គេងថ្ងៃជួយអ្វីខ្លះ?
- 2014-10-16 18:40:19
- ចំនួនមតិ 0 | ចំនួនចែករំលែក 0
គេងថ្ងៃជួយអ្វីខ្លះ?
ចន្លោះមិនឃើញ
ការសិក្សាស្រាវជ្រាវមួយបានរកឃើញថាអ្នកដែលបានគេងពេលថ្ងៃមួយស្រឡេត មានការប្រឈមនឹងជំងឺបេះដូងតិចជាងអ្នកដែលមិនបានគេងថ្ងៃសោះ។
ការស្រាវជ្រាវដែលដឹកនាំដោយលោកវេជ្ជបណ្ឌិត Androniki Naska នៃសាកលវិទ្យាល័យវេជ្ជសាស្ត្រ ក្រុងអាតែន ប្រទេសក្រិកនេះ បានសិក្សាលើជនជាតិក្រិកចំនួន ២៣៦៨១នាក់ ដែលមានអាយុចាប់ពី ២០ ដល់ ៨៦ឆ្នាំ។ នៅពេលដំបូង អ្នកចូលរួមទាំងនោះ ត្រូវបានសួរសំណួរមួយចំនួនដូចជា តើពួកគេធ្លាប់គេងថ្ងៃដែរឬទេ? បើធ្លាប់តើរយៈពេលប៉ុន្មាន និងញឹកញាប់ប៉ុណ្ណា? ក្រៅពីនេះ ពួកគេក៏បានប្រាប់កម្រិតហាត់ប្រាណ និងរបបអាហាររបស់ខ្លួនផងដែរ។
រយៈពេលជាង ៦ឆ្នាំចាប់តាំងពីការសិក្សាចាប់ផ្ដើម មានអ្នកចូលរួមចំនួន ៧៩២នាក់បានស្លាប់បាត់បង់ជីវិត ដោយក្នុងនោះមាន ១៣៣នាក់ស្លាប់ដោយសារជំងឺបេះដូង ហើយអ្នកស្លាប់ទាំងនោះ មានភាគច្រើនជាអ្នកដែលមិនបានសម្រាកថ្ងៃ។ ក្រុមអ្នកស្រាវជ្រាវបានធ្វើការវិភាគឲ្យដឹងថា ចំពោះអ្នកដែលបានសម្រាកពេលថ្ងៃម្ដងម្កាល ឬសម្រាកជាប្រចាំមានការប្រឈមនឹងជំងឺដែលពាក់ព័ន្ធនឹងបេះដូង ៣៤ភាគរយតិចជាងអ្នកដែលមិនបានសម្រាក។
ការសិក្សាបានរកឃើញទៀតថា ការសម្រាកថ្ងៃ អាចជួយកាត់បន្ថយស្ត្រេស និងជួយឲ្យលំហូរឈាមដើរស្រួល។ ឆ្លងតាមការសិក្សានេះ អាចជាសញ្ញាណល្អ ក្នុងការក្រើនរំលឹកដល់អ្នកដែលមានការងារ ស្រ្តេសច្រើន គួរតែគេងសម្រាកពេលថ្ងៃ ឲ្យបានជាប្រចាំ ជៀសវាងការប្រឈមនឹងជំងឺមួយចំនួនដែលបង្កដោយស្ត្រេស និងជំងឺទាក់ទងនឹងបេះដូងជាដើម៕
ចុចមើលអត្ថបទសុខភាព និងសម្រស់ជាច្រើនទៀត
ប្រភព៖ psyarticles