ស្រីស្អាត សូ លីហ្សា ក្ដាប់បានតំណែងតួឯកលើកដំបូង

2015-09-28 20:34:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយប្រឡូកក្នុងវិស័យសិល្បៈជិត ១ ឆ្នាំ និងចូលរួមសម្ដែងរឿងភាគជាច្រើនរឿងកន្លងមក តារាស្រីវ័យក្មេង សូ លីហ្សា បានប្រាប់ថា ទីបំផុតនាងក្ដាប់បានតំណែងតួឯកលើកដំបូងហើយ។

“ការពិតទៅ ខ្ញុំទៅធ្វើតេស្តសមត្ថភាពក្រោយគេផងបង ស្រាប់តែគេទូរសព្ទហៅឱ្យដើរជាតួឯកតែម្ដងទៅ ព្រោះធ្វើតេស្តកន្លងមកគេរកអត់បាន"។ លីហ្សា ថ្លែងប្រាប់មកកាន់ Sabay ព្រឹកមិញ។ តារារូបនេះបន្ថែមថា កន្លងមកមិនធ្លាប់គ្រងតំណែងបែបនេះទេ ហើយក៏ជាលើកដំបូងផងដែរ សម្រាប់ការសម្ដែងឱ្យស្ថានីយទូរទស្សន៍ប៉ុស្តិ៍លេខ ៩ តាមរយៈខ្សែរឿងភាគមានចំណងជើងថា" អវសានស្នេហ៍"។

តារាស្រីវ័យ ១៨ ឆ្នាំដដែលបញ្ជាក់ថា មានការលំបាកមួយចំនួន និងមានភាពនឿយហត់ក្នុងតំណែងនេះ ព្រោះត្រូវថតប្លង់ជាច្រើនជាងតួរឿងផ្សេងៗទៀត ក្នុងនាមជាតួឯកដូច្នេះ។ ប៉ុន្តែនាងអះអាងថា អាចតស៊ូបានចំពោះការងារ ដែលនាងស្រលាញ់ ដែលរហូតហ៊ានព្យួរការសិក្សាគ្មានពេលកំណត់ ព្រោះតែមមាញឹកសម្ដែង ស្របគ្នាជាមួយការងារដើរបង្ហាញម៉ូដក្នុងក្រុម POP Model ក៏មិនសូវបានសម្រាក។

តារាស្រីរូបនេះ អះអាងម្យ៉ាងទៀតថា នៅមានស្ថានីយទូរទស្សន៍ផ្សេងទៀត បានទាក់ទងទៅចូលរួមសម្ដែងភាពយន្តរបស់ពួកគេផងដែរ ហើយគម្រោងនោះចាប់ផ្ដើមឆាប់ៗ។ ក្រៅពីនេះ ស្រីស្អាតខាងលើ ក៏កំពុងត្រៀមចូលរួមសម្ដែងរឿងថ្មីរបស់អ្នកដឹកនាំរឿង ព្រំ រដ្ឋា ទៀតផង។ ការសម្ដែងកន្លងមកទទួលបានការចាប់អារម្មណ៍ និងគាំទ្រពីទស្សនិកជន ជាមូលហេតុនាំឱ្យនាងមានការមមាញឹកមួយរយៈចុងក្រោយ៕

អានអត្ថបទ៖ ព្រាប សុវត្ថិ ថាចង់ចាប់ដៃគូជាមួយអ្នកស្រី ហ៊ឹម ស៊ីវន ជាថ្មី!

អានអត្ថបទ៖ អ៊ុន សិទ្ធា បង្ហើបរឿងលួចស្រលាញ់នារីម្នាក់កាលរៀនវិទ្យាល័យ