ហ៊ុយ យ៉ាឡេង អតីតបងធំប្រចាំស្រុក ក្លាយជាអ្នកដឹកនាំរឿង

2015-09-10 15:40:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ហ៊ុយ យ៉ាឡេង ជាចាងហ្វាងផលិតកម្ម "មាតុចក្រហ្វ៊ីល៍" និង ជាអ្នកដឹកនាំរឿងកំពុងទទួលបានជោគជ័យគួរកត់សម្គាល់ ដោយឆ្លងកាត់បទពិសោធន៍ជីវិតជាច្រើន ក្នុងនោះក៏ធ្លាប់ធ្វើជាបងធំប្រចាំសាលាផងដែរ។ រហូតមកដល់ពេលនេះ លោកបានបម្រើវិស័យភាពយន្តប្រមាណ ១៥ ឆ្នាំហើយក្រោយចាកចេញពីស្រុកកំណើត មករស់នៅទីក្រុងភ្នំពេញ។ តើលោកមានប្រវត្តិយ៉ាងដូចម្ដេច?

ស្ថានភាពគ្រួសារ

លោក ហ៊ុយ យ៉ាឡេង កើតនៅថ្ងៃទី ៩ កញ្ញា ១៩៧៩ នៅភូមិតាវង ឃុំពន្លៃ ស្រុកភ្នំស្រុក ខេត្តបាត់ដំបង ក្នុងគ្រួសារកសិករក្រីក្រមួយ។ លោកជាកូនពៅគេក្នុងចំណោមបងប្អូន ៤ នាក់ ដែលលោកមានឪពុកឈ្មោះ ឃូ ឈាង បច្ចុប្បន្នមានវ័យ ៦៨ ឆ្នាំ និង ម្ដាយឈ្មោះ ប៊ុន យ៉ាន បច្ចុប្បន្នមានវ័យ ៦៣ ឆ្នាំ។

កើតបាន ១ ខួបពោលនៅឆ្នាំ ១៩៨០ ម្ដាយបានសម្រេចចិត្តនាំ យ៉ាឡេង ចាកចេញពីផ្ទះសម្បែងទៅរស់នៅ ជំរំសាយធូ ជាយដែនថៃ ព្រោះតែមានជម្លោះក្នុងគ្រួសារ ដោយទុកឱ្យបងប្អូន ៣ នាក់ផ្សេងៗទៀត រស់នៅជាមួយឪពុក។ ប្ដីប្រពន្ធធ្លាប់រស់ជុំគ្នា ត្រូវទទួលខុសត្រូវចិញ្ចឹមកូនក្នុងបន្ទុករៀងខ្លួន ពោលដើរតួជាឪពុកផង-ម្ដាយផង។ អ្នកស្រី ប៊ុន យ៉ាន បានតស៊ូចិញ្ចឹមកូនប្រុសពៅរូបនេះ រហូតដឹងក្ដី និង បញ្ជូនឱ្យចូលរៀននៅសាលាក្នុងជំរំសម្លឆ្ងាញ់មួយដដែលដូចក្មេងដទៃទៀតដែរ។

ការសិក្សាដល់ថ្នាក់ទី ៥ ឪពុកក៏បាននាំបងប្រុសស្រីផ្សេងទៅស្វែងរកដល់ជំរំ ដើម្បីសុំជានាគ្នាជាមួយម្ដាយវិញ។ ដោយមិនចង់ឱ្យកូនរស់បែកខ្ញែកគ្នាតទៅទៀត ម្ដាយក៏យល់ព្រមសម្រុះសម្រួល និង ធ្វើមាតុភូមិនិវត្តន៍មកស្រុកកំណើតខាងម្ដាយ រស់នៅដោយសុខសាន្តគ្មានអំពើហិង្សាទៀតឡើយ។

ប្រវត្តិសិក្សាក្រោយមាតុភូមិនិវត្តន៍

យ៉ាឡេង ឱ្យដឹងទៀតថា លោកបានចូលរៀននៅអនុវិទ្យាល័យ ជប់វារី ស្រុកព្រះនេត្រព្រះ ខេត្តបន្ទាយមានជ័យ កាលនោះមានវ័យទើប ១៣ ឆ្នាំប៉ុណ្ណោះ។ នៅពេលនោះ លោកជាសិស្សពូកែម្នាក់ ទទួលបានចំណាត់ថ្នាក់លេខ ១ ក្នុងតំណាងកិត្តិយសរៀងរាល់ខែ ហើយលោកគ្រូ-អ្នកគ្រូពោលសរសើរចំពោះភាពឈ្លាសវៃរបស់ យ៉ាឡេង និង តែងត្រូវបានមិត្តរួមថ្នាក់បោះឆ្នោតគាំទ្រធ្វើជាប្រធានថ្នាក់ទាំង ៣ ឆ្នាំជាប់គ្នា។

ក្រោយប្រលងជាប់មធ្យមសិក្សាបឋមភូមិក្នុងវ័យ ១៦ ឆ្នាំក៏ជាពេលវេលា ដែលរូបគេត្រូវឃ្លាតឆ្ងាយក្រុមគ្រួសារបងប្អូន ដើម្បីបន្តការសិក្សាថ្នាក់វិទ្យាល័យនៅទីរួមខេត្តបន្ទាយមានជ័យ ដោយស្នាក់នៅក្នុងវត្តមួយក្នុងក្ដីសង្ឃឹមថា នឹងអាចចាកចេញពីភាពក្រីក្រពេលខាងមុខមិនខាន។ លោក ហ៊ុយ យ៉ាងឡេង ចាត់ទុកថា មានសំណាងបន្តិចហើយ ព្រោះមានកង់មីគីចាស់មួយជាមធ្យោបាយធ្វើដំណើរដែរ។

លោកបានរៀបរាប់ទៀតថា មិនយូរប៉ុន្មានឥទ្ធិពលនៃភាពស៊ីវិល័យរបស់អ្នកខេត្តបានបំផ្លាញឆន្ទៈសិក្សា ដែលបានវេចស្ពាយពីស្រុកកំណើតបន្តិចម្ដងៗ។ ភាពខ្មាសអៀនក្នុងនាមជាអ្នកស្រែ ធ្វើឱ្យរូបលោកលែងមានចិត្តចង់រៀនតទៅទៀត និង គេចសាលាហូរហែ ហើយឈ្មោះនៅលើគេក្នុងតារាងចំណាត់ថ្នាក់ បែរជាធ្លាក់មកដល់បាតក្រោមក្នុងរយៈពេលដ៏ខ្លី។

បរិយាកាសបានរុញច្រាន ហ៊ុយ យ៉ាឡេង វិវត្តន៍ខ្លួនយ៉ាងឆាប់រហ័សពីប្រធានថ្នាក់ក្លាយជាបងធំប្រចាំសាលា, ពីសុភាពរាបសាក្លាយជាបងធំប្រចាំស្រុក។ លោកគ្រូអ្នកគ្រូសម្ដែងភាពអស់សង្ឃឹម មិត្តភ័ក្ដិនាំគ្នាខ្លាចរអា លួចពេបជ្រាយក្រោយខ្នង និងពោលអាណិតឪពុកម្ដាយ ដែលមានកូនប្រុសដូច្នេះ។

លោកបន្ថែមថា ជីវិតជាបងធំរយៈពេលជាង ១ ឆ្នាំ ហាក់មិនមានប្រយោជន៍សោះ និង រងពាក្យសំដីពេបជ្រាយពីអ្នកជុំវិញខ្លួនគ្រប់គ្នា រួមទាំងកាយវិការរើសអើងទាំងឡាយផងនោះ ធ្វើឱ្យរូបលោកក៏ភ្ញាក់ខ្លួនឡើងវិញ។ ម្យ៉ាងលោកមិនចង់ទៅធ្វើស្រែដូចពាក្យទំនាយគេនោះទេ។ យ៉ាឡេង ចាប់ផ្ដើមប្រឹងប្រែងរៀនឡើងវិញមិនឱ្យពេលវេលារំលងទៅដោយឥតប្រយោជន៍ទៀតឡើយ និង ព្យាយាមនៅឱ្យឆ្ងាយពីក្រុមគូកនជាអតីតអ្នកលេងដូចគ្នា។ ឆ្នាំ ១៩៩៨ លោកបានប្រលងជាប់សញ្ញាប័ត្រមធ្យមសិក្សាទុតិយភូមិបាក់ឌុបដូចបំណង។

មកដល់ភ្នំពេញប្រលងស្អីក៏មិនជាប់ បានចូលសិល្បៈដោយចៃដន្យ

ក្រោយជាប់បាក់ឌុប ហ៊ុយ យ៉ាឡេង បានធ្វើដំណើរមកភ្នំពេញ ដើម្បីប្រលងចូលរៀនជំនាញតាមមហាវិទ្យាល័យនានា។ ប៉ុន្តែជាអកុសលរូបគេប្រឡងស្អីក៏មិនជាប់ដែរ បើទោះបីជាបានចំណាយពេលវេលាជាច្រើនខែជាមួយនឹងកង់ចាស់មួយគ្រឿង។ ដោយមិនចង់ត្រឡប់ទៅស្រុកវិញទាំងបាតដៃទទេនោះ ហើយចៃដន្យស្របពេលដែលក្លឹប MSL បើកបង្ហាត់បង្រៀនក្បាច់គុនដំបង លោកក៏សម្រេចចិត្តរៀនជាមួយលោកគ្រូ ហ៊ុយ សាន់ នៅទៅនោះតែម្ដងទៅ។

ការពិតទៅ MSL ក៏ជាក្លឹបសិល្បៈផងដែរ។ អ្នកដឹកនាំរឿងខាងលើរំលឹកថា មានការជ្រើសរើសក្រុមហាត់គុនចូលរួមសម្ដែងដោយចៃដន្យ ខណៈពួកគេមិនធ្លាប់មានបទពិសោធន៍សម្ដែងលើឆាកម្ដងណាឡើយ។ ប៉ុន្តែដោយមានការចង្អុលបង្ហាញពីសាស្ត្រាចារ្យសាលាវិចិត្រសិល្បៈលោក ចិន នាគ និង អ្នកគ្រូ ស៊ីណា ធ្វើឱ្យការសម្ដែងលើកដំបូងទទួលបានជោគជ័យ។

ដោយមានការជំរុញពីសាស្ត្រាចារ្យទាំងពីររូបខាងលើ ស្របពេលពន្លកសិល្បៈកើតមានផងនោះ រូបគេក៏សម្រេចចិត្តចូលរៀននៅសាលាវិចិត្រសិល្បៈ ដោយកំណត់គោលដៅជីវិតថា នឹងនៅក្នុងវិស័យសិល្បៈរហូតឈប់ទៅណាទៀតហើយ និងក្លាយប្រែក្លាយពីតួសម្ដែងក្រៅឆាក ជំនួសដោយពាក្យថា តួឯកវិញម្ដង និងបានចូលរួមសម្ដែងជាបន្តបន្ទាប់។

ចេះដឹកនាំរឿងដោយសារលួចរៀន

ប្រកបដោយទស្សនៈវិស័យវែងឆ្ងាយ ហ៊ុយ យ៉ាឡេង ចាប់ផ្ដើមមានគំនិតក្លាយជាអ្នកដឹកនាំរឿងវិញម្ដង ដោយព្យាយាមសួរនាំ និង លួចរៀនសូត្រពីរៀមច្បងពេលទៅថតម្ដងៗ។ ការប្រឹងប្រែងបន្តបន្ទាប់ និងការស្វះស្វែងរកឱកាស ទីបំផុតលោកបានក្លាយជាសិស្សផ្នែកភាពយន្តបង្ហាត់បង្រៀនដោយឯកឧត្ដម ម៉ៅ អាយុទ្ធ រដ្ឋលេខាធិការក្រសួងព័ត៌មាន និងជាប្រធានសមាគមទូរទស្សន៍បច្ចុប្បន្ន។

ក្រោយមកមិនយូរប៉ុន្មាន លោកបានក្លាយជាជំនួយការដឹកនាំរឿងនៅក្នុងផលិតកម្មអង្គរវត្តក្នុងរឿងមួយចំនួនដូចជា ខ្មោចប្រពន្ធអាទុយ, ដំបូលរហែក, នាងពូន, សន្យា។ ក្រោយមកទៀត កូនប្រុសកសិកររូបនេះក៏មានឱកាសក្លាយជាអ្នកដឹកនាំរឿងដូចបំណងប្រាថ្នានៅក្នុងផលិតកម្ម ខេមប្រូ រួមមានរឿង ២៤ម៉ោងជួបខ្មោច, ម៉ៅស្វិត, ល្បែងសួរខ្មោច, កំពែងស្នេហ៍, ភូមិគ្រឹះខ្មោច។ ដោយឡែកស្នាដៃលេចធ្លោ និងរកចំណូលបានច្រើនជាងគេគឺរឿង ផ្ទះខ្មោចទិញ និងរឿង ខ្មោចដើមចេកជ្វា ល្បីល្បាញដល់ប្រទេសថៃក្នុងឆ្នាំ ២០០៥។

ជាមួយគ្នានោះវិស័យភាពយន្តចាប់ផ្ដើមមានឱនភាព ក្នុងឆ្នាំដដែលលោកបានងាកទៅធ្វើការងារជាអ្នកដឹកនាំកម្មវិធីនៅទូរទស្សន៍បាយ័នវិញម្ដងក្នុងកម្មវិធី ស្មាតហ្គែម, វេទិកាមហាជន, ឆាឆាឆា, ប្រដាល់, ជាដើម។

ទៅមិនឆ្ងាយពីសិល្បៈភាពយន្ត

លុះមកដល់ឆ្នាំ ២០១២ វិស័យភាពយន្តចាប់ផ្ដើមងើបឡើងបន្តិច ខណៈរោងភាពយន្តទំនើបចាប់ផ្ដើមបើកជាហូរហែផងដែរ។ ដោយមិនភ្លេចពាក្យសន្យារបស់ខ្លួនថា នឹងនៅជាមួយភាពយន្តរហូតអស់ជីវិត អតីតបងធំស្រុក ព្រះនេត្រព្រះ រូបនេះក៏សម្រេចចិត្តបើកផលិតកម្មផ្ទាល់ខ្លួនដោយដាក់ឈ្មោះថា"មាតុចក្រហ្វ៊ីល៍"។

ដើម្បីស្វាគមន៍វត្តមានផលិតកម្មថ្មី លោកបានផលិតរឿងមួយមានចំណងជើងថា"អាព្រឿងងាប់ហើយ" ដោយសហការជាមួយផលិតកម្ម"មហាហង្ស" និងទទួលបានជោគជ័យបង្គួរក្រោយចាក់បញ្ចាំងតាមរោងភាពយន្តនានា។

បច្ចុប្បន្នលោក ហ៊ុយ យ៉ាឡេង ក៏ត្រៀមនឹងចាក់បញ្ចាំងស្នាដៃភាពយន្តសាកល្បងទីផ្សារអាស៊ានមានចំណងជើងថា "អាកុក អាច្រវា" ដោយសហការផលិតជាមួយនឹងផលិតកម្មជេត។ ក្រៅពីវត្តមានតារាល្បីៗរបស់កម្ពុជា ភាពយន្តនេះក៏មានការចូលរួមពីតួសម្ដែងបរទេសប្រមាណជាង ២០ នាក់ផងដែរ។ អ្នកដឹកនាំរឿងវ័យ ៣៦ ឆ្នាំរូបនេះអះអាងថា មាតុចក្រហ្វ៊ីល៍មួយជីវិត ដើម្បីសិល្បៈភាពយន្តខ្មែរ៕

អត្ថបទ៖ សំ ជំនាញ