ដួង ម៉ានិច ទោះបីត្រូវញ៉ាំម្ទេសហឹរប៉ុណ្ណាមិនខ្វល់ សំខាន់បានជួយអ្នកក្រីក្រ

2015-10-29 18:23:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែមើលឃើញកុមារតូចៗនិងមនុស្សចាស់ជរាមួយចំនួនកំពុងតែជួបប្រទះនៅតាមដងផ្លូវ បានធ្វើឲ្យតារាសម្តែង ដួង ម៉ានិច កើតមានក្តីអាណិតអាសូរជាពន់ពេក ម្ល៉ោះហើយនាងបានបង្កើតជាវីដេអូមួយដោយធ្វើការញ៉ាំម្ទេសក្នុងគោលបំណងរកថវិកាជួយដល់ពួកគេទាំងនោះទោះបីដឹងថាការញ៉ាំម្ទេសនោះហឹរយ៉ាងណាក៏ដោយ។

មុននឹងឈានដល់ការបកស្រាយឲ្យលម្អិត ដួង ម៉ានិច សុំធ្វើការពន្យល់ថាហេតុអ្វីបានជាជ្រើសរើស យកផ្លែម្ទេសមកធ្វើជាល្បែងក្នុងការរៃអង្គាសថវិកានេះ? ចម្លើយ នាងប្រាប់ថា ម្ទេស គឺជាផ្លែមួយដែលមានរសជាតិហឹរ កាលណាទទួលទានវាចូលក្នុងពោះ វានឹងធ្វើឲ្យមានអារម្មណ៍ថាក្រហល់ក្រហាយពិបាកទ្រាំ ជាមួយគ្នានេះនាងចង់បញ្ជាក់បន្ថែមគឺមិនមែនចង់ប្រៀបធៀបពួកគេទាំងនោះឲ្យញ៉ាំម្ទេសដែរនោះទេ គ្រាន់តែចង់ធៀបរឿងពួកគេគ្មានអ្វីហូបចុក តើពិបាកទ្រាំប៉ុណ្ណា?

“អូនអើយ...ពេលបងចេញពីថតម្តងៗគឺយប់ជ្រៅណាស់ហើយ ក្មេងតូចៗដែលមកសុំលុយបងនិងអ្នកដទៃតាមផ្លូវ មើលទៅគួរឲ្យសង្វែកណាស់។ បងបានឈប់សួរ ហើយពួកគេប្រាប់ថា ឃ្លានណាស់ អូនឯងគិតមើលម៉ោង ១១ ជិត១២ ទៅហើយ គេមិនទាន់បានអីញ៉ាំទេអូន។ បងឃើញបែបនេះបងបានគិតថាថ្ងៃណាទំនេរពីការថតបន្តិចនឹងឆ្លៀតធ្វើវីដេអូរៃអង្គាសប្រាក់ដើម្បីជួយពួកគេ ឥឡូវនេះបងបានធ្វើហើយ"។ ម៉ានិច ថ្លែងប្រាប់ Sabayមុននេះ។

តួស្រីក្នុងរឿង "ផ្កា៤ទង" បន្តទៀតថាត្បិតការធ្វើរៃអង្គាសថវិកាបែបនេះមិនបានជួយដល់មនុស្សគ្រប់គ្នាក៏ដោយ ប៉ុន្តែ វាជាទឹកចិត្តមួយដែលផុសចេញពីបេះដូង ព្រោះនាងបានជួបផ្ទាល់ទិដ្ឋភាពលើកដៃសុំលុយទាំងយប់អាធ្រាត្រ រួមទាំងមិនទាន់បានទទួលទានអ្វីបន្តិចសោះ។

ទន្ទឹមនឹងការងារកំពុងតែមានការមមាញឹករកពេលដកឃ្លាញ៉ាំបាយមិនបាន ម៉ានិច ប្រាប់ថាទោះយ៉ាងណាក៏ត្រូវធ្វើការងារជួយក្មេង និងមនុស្សទាំងនោះឲ្យបានសម្រេចផងដែរ ។បើទោះជា Game ដែលនាងលេងតម្រូវឲ្យញ៉ាំម្ទេស ក៏នាងមិនខ្លាចដែរសំខាន់នាងត្រូវរកថវិកាឲ្យបានច្រើនដើម្បីជួយពួកគេទាំងនោះ ដោយសារនាងធ្លាប់ជួបលំបាក អីចឹងនាងយល់ពី អារម្មណ៍នៃការអត់ឃ្លាន គ្មានអ្វីហូបដូចអ្វីដែលពួកគាត់កំពុងតែជួបប្រទះ។

"មិនថាតែបងទេដែលមិនចេះញ៉ាំម្ទេស បងៗមួយចំនួនដែលបងបាន Tag ឲ្យពួកគាត់ក៏មិនចេះញ៉ាំដែរ ប៉ុន្តែដើម្បីក្មេងកំព្រា និងអ្នកលំបាកទាំងនោះ ពួកបងត្រូវតែទ្រាំញ៉ាំ។ អូនអើយពេលដែលបងញ៉ាំម្ទេសចូលក្នុងខ្លួនភ្លាម អារម្មណ៍បងក្រហល់ក្រហាយរកអ្វីមកប្រៀបមិនបានទេ ត្រចៀកក៏ហ៊ឹង ពិបាកទ្រាំក្នុងខ្លួនណាស់ ប៉ុន្តែដើម្បីរកថវិកាជួយពួកគេបងត្រូវតែទ្រាំ"។ ម៉ានិច បន្ថែម។

ទាក់ទិននឹងការលេងល្បែងដើម្បីរកថវិកាជួយអ្នកក្រខ្សត់តាមផ្លូវ ម៉ានិច ប្រាប់ថា ចាប់ផ្ដើមតាំងពីថ្ងៃ ទី២៥ មកដល់ថ្ងៃនេះបានរយៈពេល៣ថ្ងៃ ហើយទទួលបានទឹកប្រាក់ ៨០$ផងដែរ។ នៅថ្ងៃទី០៥ ខែក្រោយជាថ្ងៃដែលនាងឈប់ទទួលថវិកា ហើយចាប់ផ្ដើមរៀបចំធ្វើម្ហូបទៅចែកជូនអ្នកក្រខ្សត់នានានៅតាមដងផ្លូវ៕

លាង សុផាឡែន ថតរឿងមិនយកកម្រៃ ត្បិតចង់ជួយយុវជនខ្មែរ

នាយក្រឹម ថា៖ភាពយន្តខ្មែរឥឡូវដូចភ្លើងចំបើង

អត្ថបទ៖ ថា ម៉ាលីដា