អូឡាំពិកអន្តរជាតិសរសើរពីការផ្សព្វផ្សាយកីឡានៅកម្ពុជា

2015-10-08 15:48:25
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មាធិការអូឡាំពិកអន្តរជាតិ (IOC)បានអញ្ជើញឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា(NOCC)ឲ្យធ្វើបទបង្ហាញពីរបៀបនៃការផ្សព្វផ្សាយវិស័យកីឡានៅប្រទេសកម្ពុជា បន្ទាប់ពីស្ថាប័នកីឡាអន្តរជាតិមួយនេះចាប់អារម្មណ៍នឹងការផ្សព្វផ្សាយយ៉ាងទូលំទូលាយរបស់ថ្នាក់ដឹកនាំកីឡាកម្ពុជា។

ឯកឧត្តម វ៉ាត់ ចំរើន បានចូលរួមមហាសន្និបាតគណៈកម្មាធិការអូឡាំពិកអន្តរជាតិលើកទី៣៤ នៅទីក្រុង Ashgabat ប្រទេសទួរមេនីស្ថានតាំងពីថ្ងៃទី១៦ ខែកញ្ញា និងចូលរួមកម្មវិធីផ្សេងៗមួយចំនួនទៀតដែលឯកឧត្តមអគ្គលេខាធិការបានចំណាយពេលជាច្រើនថ្ងៃទើបបានវិលត្រឡប់មកកម្ពុជាវិញកាលពីដើមសប្តាហ៍កន្លងទៅនេះ។

ក្នុងឱកាសបំពេញការងាររយៈពេលវែងនេះ ឯកឧត្តម បានឲ្យដឹងថា កម្ពុជាទទួលបានលទ្ធផលសំខាន់ពីរគឺទី១ទទួលបានការវាយតម្លៃកោតសរសើរខ្ពស់អំពីការផ្សព្វផ្សាយកីឡានៅកម្ពុជា និងទីពីរទទួលបានចំណេះដឹងកាន់តែច្បាស់អំពីរបៀបនៃការរៀបចំព្រឹត្តិការណ៍កីឡាដែលកម្ពុជាត្រៀមខ្លួនធ្វើម្ចាស់ផ្ទះកីឡាស៊ីហ្គេមឆ្នាំ២០២៣។

ឯកឧត្តមមានប្រសាសន៍ថា ៖«ក្នុងឱកាសនោះ IOC បានអញ្ជើញខ្ញុំឲ្យបង្ហាញពីរបៀបផ្សព្វផ្សាយកីឡាទៅកាន់មហាជន គេចង់ដឹងថា យើងធ្វើបែបណាបានជាការផ្សព្វផ្សាយរបស់យើងទូលំទូលាយ ហើយអ្នកនៅក្រៅប្រទេសក៏បានដឹងច្រើនអំពីកីឡានៅស្រុកខ្មែរយើង»។

គណៈកម្មាធិការអូឡាំពិកអន្តរជាតិបានចាប់អារម្មណ៍ខ្លាំងចំពោះសកម្មភាពកីឡានៅកម្ពុជាក្នុងរយៈពេលប៉ុន្មានឆ្នាំចុងក្រោយនេះ និងបានវាយតម្លៃខ្ពស់ថា កម្ពុជាស្ថិតក្នុងចំណោមប្រទេសកំពូល១០លើគេនៅទ្វីបអាស៊ីដែលផ្សព្វផ្សាយពីវិស័យកីឡាបានទូលំទូលាយ។

«IOC បានវាយតម្លៃថា យើងអាចស្ថិតក្នុងចំណោមប្រទេសលើគេ១០ប្រទេសក្នុងចំណោមប្រទេសនៅអាស៊ីជាង៤០ប្រទេស។ គេបានដឹងអំពីសកម្មភាពកីឡានៅកម្ពុជាច្រើន»។ ឯកឧត្តម វ៉ាត់ ចំរើន បានប្រសាសន៍ និងបញ្ជាក់ថា ការផ្សព្វផ្សាយកីឡានៅក្នុងប្រទេសកម្ពុជាភាគច្រើនខុសនឹងបណ្តាផ្សេងនៅអាស៊ី។ ស្ថាប័នកីឡានៅកម្ពុជាចាប់ដៃគូនឹងស្ថាប័នព័ត៌មានដើម្បីផ្សព្វផ្សាយអំពីកីឡា ដូច្នេះងាយស្រួលក្នុងផ្ដល់ព័ត៌មានរាល់មានព័ត៌មាន និងព្រឹត្តិការណ៍កីឡា។ ចំពោះប្រទេសគេវិញភាគច្រើនផ្ដល់សិទ្ធិឲ្យទៅស្ថាប័នផ្សព្វផ្សាយណាមួយឲ្យចែកចាយការផ្សព្វផ្សាយទៅស្ថាប័នព័ត៌មានផ្សេងទៀត ដូច្នេះការចែករំលែកបែបនេះគឺមិនទូលំទូលាយទេ ពីព្រោះត្រូវការចំណាយប្រាក់ទើបអាចទទួលបានសិទ្ធិចែកចាយបន្ត។

ឯកឧត្តមអគ្គលេខាធិការបានបញ្ជាក់ថា ជាក់ស្ដែងនៅក្នុងព្រឹត្តិការណ៍ប្រកួតកីឡាស៊ីហ្គេមរយៈពេលពីរលើកកន្លងមកនេះ គណៈកម្មាធិការជាតិអូឡាំពិកកម្ពុជា ក៏ដូចជាសហព័ន្ធកីឡានីមួយៗបានសហការជាមួយស្ថាប័នផ្សព្វផ្សាយយ៉ាងល្អ និងចែករំលែកព័ត៌មានយ៉ាងទូលំទូលាយដែលធ្វើឲ្យស្ថាប័នកីឡាអន្តរជាតិចាប់អារម្មណ៍នឹងការផ្សព្វផ្សាយរបស់កម្ពុជា។

ឯកឧត្តមបន្ថែមទៀតថា គោលការណ៍សំខាន់ពីរដែលងាយធ្វើឲ្យគេចាប់អារម្មណ៍គឺទី១ រៀបចំការប្រកួតបែបកីឡាជំនាញដើម្បីស្វែងរកជយលាភីពិតប្រាកដ និងទីពីរការរៀបចំព្រឹត្តិការណ៍កីឡាបែបព្រឹត្តិការណ៍ដូចជានៅក្នុងពិធីបុណ្យសមុទ្រ បុណ្យទន្លេ ឬចូលឆ្នាំប្រពៃណីខ្មែរជាដើមសុទ្ធតែមានសកម្មភាពកីឡា។

ក្រៅពីធ្វើបទបង្ហាញ និងទទួលបានការវាយតម្លៃខ្ពស់អំពីការផ្សព្វផ្សាយកីឡា ថ្នាក់ដឹកនាំគណៈកម្មាធិការជាតិអូឡាំពិកកម្ពុជាក៏សិក្សាស្វែងយល់កាន់តែច្បាស់អំពីរបៀបនៃការរៀបចំព្រឹត្តិការណ៍កីឡាដែលកម្ពុជាគ្រោងធ្វើម្ចាស់ផ្ទះការប្រកួតស៊ីហ្គេមឆ្នាំ២០២៣។ លើសពីនេះស្ថាប័នកីឡាអន្តរជាតិថែមទាំងត្រៀមជួយដល់គណៈកម្មាធិការជាតិអូឡាំពិកកម្ពុជាអំពីការបណ្តុះបណ្តាលធនធានមនុស្សសម្រាប់ស៊ីហ្គេមឆ្នាំ២០២៣៕