វីដេអូពីហេតុការណ៍បាក់រនាំងដែកធ្វើឲ្យមនុស្សស្លាប់ក្នុងការប្រគំតន្ត្រី KPOP ល្ងាចមិញ

2014-10-18 18:09:17
ចំនួនមតិ 0 | ចំនួនចែករំលែក 0

ចន្លោះមិនឃើញ

សារព័ត៌មានកូរ៉េ YTN News បានបង្ហាញវីដេអូមួយពីហេតុការណ៍បាក់រនាំងដែកនៅក្នុងការប្រគំតន្ត្រីនៅទីក្រុង Seongnam ប្រទេសកូរ៉េខាងត្បូង កាលពីម្សិលមិញ ដែលមើលទៅក្រុមចម្រៀង 4Minute ដែលកំពុងសម្ដែងលើឆាកហាក់មិនដឹងពីហេតុការណ៍នេះឡើយ។

ហេតុការណ៍នេះបានកើតឡើងកាលពីល្ងាចថ្ងៃទី១៧ ខែតុលា នៅពេលមនុស្សជាច្រើននាក់បានមកផ្ដុំគ្នាលើរនាំងដែកខ្យល់ចេញចូលសម្រាប់ផ្លូវក្រោមដីរហូតដល់បាក់ ធ្វើឲ្យមនុស្សចំនួន ២៧នាក់ធ្លាក់ចុះទៅក្រោមជម្រៅជាង ១០ម៉ែត្រ។ របាយការណ៍ចុងក្រោយបានឲ្យដឹងថា មនុស្សចំនួន ១៦នាក់បានស្លាប់ និង១១នាក់ទៀតរងរបួសធ្ងន់។

ជនរងគ្រោះដែលបានស្លាប់ភាគច្រើនជាបុរសដែលមានវ័យ ៣០ ទៅ ៤០ឆ្នាំ ហើយអាយុខ្ទង់ ២០ឆ្នាំ គឺមានតែពីរទៅបីនាក់ប៉ុណ្ណោះ ប៉ុន្តែមិនមានសិស្ស ឬនិស្សិតនោះទេ។ ក្នុងការប្រគំតន្ត្រីនោះមានមនុស្សចូលរួមប្រហែល ១ពាន់នាក់ ដែលក្រុមសន្តិសុខបានហាមឃាត់ជាច្រើនលើកកុំឲ្យមនុស្សឡើងឈរលើរនាំងដែកនោះ ប៉ុន្តែពួកគេនៅតែឡើងដើម្បីបានមើលការសម្ដែងច្បាស់។

នៅវេលាម៉ោង ១០:៣០នាទី យប់ លោកនាយករដ្ឋមន្ត្រី Jung Hongwoon បានចុះទៅដល់កន្លែងកើតហេតុដើម្បីពិនិត្យមើលស្ថានភាពដោយផ្ទាល់។

ជនរងគ្រោះផ្សេងទៀតកំពុងទទួលការព្យាបាលនៅមន្ទីរពេទ្យ CHA Bundang Medical Center, Bundang Jesaeng Hospital, និង Samsung Hospital។