តារាចម្រៀងល្បី ៣ រូបនាំយកថវិកាជាង ១០ ០០០ ដុល្លារជួយមន្ទីរពេទ្យគន្ធបុប្ផា
- 2015-09-28 23:23:19
- ចំនួនមតិ 0 | ចំនួនចែករំលែក 0
តារាចម្រៀងល្បី ៣ រូបនាំយកថវិកាជាង ១០ ០០០ ដុល្លារជួយមន្ទីរពេទ្យគន្ធបុប្ផា
ចន្លោះមិនឃើញ
តារាចម្រៀង មាស សុខសោភា ឆាយ វីរៈយុទ្ធ និងឌីជេ ក្ដឹប បាននាំយកថវិកាចំនួន ១៣ ០០០ ដុល្លារអាមេរិក ប្រគល់ដល់មន្ទីរពេទ្យគន្ធបុប្ផា សម្រាប់ប្រើប្រាស់ក្នុងការព្យាបាលកុមារកំពុងសម្រាកព្យាបាលនៅទីនោះ។
ជួសមុខឱ្យតារាចម្រៀងផ្សេងទៀត ឌីជេ ក្ដឹប បាននិយាយថា ថវិកាទាំងអស់បានពីការលក់សំបុត្រចូលទស្សនាការប្រគំតន្ត្រីសប្បុរសធម៌រៀបចំឡើងដោយពលករខ្មែរធ្វើការនៅប្រទេសកូរ៉េ ដែលពួកគេបានទៅចូលរួមសម្ដែងច្រៀងកាលពីសប្ដាហ៍មុននេះ។ ក្រៅពីនេះ ក៏មានការឧបត្ថម្ភថវិកាផ្ទាល់ ពីសប្បុរសជនតំណាងក្រុមហ៊ុន នៅប្រទេសកូរ៉េផងដែរ។
តារាចម្រៀង Rap ដដែលរំលឹកបន្តថា នេះជាការរៀបចំលើកដំបូងរបស់ពលករខ្មែរកំពុងធ្វើការនៅប្រទេសកូរ៉េ ភាគច្រើនស្ថិតក្នុងផ្នែកឧស្សាហកម្ម ដែលទៅពីគ្រប់ទិសទី។ “ខ្ញុំសោកស្ដាយ! ប្រសិនបើមានកន្លែងសម្រាប់ទទួលបងប្អូនពលករយើង ប្រហែលជាអាចបានថវិកាច្រើនជាងនេះទៀត ដើម្បីជួយមន្ទីរពេទ្យ គន្ធបុប្ផា"។ នាយ ក្ដឹប បញ្ជាក់មកកាន់ Sabay មុននេះបន្តិច។
តារាចម្រៀងមានប្រវត្តិជាកូនក្រខ្សត់រូបនេះ បានអះអាងថា មានពលករកូរ៉េចូលរួមទស្សនាប្រមាណ ២៥% ប៉ុណ្ណោះបានទិញសំបុត្រ និងមានកន្លែងទទួលត្រឹមត្រូវ ខណៈពលករប្រមាណជាង ៧០% ផ្សេងទៀត មិនមានកន្លែងសម្រាប់ទទួលពួកគេទេ ហើយចូលរួមទស្សនាដោយសេរី។ ប៉ុន្តែក៏មានពលរដ្ឋខ្មែរនៅទីនោះខ្លះបានចំណាយថវិកាទិញសំបុត្រ ទោះបីជាមិនបានចូលរួមទស្សនាដោយផ្ទាល់យ៉ាងណាក៏ដោយ។
ក្ដឹប អះអាងថា តារាចម្រៀងទាំងអស់ពីកម្ពុជា មានមោទនភាព ដោយឃើញពលករនៅទីនោះ មានចិត្តជួយពលរដ្ឋកំពុងរស់នៅ និងជួបការលំបាកនៅស្រុកកំណើតដូច្នេះ។ លោកសង្ឃឹមថា នឹងមានឱកាសសម្ដែងនៅប្រទេសកូរ៉េ ឬប្រទេសផ្សេងម្ដងទៀត ដើម្បីស្វែងរកថវិកាជួយដល់មន្ទីរពេទ្យមួយនេះ ឬប្រជាពលរដ្ឋក្រីក្រផ្សេងទៀត កំពុងជួបការលំបាក៕
អានអត្ថបទ៖ ស្រីស្អាត សូ លីហ្សា ក្ដាប់បានតំណែងតួឯកលើកដំបូង
អានអត្ថបទ៖ លាង ឧត្ដម ក្លាយជាអ្នកចាត់ការលើមុខជំនួញតម្លៃជិត១០ម៉ឺនដុល្លារ
អត្ថបទ៖ សំ ជំនាញ
រូបថត៖ ផ្ដល់ឱ្យ