Justin Bieber ចាត់ទុកស្នេហារវាងខ្លួននិង Selena Gomez ដូចជាអាពាហ៍ពិពាហ៍មួយ

2015-09-30 16:52:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងម្ចាស់បទ "What Do You Mean?” បានចែករំលែកបទពិសោធន៍ពីចំណងស្នេហារបស់ខ្លួនជាមួយ អតីតមិត្តស្រី Selena Gomez នៅលើទស្សនាវដ្ដី Complex ច្បាប់សម្រាប់ខែតុលា និង វិច្ឆិកា។

រឿងស្នេហាដែលជួបហើយបែករបស់តារាចម្រៀងវ័យក្មេង Justin Bieber និង Selena Gomez ធ្លាប់ធ្វើឲ្យបណ្ដាញសារព័ត៌មានចុះផ្សាយជាញឹកញាប់អស់រយៈពេលយ៉ាងយូរ។ ឥឡូវនេះ នៅពេលដែលអ្នកទាំងពីរបានត្រៀមខ្លួនរួចជាស្រេចដើម្បីទទួលយកស្នេហាថ្មីរៀងៗខ្លួន Justin Bieber បានបើកចិត្តនិយាយពីរឿងដែលបានកន្លងផុតទៅ។

ក្នុងឱកាសក្លាយជាតារាក្របមុខរបស់ទស្សនាវដ្ដី Complex តារាចម្រៀងវ័យ ២១ ឆ្នាំ បាននិយាយថា "ពួកយើងបានស្រលាញ់គ្នាខ្លាំងណាស់ គ្មានអ្វីដែលសំខាន់ជាងនេះទៀតទេ។ ខ្ញុំបានរើទៅរស់នៅជាមួយ Selena នៅពេលដែលខ្ញុំមានអាយុទើបតែ ១៨ ឆ្នាំ។ នៅពេលនោះវាហាក់បីដូចជាពួកយើងបានរៀបការជាមួយគ្នាអីចឹង។ រស់នៅដោយឡែកជាមួយមនុស្សស្រីម្នាក់នៅពេលនោះជាពេលដែលលំបាកសម្រាប់ក្មេងដូចជាខ្ញុំ។ នៅពេលដែលមានជម្លោះកើតឡើង ខ្ញុំបាត់បង់សតិអារម្មណ៍ ហើយ Selena នឹងបាត់បង់ការគ្រប់គ្រងរបស់នាងដែរ។ ហើយពួកយើងនឹងចាប់ផ្ដើមឈ្លោះគ្នាដូចផ្គររន្ទះ ដោយសារតែពួកយើងបានទុកចិត្តគ្នាពេក។ ក្រោយមកអ្វីដែលខ្ញុំបានយល់គឺថា ស្នេហាគឺជាជម្រើសរបស់យើង វាមិនមែនតាមតែអារម្មណ៍នោះទេ។ ស្នេហានៅជីវិតខាងក្រៅគឺមិនមានភាពផ្អែមល្ហែមដូចនៅក្នុងរឿងនិទានឡើយ"។

បន្ទាប់ពីការបែកបាក់នេះ Justin មានបញ្ហាពាក់ព័ន្ធខាងផ្នែកផ្លូវច្បាប់ ហើយត្រូវបានចាប់ខ្លួនក្នុងឆ្នាំ ២០១៤។ ម្ចាស់បទ "Baby” បាននិយាយរំលឹកពីរឿងខ្លួនត្រូវគេចាប់ខ្លួនថា "ពួកប៉ូលិស ចង់បានតែចំណាប់អារម្មណ៍ពីសារព័ត៌មាន ខ្ញុំមិនដែលបើកបរហួសល្បឿនកំណត់ ខ្ញុំមិនដែលរើសអើងក្រុមអ្នកភេទទីបី។ ក្រុមប៉ូលិសទាំងនោះគ្រាន់តែចង់ល្បីឈ្មោះដោយចាប់បានតារាមានឈ្មោះល្បី។ ខ្ញុំបានជាប់គុកអស់រយៈពេល ២៤ ម៉ោង ហើយរឿងដែលពិបាកទ្រាំបំផុតនៅក្នុងនោះគឺវារងាខ្លាំងណាស់"។

"នៅពេលដែលយើងមានអាយុ ២០ ឆ្នាំ តែងតែមានរឿងមិនល្អបន្តិចបន្តួចកើតឡើងជានិច្ច ដូចជាការរឹងរូសជាដើម។ នៅពេលនេះនៅពេលដែលខ្ញុំមានអាយុ ២១ ឆ្នាំហើយខ្ញុំចាប់ផ្ដើមយល់ពីខ្លួនឯង និងបានធ្វើការជាមួយនឹងមនុស្សល្អមួយចំនួនដែលមិនភ័យខ្លាចនឹងការប្រាប់នូវអ្វីជាការពិតដល់ខ្ញុំ"៕