ក្រុមហ៊ុនផលិតភាពយន្តថៃដ៏ល្បី ប្រកាសរំលាយចោលចុងឆ្នាំនេះ

2015-11-14 17:40:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតខ្សែភាពយន្តថៃដ៏ល្បីមួយរបស់ប្រទេសថៃ គឺ GMM Tai Hub Co Ltd ហៅកាត់ថា GTH បានប្រកាសថា នឹងរំលាយចោលនាចុងឆ្នាំនេះហើយ បន្ទាប់ពីមានបញ្ហាផ្ទៃក្នុងរបស់ក្រុមហ៊ុនខ្លួន។

យោងតាមប្រភពព័ត៌មាន Bangkok Post ក្រុមហ៊ុន GTH ដែលគេស្គាល់ថា ជាក្រុមហ៊ុនផលិតរឿងល្បីជាច្រើន តួយ៉ាងដូចជារឿងថៃ " Pee Mak " "Hear Attack" ជាដើម គឺបានប្រកាសនៅក្នុងវិបសាយផ្ទាល់ខ្លួនកាលពីថ្ងៃសុក្រម្សិលមិញនេះថា នឹងរំសាយចោលជាផ្លូវការនៅថ្ងៃ ទី៣១ ខែធ្នូឆ្នាំ២០១៥ខាងមុខ។

តាមការប្រកាសក្នុងវិបសាយរបស់ខ្លួន GTH មានបញ្ហាផ្ទៃក្នុងក្រុមហ៊ុនដោយមានទំនាស់ម្ចាស់ភាគហ៊ុនដែលដោះស្រាយមិនចេញ។ GTH គឺជាការចូលរួមភាគហ៊ុនគ្នារវាងក្រុមហ៊ុនចំនួន៣ គឺ ក្រុមហ៊ុន GMM Grammy (៥១ភាគរយ) ក្រុមហ៊ុន Tai Entertainment Co Ltd (៣០ភាគរយ) និងចុងក្រោយ Hub Ho Hin Bangkok Co Ltd (១៩ភាគរយ)។

ចំពោះមូលហេតុដែលមានប្រកាសតាមវិបសាយ គឺតំណាងភាគហ៊ុន Tai Entertainment ចង់ចុះបញ្ជី GTH ក្នុងទីផ្សារមូលបត្រដើម្បីបង្កើនមូលនិធិក្នុងគោលដៅពង្រីកគម្រោង និងអាជីវកម្មរបស់ខ្លួន ប៉ុន្តែ តំណាងភាគហ៊ុន Hub Ho Hin បានបដិសេធសំណើខាងលើដោយយល់ថា វាជាសម្ពាធមួយប៉ះពាល់ដល់ដំណើរការផលិត និងគុណភាពរបស់ GTH។

ទោះជាមានការយល់ព្រមតាមសំណើណាមួយនៃសំណើខាងលើពីតំណាងភាគហ៊ុនធំ (GMM Grammy)ក៏ដោយ ខាងតំណាងភាគហ៊ុន Tai Entertainment និង Hub Ho Hin នៅតែមិនអាចស្វែងរកដំណោះស្រាយលើបញ្ហានោះបានដែរ ទីបំផុតដៃគូភាគហ៊ុនរបស់ GTH បានសម្រេចចិត្តរំសាយក្រុមហ៊ុនតែម្ដង។

រំលឹកផងដែរថា GTH ជាក្រុមហ៊ុនផលិតភាពយន្តល្បីៗជាច្រើនក្នុងប្រទេសថៃ ដែលដំណើររយៈពេលជាង១០ឆ្នាំមកហើយគឺចាប់តាំងពីឆ្នាំ២០០៣។ GTH បានផលិតរឿងដែលមានការគាំទ្រច្រើន ដូចជា រឿង Pee Mak រឿង I Fine, Thank You, Love You និងរឿងភាគល្បីតាមទូរទស្សន៍ ដូចជា Hormones the Series និង True Love Next Door ជាដើម៕

ចុចអាន៖ បាត់ឪពុកយូរឆ្នាំ ដល់ពេលរកឃើញ ជាអ្នកចម្រៀងនៅថៃ

ចុចអាន៖ កម្រងរូបភាពផ្អែមល្ហែមតួស្រី ម៉េណា និងមិត្តប្រុស March រយៈពេលជាង១ឆ្នាំ

ប្រែសម្រួល៖ មាន រតនា ប្រភព៖ bangkokpost