សាំម៉ូរ៉ៃជប៉ុន អាចប្រហារតោកំណាចសិង្ហបុរីបានអត់យប់នេះ?

2015-11-12 16:57:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជើងខ្លាំងអាស៊ីសាំម៉ូរ៉ៃជប៉ុន នឹងធ្វើដំណើរទៅប៉ះម្ចាស់ផ្ទះតោកំណាចសិង្ហបុរី ក្នុងការប្រកួតជម្រុះ 2018 World Cup ពូល E វេលាម៉ោង០៦:១៥នាទីព្រលប់ថ្ងៃនេះ។

ក្រុមដែលស្ថិតនៅពូលជាមួយកម្ពុជាទាំង២នេះ ប៉ះគ្នាកាលជើងទី១ គឺបញ្ចប់លទ្ធផល ០-០ នៅទឹកដីជប៉ុន ខណៈដែលអ្នកចាំទី Izwan Mahbud របស់សិង្ហបុរី បានក្លាយជាវីរបុរស ព្រោះជួយសង្គ្រោះបាល់បានយ៉ាងច្រើន។

សម្រាប់ប្រកួតយប់នេះវិញ គ្រូបង្វឹកសិង្ហបុរីលោក Bernd Stange សុំត្រឹមតែ១ពិន្ទុក៏ពេញចិត្តណាស់ហើយ ដោយលោកនិយាយថា៖ "ប្រកួតនេះ នឹងចាប់ផ្ដើមលទ្ធផល ០-០ ដូច្នេះមានន័យថា យើងនឹងចាប់ផ្ដើមជាមួយ១ពិន្ទុក្នុងដៃ ហើយយើងត្រូវតែការពារ១ពិន្ទុនោះឲ្យបាន”។

រីឯគ្រូបង្វឹកជប៉ុន លោក Vahid Halilhodzic បានលើកឡើងថា ក្រុមលោកត្រូវតែសងសឹក និងយកឈ្នះឲ្យបាន។ បុរសសញ្ជាតិបូស្នីវ័យ៦៣ឆ្នាំរូបនេះ បាននិយាយថា៖ "យើងមានអនុស្សាវរីយ៍អាក្រក់ជាមួយសិង្ហបុរី កាលជើងទី១ ដូច្នេះយើងត្រូវតែសងសឹក។ តាមពិតសិង្ហបុរី មានក្រុមល្អតំណាងឲ្យប្រទេសគេ ប៉ុន្តែយើងត្រូវតែតាំងចិត្តយកជ័យជម្នះឲ្យបាន”។

ជប៉ុន កំពុងឈរនៅចំណាត់ថ្នាក់លេខ២ មាន១០ពិន្ទុស្មើសិង្ហបុរី ដែលឈរនៅលេខ៣ ខណៈដែលស៊ីរី មាន១២ពិន្ទុស្ថិតនៅកំពូលតារាងពូល E៕