម្មសិទ្ធិរបស់ខ្លួន នោះភាគីខគ្មានភស្តុតាងដើម្បីបញ្ជាក់ទេ ព្រោះឈ្មោះដើមនៃប័ណ្ណកម្មសិទ្ធិនៅឈ្មោះភាគីកនៅឡើយ។ នេះជាបញ្ហាដែលគួរឱ្យព្រួយបារម្ភមួយ។

ក្រៅពីធានាសន្តិសុខដល់ភាគីអ្នកទិញ លិខិតលក់-ទិញ និងផ្ទេរកម្មសិទ្ធិក៏ជួយការពារហានិភ័យដល់ភាគីអ្នកលក់ដែរ។ ឧទាហរណ៍ក្នុងករណី អ្នកទិញបានប្រើប្រាស់ម៉ូតូនោះធ្វើសកម្មភាពលួចឆក់ប្លន់ ដោយទុកម៉ូតូចោលរត់យករួចខ្លួន នោះសមត្ថកិច្ចនឹងស្វែងរកឈ្មោះម្ចាស់ដើមម៉ូតូដើម្បីសាកសួរ ចាប់ខ្លួន ឃុំឃាំង និងផ្ដន្ទាទោសជាដើម។ បើសិនជាភាគីម្ចាស់ម៉ូតូមានសាក្សី មានលិខិតស្នាមគ្រប់គ្រាន់នោះមិនបញ្ហាទេ តែបើមិនមាននឹងត្រូវប្រឈមនឹងការចោទប្រកាន់ជាអាទិ៍ ។ ហើយទម្រាំរកឃើញថាគ្មានទោស គាត់បានខាតបង់ពេលវេលាអស់ជាច្រើនរួចទៅហើយ។ ជារួម បើមានលិខិតលក់-ទិញ និងផ្ទេរកម្មសិទ្ធិត្រឹមត្រូវគាត់មិនចាំបាច់ត្រូវខាតបង់ពេលវេលា និងឈឺក្បាលលើបញ្ហានេះទេ។

អ្នកច្បាប់ដដែលណែនាំថា ចំពោះការធ្វើលិខិតលក់-ទិញគួរបំពេញលក្ខខណ្ឌទម្រង់ឱ្យបានត្រឹមត្រូវ ជាពិសេស ការលក់-ទិញអចលនទ្រព្យ។ អនុលោមតាម ក្រមរដ្ឋប្បវេណីថ្មីរបស់កម្ពុជា ឆ្នាំ២០០៧ កិច្ចសន្យាលក់-ទិញអចលនទ្រព្យចាំបាច់ត្រូវធ្វើឡើងដោយលិខិតយថាភូតរបស់សារការីទើបអាចទទួលបានអនុភាពតាមផ្លូវច្បាប់។

លោកបានរៀបរាប់នៃនីតិវិធីលក់-ទិញ និងការផ្ទេរកម្មសិទ្ធិដោយសង្ខេបដូចខាងក្រោម៖

ចំពោះអចលនទ្រព្យ (មានប័ណ្ណកម្មសិទ្ធិសំគាល់ម្ចាស់អចលនទ្រព្យ)៖

- ការស្វែងរកការបញ្ជាក់អំពីម្ចាស់កម្មសិទ្ធិពិតប្រាកដ និងការមានបន្ទុកលើកអចលនទ្រព្យ ។

- ការធ្វើកិច្ចសន្យាលក់-ទិញជាគោលការណ៍ដោយលិខិតយថាភូតដោយបញ្ជាក់អំពីដំណាក់កាលនៃការទូទាត់លុយ និងការបំពេញបែបបទ និងនីតិវិធីផ្ទេរកម្មសិទ្ធិ ជាដើម ។

- បំពេញបែបបទផ្ទេរកម្មសិទ្ធិ ដោយធ្វើលិខិតលក់ផ្ដាច់ និងការចុះបញ្ជីផ្ទេរកម្មសិទ្ធិ (ចុះហត្ថលេខា/ផ្ដិតស្នាមមេដៃដោយគូភាគីទាំងសងខាង) ចំពោះមុខមន្ត្រីមូលដ្ឋាន ឬសារការី និងដោយមន្ត្រីសុរិយោដី។

- បង់ពន្ធប្រថាប់ត្រា ៤% នៃតម្លៃអចលនទ្រព្យសរុប

- ការទទួលបានប័ណ្ណកម្មសិទ្ធិក្នុងឈ្មោះអ្នកទិញ

ចំពោះចលនទ្រព្យ (ម៉ូតូ រថយន្ត)៖

- ពិនិត្យមើលប័ណ្ណសំគាល់យានយន្ត និង/ឬឯកសារពាក់ព័ន្ធដើម្បីបញ្ជាក់ភាពច្បាស់លាស់ នៃម្ចាស់យានយន្ត

- ធ្វើកិច្ចសន្យាលក់-ទិញជាលាយលក្ខណ៍អក្សរ

- ធ្វើលិខិតផ្ទេរកម្មសិទ្ធិយានយន្ត (ចុះហត្ថលេខាដោយគូភាគីទាំងសងខាង) ជាមួយអាជ្ញាធរមូលដ្ឋាន និងមន្ទីរសាធារណការ និងដឹកជញ្ជូន។

- បង់ពន្ធប្រថាប់ត្រា ៤% នៃតម្លៃយានយន្ត

- ទទួលយកប័ណ្ណសំគាល់យានយន្តក្រោមឈ្មោះអ្នកទិញពីមន្ទីរសាធារណការ និងដឹកជញ្ជូន

សំគាល់៖ សម្រាប់ព័ត៌មានពិស្ដារសូមទំនាក់ទំនង មន្ទីរសារការីសេដ្ឋាវិទូ ។

ប្រសិនបើលោកអ្នកមានអត្ថបទចំណេះដឹងចរាចរណ៍ ឬច្បាប់នានាដែលចង់សរសេរ និងចែករំលែកជាមួយ Sabay លោកអ្នកអាចសរសេរផ្ញើមកកាន់អាសយដ្ឋានខាងក្រោមបាន។

អ៊ីមែល៖ prak.chanseyha@cidc.com.kh ទូរសព្ទ៖ ០១៧ ៥៥ ៧៦ ៨៨

អត្ថបទ៖ ប្រាក់ ចាន់សីហា