គន្លឹះ៨យ៉ាង រៀបចំការងារជាក្រុមមានប្រសិទ្ធភាព

2015-11-10 21:31:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កិច្ចការងារជាក្រុមមួយដំណើរការល្អរលូនទៅមុខ គឺអាស្រ័យការសាមគ្គីគ្នា រួមទាំងការខិតខំប្រឹងប្រែងទាំងអស់គ្នា ទាំងអ្នកដឹកនាំក្រុម និងសមាជិក។ ការងារជាក្រុមប្រៀបដូចជាខ្សែសង្វាក់ផលិតកម្មគ្រឿងម៉ាស៊ីនដែលមិនអាចខ្វះបាននូវផ្នែកណាមួយ ប្រៀបដូចទៅនឹងការខិតខំប្រឹងប្រែងរបស់សមាជិកក្នុងក្រុមមិនអាចខ្វះបាន។ ខាងក្រោមនេះជាចំណុចមួយចំនួននៃការរៀបចំគ្រប់គ្រងការងារជាក្រុមឲ្យមានប្រសិទ្ធភាព៖

១. រក្សាទំនាក់ទំនងល្អ

ការងារជាក្រុមក្នុងគម្រោងណាមួយ ឬដើម្បីសម្រេចគោលដៅណាមួយ នឹងរលូនទៅមុខបើសមាជិកក្នុងក្រុមទាំងអស់ចេះសហការគ្នាស្រុះស្រួលគ្នាដូចខ្សែចង្វាក់ ដូចនេះទំនាក់ទំនងល្អប្រសើរជាចំណុចសំខាន់គួររក្សាឲ្យបានល្អក្នុងក្រុមទាំងសមាជិកកូនចៅ និងមេដឹកនាំ។ ការរក្សាទំនាក់ទំនងល្អ ការលើកទឹកចិត្តឲ្យសមាជិកក្នុងក្រុមចេះបញ្ចេញមតិយោបល់ចូលរួមពេលមានបញ្ហាអ្វីមួយកើតឡើង ចូលរួមគ្នាដោះស្រាយបញ្ហាគឺធ្វើឲ្យការងារបានប្រសើរព្រមទាំងបង្ហាញពីភាពជិតស្និទ្ធរវាងមេនិងកូនចៅផងដែរ។

២. បង្កើនទំនាក់ទំនងវិជ្ជមាន

វាមានសារៈសំខាន់ដែលត្រូវដឹងឬស្គាល់ពីចរិតសមាជិកម្នាក់ៗក្នុងក្រុម អ្វីដែលពួកគេចាប់អារម្មណ៍និងចូលចិត្តផ្នែកអ្វី។ នៅពេលដែលស្គាល់ពីពួកគេបានច្បាស់នោះ គឺវានឹងបង្កើតនូវទំនាក់ទំនងល្អនិងភាពជិតស្និទ្ធដ៏រឹងមាំមួយផងដែរ។

៣. លើកទឹកចិត្តក្នុងការងារ

ជាប្រធានក្រុម ឬអ្នកដឹកនាំក្រុមមិនគួរផ្ដល់នូវការរិះគន់ក្នុងន័យបន្ទោសបង្អាប់សមាជិកណាម្នាក់នោះទេ។ ផ្ទុយទៅវិញការផ្ដល់ជាយោបល់រិះគន់ក្នុងន័យស្ថាបនាលើកបញ្ហាជារួម និងស្វែងរកដំណោះស្រាយ គឺជាសញ្ញាល្អមួយទៅវិញជួយផ្ដល់ជាទំនុកចិត្ត និងឲ្យសមាជិកពេញចិត្តចូលរួមការងារទៅថ្ងៃក្រោយទៀត។ វាគឺជាការលើកទឹកចិត្តនៃការខិតខំប្រឹងប្រែងនិងធ្វើឲ្យពួកគេខំប្រឹងធ្វើឲ្យប្រសើរជាងមុន។

៤. ស្មោះត្រង់ចេះជួយគ្នា

ជាអ្នកដឹកនាំក្រុមមិនមែនទាល់តែជាមនុស្សឥតខ្ចោះនោះទេ ប្រសិនបើដឹកនាំក្រុមមិនច្បាស់ត្រង់កន្លែងណាមួយឬត្រូវការជំនួយណាមួយពីកូនក្រុម គួរពិភាក្សាគ្នាដោយត្រង់ៗ។ ហើយការធ្វើបែបនេះក៏បង្កើននូវភាពជិតស្និទ្ធ និងធ្វើឲ្យការងារក្រុមរលូនទៅមុខដោយចេះជួយគ្នាក្នុងការដោះស្រាយបញ្ហាដែលរាំងស្ទះដល់ការងារ។

៥. ម៉ត់ចត់ក្នុងការងារ និងគោរពតាមវិន័យ

ក្នុងកិច្ចការងារជាក្រុម អ្នកដឹកនាំក្រុមគឺប្រាកដណាស់ត្រូវគោរពឲ្យតម្លៃការងារ និងជាពិសេសភាពម៉ត់ចត់ក្នុងការងារតែម្ដងហើយវាជាគំរូល្អដល់សមាជិកក្នុងក្រុមដទៃទៀតផងដែរ។

៦. ចាត់ចែងបែងចែកការងារចំជំនាញ

បន្ទាប់ពីការយល់ចិត្តរួមជាមួយការប្រាស្រ័យទាក់ទងគ្នាក្នុងក្រុមបានល្អ គឺមកដល់ការចាត់ចែងបែងចែកការងាររបស់សមាជិកម្នាក់ៗទៅតាមជំនាញឬទេពកោសល្យ។ ការងារចំចំណេះជំនាញរួមទាំងភាពពេញចិត្តរបស់ពួកគេផ្ទាល់នឹងធ្វើឲ្យកិច្ចដំណើរការបានរហ័សល្អនិងប្រសិទ្ធភាពនិងគុណភាព។

៧. ដោះស្រាយភ្លាមៗពេលបញ្ហាជម្លោះកើតឡើង

នៅពេលមានបញ្ហាជម្លោះកើតឡើងក្នុងការងារ គឺមិនត្រូវរំលងចោលមិនដោះស្រាយវាឡើយ។ ពេលមានបញ្ហាបែបនេះកើតឡើងគឺត្រូវដោះស្រាយភ្លាមៗ និងលើកឡើងមកពិភាក្សាឲ្យចំៗ។

៨. ជាគំរូល្អឲ្យគ្នា

គំរូល្អជាភាពជំរុញទឹកចិត្តមួយជាលក្ខណៈវិជ្ជមានមិនថាក្នុងការងារ និងការសិក្សានោះទេ វាជាធាតុសំខាន់ដែលធ្វើឲ្យសមាជិកក្រុមចេះគោរពអ្នកដឹកនាំក្រុម និងគោរពគ្នាទៅវិញទៅមកនិងអភិវឌ្ឍខ្លួនដោយយកគំរូតាម។ ដូចនេះស្មារតីនៃការអភិវឌ្ឍខ្លួននិងការជួយជ្រោមជ្រែងកិច្ចការក្នុងក្រុមគឺជាជាភាពចាំបាច់មួយក្នុងកិច្ចការងារជាក្រុម៕

ចុចអាន៖ បើធុញថប់តប់ប្រម៉ល់ខ្លាំង សាកវិធី៨យ៉ាងនេះ

ចុចអាន៖ ពេលផ្ញើ CV តាមអ៊ីម៉ែល ចៀសវាងកំហុស៤យ៉ាងនេះ

ប្រែសម្រួល៖ មាន រតនា ប្រភព៖ theundercoverrecruiter