អ្នកដឹកនាំរឿង និងតារាខ្មែរខកចិត្តទស្សនិកជនមើលរំលងរឿង "ដុំហ្វ៊ីលចុងក្រោយ"

2015-09-10 18:22:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ទស្សនិកជនចេញពីចង្កោមសិល្បៈភាគច្រើនបានពោលសរសើរមិនដាច់ពីមាត់ ក្រោយបានចូលរួមទស្សនាភាពយន្តរឿង "ដុំហ្វ៊ីលចុងក្រោយ" ស្នាដៃរបស់អ្នកស្រី សុទ្ធោ គុល្លិកា ទើបចាក់បញ្ចាំងនៅប្រទេសកម្ពុជាថ្មីៗនេះ ក្រោយធ្វើដំណើរទៅកាន់ប្រទេសជាច្រើន និងបានទទួលពានរង្វាន់ជាហូរហែ។

តារាសម្ដែង សាវិន ហ្វីលីព បាននិយាយថា លោកសុំសរសើរដោយស្មោះចំពោះអ្នកដឹកនាំរឿង និងតារាសម្ដែងទាំងអស់ក្នុងស្នាដៃទទួលបានពានរង្វាន់មួយនេះ ព្រោះសាច់រឿងបាននិយាយពីការពិតធ្វើឱ្យបាញ់ចំបេះដូងអ្នកទស្សនា។ លោកថា" ខ្ញុំសោកស្ដាយបំផុត ដែលខ្មែរយើងនៅតែមិនគាំទ្រខ្មែរ សូម្បីភាពយន្តជាប់ពានរង្វាន់អន្តរជាតិក៏ដោយ"។

មានមនុស្សតែ ៧ នាក់ប៉ុណ្ណោះ បានចូលរួមទស្សនាកុននេះជាមួយលោក ស្របពេលទស្សនិកជនភាគច្រើនមើលរំលង ហើយបែរជាទៅគាំទ្ររឿង" តត កំលោះសម្បូរស្នេហ៍" ទៅវិញ។

ចាងហ្វាងផលិតកម្ម Mega Film វ៉ន ប៊ុនស៊ីម និយាយថា រឿង"ដុំហ្វ៊ីលចុងក្រោយ"ជាខ្សែភាពយន្តខ្មែរដែលផលិតឡើងប្រកបដោយគុណភាពដ៏ល្អលំដាប់ជាតិ និងអន្តរជាតិ ទាំងរូបភាព និងសំឡេងពិតជាមានអត្ថរូប និងអត្ថន័យ។ អ្នកដឹកនាំរឿងរូបនេះបញ្ជាក់ថា បន្ទាប់ពីបានទស្សនាហើយ មិនសរសើរមិនបាន។

ពិធីករ សុខ សិរីវឌ្ឍនា ក៏មានការគាំទ្រចំពោះស្នាដៃរបស់អ្នកស្រី សុទ្ធោ គោល្លិកា ផងដែរក្រោយបានទៅចូលរួមទស្សនា។ លោកថា៖"កំហុសដ៏ធ្ងន់ធ្ងររបស់អ្នកមើលកុននៅកម្ពុជា រឿងខ្លួនឯងទទួលបានពានមិនមើល ទៅមើលរឿងប្រទេសផ្សេងទៅវិញ"។

ចាងហ្វាងផលិតកម្ម មាតុចក្រហ៊្វីល៍ លោក ហ៊ុយ យ៉ាឡេង ក៏បានឱ្យតម្លៃខ្ពស់ចំពោះរឿងខាងលើនេះដែរ ព្រោះបានឆ្លុះបញ្ចាំងពីរឿងរ៉ាវប្រវត្តិសាស្ត្ររបស់កម្ពុជា និងផលិតបានល្អសមនឹងបានពានពីបរទេសប្រាកដមែន។ លោកបន្តថា៖"ប៉ុន្តែយុវវ័យគាត់គិតថា ជាភាពយន្តឯកសារ ហើយមិនចាប់អារម្មណ៍ នាំគ្នាទៅមើលតែរឿងសប្បាយៗ កំប្លែងៗទៅវិញ"។

អ្នកដឹកនាំរឿងវ័យក្មេង វណ្ណ ស៊ីដារ៉ូ ឱ្យដឹងថា "ដុំហ្វ៊ីលចុងក្រោយ" ជាភាពយន្តខ្មែរគួរអោយកោតសរសើរមួយ និងមានមោទនភាព បង្កប់ដោយទស្សនវិជ្ជាអប់រំ។ "ខ្ញុំសង្ឃឹមថា ខ្មែរនឹងបន្តមានភាពយន្តដ៏ល្អបែបនេះជាច្រើន ដើម្បីបម្រើសេចក្ដីត្រូវការក្នុងរោងភាពយន្តខ្មែរយើងតទៅថ្ងៃអនាគត"៕

រឿង"ដុំហ្វ៊ីលចុងក្រោយ" ក៏ទើបនឹងទទួលបានពានរង្វាន់ The Best Narrative Feature នៅក្នុងមហោស្រពអន្តរជាតិទីក្រុងខ្មែរ ឬ Cambodia Town Film Festival ប្រារព្ធឡើងនៅទីក្រុង Long Beach សហរដ្ឋអាមេរិកផងដែរ បន្ថែមលើពានរង្វាន់មានស្រាប់ ធ្វើឱ្យអ្នកដឹកនាំរឿង និងតួសម្ដែងទាំងអស់កាន់តែមានមោទនភាព ទោះបីជាមហាជនភាគច្រើនបានមើលរំលងយ៉ាងណាក្ដី។

អានអត្ថបទ៖ សុខ សោម៉ាវត្តី ជម្រះរឿងបែកគ្នាជាមួយស្វាមី

អានអត្ថបទ៖ ហ៊ុយ យ៉ាឡេង អតីតបងធំប្រចាំស្រុក ក្លាយជាអ្នកដឹកនាំរឿង

អត្ថបទ៖ សំ ជំនាញ