រឿងពិតពីក្រោយរូបថតដ៏សែនល្បី ដែលបានបំផ្លាញអនាគតតារាម៉ូដែលម្នាក់

2015-10-10 17:11:16
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់អ្នកប្រើអ៊ីនធឺណិត ប្រាកដជាគ្មានអ្នកណាមិនធ្លាប់ឃើញរូបថតមួយសន្លឹកនេះឡើយ។ បង្ហាញពីគ្រួសារមួយដែលមានឪពុកម្ដាយស្រស់ស្អាត ក៏ប៉ុន្តែកូនៗវិញមិនដឹងកាត់ទៅអ្នកណា រូបនេះត្រូវបានគេសរសេរភ្ជាប់ថា "អ្វីដែលអ្នកត្រូវបារម្ភនោះគឺត្រូវឆ្លើយសំណួររបស់កូនៗបែបណា"។

តួឯកស្រីក្នុងរូបគឺ តារាម៉ូដែលតៃវ៉ាន់ Heidi Yeh ដែលធ្លាប់ថតពាណិជ្ជកម្មឲ្យក្រុមហ៊ុនធំៗជាច្រើន ក៏ដូចជាលេចមុខក្នុងវីដេអូចម្រៀងមួយចំនួនកន្លងមក បាននិយាយថានាងស្ដាយក្រោយបំផុតដែលបានថតរូបមួយសន្លឹកនេះ ដោយសារវាបានធ្វើឲ្យជីវិតរបស់នាង៣ឆ្នាំចុងក្រោយនេះ ដូចជាធ្លាក់នរកទាំងរស់។

នៅក្នុងសន្និសីទកាសែតមួយកាលពីថ្ងៃពុធ Yeh បាននិយាយទាំងទឹកភ្នែកថា តាំងពីរូបនោះល្បីល្បាញលើបណ្ដាញអ៊ីនធឺណិតមក ការងាររបស់នាងបានដាំក្បាលចុះទាំងនៅតៃវ៉ាន់ និងនៅប្រទេសផ្សេងៗ។

Yeh និយាយថានាងបានចុះកិច្ចសន្យាជាមួយក្រុមហ៊ុនម៉ូដែលមួយក៏ដូចជាក្រុមហ៊ុនផ្សព្វផ្សាយ J. Walter Thompson (JWT) ក្នុងការថតរូបមួយនេះ ដើម្បីជាការផ្សាយពាណិជ្ជកម្មឲ្យគ្លីនិកកែសម្ផស្សមួយ។ ក្នុងកិច្ចសន្យានោះ រូបថតខាងលើអាចប្រើប្រាស់សម្រាប់តែការបោះពុម្ពផ្សាយដូចជាកាសែតនិងទស្សនាវដ្ដីប៉ុណ្ណោះ។ ប៉ុន្តែមិនបានប៉ុន្មាន គ្លីនិកកែសម្ផស្សមួយទៀតបានយករូបថតនេះទៅប្រើប្រាស់ក្នុងយុទ្ធនាការផ្សព្វផ្សាយតាមអ៊ីនធឺណិតរបស់ខ្លួន ដែលធ្វើឲ្យរូបនេះក្លាយជារូបល្បីពេញពិភពលោកក្នុងរយៈពេលដ៏ខ្លី។

រឿងរ៉ាវប្រឌិតមួយដែលនិយាយពីបុរសម្នាក់បានប្ដឹងភរិយារបស់ខ្លួនដោយសារកូនៗមានមុខអាក្រក់ ត្រូវបានចេញផ្សាយដោយគេហទំព័រ Heilongjiang និងបានក្លាយជារឿងល្បីលើបណ្ដាញអ៊ីនធឺណិត ក្រោយពីសារព័ត៌មានអន្តរជាតិនានាបានយករូបថតខាងលើនេះមកភ្ជាប់ជាមួយនឹងសាច់រឿង។ តាំងពីពេលនោះមក រូបនេះត្រូវបានគេយកមក Troll និងបង្កើតជាសាច់រឿងផ្សេងៗរាប់មិនអស់។

ជាលទ្ធផល តារាម៉ូដែល Yeh បាននិយាយថានាងបានខាតបង់សរុបជាទឹកប្រាក់ជាង ៤លានដុល្លារតៃវ៉ាន់ (ជាង ១២ម៉ឺនដុល្លារអាមេរិក) ខណៈដែលក្រុមហ៊ុនផ្សេងៗឈប់ហៅនាងថត។ អ្វីដែលកាន់តែធ្វើឲ្យនាងឈឺចាប់នោះ គឺព័ត៌មានដែលគេប្រឌិតថានាងជាមនុស្សស្រីបោកប្រាស់ និងបានវះកាត់កែសម្ផស្សដើម្បីបានរៀបការ។

បច្ចុប្បន្ន Yeh កំពុងប្ដឹងក្រុមហ៊ុន JWT និងគ្លីនិកដែលយករូបនាងទៅប្រើខុសកិច្ចសន្យា ទាមទារសំណងចំនួន ៥លានដុល្លារតៃវ៉ាន់ (ជាង១៥ម៉ឺនដុល្លារអាមេរិក)។

Simple Beauty ដែលជាគ្លីនិកដែលយករូបរបស់នាងមកប្រើតាម Online បានចេញការបកស្រាយលើ Facebook Page របស់ខ្លួនថា ពួកគេបានទាក់ទងក្រុមហ៊ុន JWT ដើម្បីយករូបនេះមកប្រើដោយមានលក្ខខណ្ឌត្រឹមត្រូវ។ គេបានបន្ថែមថា រាល់បញ្ហានានាគឺជាការដោះស្រាយរវាងនាងនិងក្រុមហ៊ុន JWT តែប៉ុណ្ណោះ។

ដោយឡែកក្រុមហ៊ុន JWT បានឲ្យដឹងថាគេកំពុងតែរៀបចំឲ្យមេធាវីប្ដឹងបកវិញ ដោយបានអះអាងថា ការចោទប្រកាន់របស់ Yeh គឺជារឿងមិនពិតនិងធ្វើឲ្យខូចខាតដល់កេរ្តិ៍ឈ្មោះក្រុមហ៊ុនរបស់គេ ៕