យកក្រដាសប្រាក់១យាន់ ចំនួន២បេ សងគ្រួសាររងគ្រោះស្លាប់ដោយគ្រោះថ្នាក់ចរាចរ

2015-09-21 17:34:41
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រួសាររងគ្រោះមួយរស់នៅទីក្រុង Shenyang ខេត្ត Liaoning ទទួលបានសុទ្ធតែក្រដាសប្រាក់១យាន់ ជាការសងជំងឺចិត្ត ក្រោយសមាជិកគ្រួសារម្នាក់បានជួបគ្រោះថ្នាក់ចរាចររថយន្តក្រុង។

ស្ត្រីមេម៉ាយមានឈ្មោះ Li Sufen បានប្រាប់ថាគាត់ទទួលបានប្រាក់ចំនួន ២០ម៉ឺនយាន់ ស្មើនឹងជាង ៣,១ម៉ឺនដុល្លារ បន្ទាប់ពីប្ដីអ្នកស្រីត្រូវរថយន្តក្រុងបុកស្លាប់កាលពីខែមិថុនាកន្លងទៅ។ តែទោះជាយ៉ាងណាក្ដី ដើម្បីទទួលបានប្រាក់ទាំងនេះ អ្នកស្រីត្រូវក្រុមហ៊ុនតម្រូវឲ្យទៅយកប្រាក់នោះដោយខ្លួនឯង។

អ្វីកាន់តែភ្ញាក់ផ្អើលជាងនេះ ក្រុមហ៊ុនបានសងប្រាក់បណ្ដាក់ចំនួន ៦២៨០ដុល្លារសិន ជាក្រដាស ១យាន់សុទ្ធ។ ពួកគេបានស្នើឲ្យអ្នកស្រីអង្គុយរាប់ មុនពេលយកក្រដាសប្រាក់ទាំងនោះច្រកបេ មកផ្ទះ ដែលមានទម្ងន់ជាង ១០គីឡូក្រាមឯណោះ។

អ្នកស្រី Li Sufen បានជញ្ជូនក្រដាសប្រាក់ទាំងនោះ យកទៅស្រុក ដោយបានសម្ដែងអារម្មណ៍ធុញទ្រាន់ ច្រើនជាងសប្បាយរីករាយ។ អ្នកស្រីបាននិយាយប្រាប់សារព័ត៌មានចិន China Business Morning ថាក្រុមហ៊ុនរថយន្តក្រុងធ្វើឲ្យគាត់កាន់តែលំបាកមួយកម្រិតទៀត ហើយគាត់មិនដឹងថាតើត្រូវចាយលុយក្រដាស ១យាន់ដ៏ច្រើនបែបនេះតាមវិធីណាទេ។

ចាប់តាំងពីរូបថតទាំងនេះត្រូវបង្ហោះចែកចាយលើប្រព័ន្ធអ៊ីនធើណិត មានអ្នកប្រើប្រាស់ជាច្រើនបានបញ្ចេញមតិប្រឆាំងនឹងក្រុមហ៊ុនរថយន្តក្រុងថា បុគ្គលិករថយន្តក្រុងគួរតែចេញមុខជួយរាប់ក្រដាសប្រាក់ទាំងនោះ៕