បើស្រលាញ់នារីម្នាក់ អ្នកគិតអតីតកាលរបស់នាងទេ?

2015-11-17 15:40:51
ចំនួនមតិ 0 | ចំនួនចែករំលែក 0

ចន្លោះមិនឃើញ

គេតែងលើកថា «មនុស្សប្រុសប្រៀបដូចជាមាសទឹកដប់» បើទោះមានរឿងអាស្រូវស្នេហាក្ដី នៅតែអាចលាងជ្រះ តែបើនារីវិញអាចពិបាកនឹងប្រឈមមុខនឹងសង្គម ដូច្នេះពេលស្រលាញ់នារីម្នាក់ តើប្រុសៗគិតពីអតីតកាលរបស់នាងដែរឬទេ?

រូបតំណាង

ផ្ដល់បទសម្ភាសន៍មុនគេ តារាសម្ដែងកូនភ្លោះ ស៊ិន សុភ័ក្ត្រ និយាយយ៉ាងច្បាស់ថា លោកនឹងមិនធ្វើរឿងបែបនេះឡើយ ព្រោះយល់ថា អតីតកាលគ្រាន់តែជាអ្វីដែលកន្លងហួសប៉ុណ្ណោះ អ្វីសំខាន់ បច្ចុប្បន្ន និងអនាគត។

មិនផ្ដោតលើជីវភាពខ្លាំងពេក សុភ័ក្ត្រ លើកឡើងថា ៖ "មិនថាគាត់មានប្រវត្តិល្អ ឬមិនល្អទេ សំខាន់គាត់ជានារីម្នាក់មានចរិតល្អថ្លៃថ្នូរ។ សម័យនេះយើងមិនអាចដឹងប្រវត្តិគេយ៉ាងម៉េចទេ ប៉ុន្តែបើសិនស្រលាញ់គ្នា ត្រូវចេះចាប់ដៃគ្នាកសាងជីវិតឱ្យរុងរឿង និងខំប្រកបរបររកស៊ីសមរម្យមួយក្នុងជីវិត"។

“ខ្ញុំស្រលាញ់នារីមានជីវភាពសមរម្យ ចេះទុកដាក់រឿងរកស៊ី ហើយខ្ញុំនឹងស៊ើបពីប្រវត្តិគេ ដើម្បីឱ្យដឹងថា ពីមុនគេយ៉ាងម៉េច" នេះជាសម្ដីចេញពីចិត្តរបស់ សុំ ម៉ាយ បុគ្គលិកភោជនីយដ្ឋានជប៉ុនមួយក្នុងទីក្រុងភ្នំពេញ។ បុរសវ័យ ២៥ ឆ្នាំ បញ្ជាក់ថា នារីសម័យឥលូវមិនដូចពីមុនទេ ពិបាកនឹងទុកចិត្ត ប៉ុន្តែបើលោកស្រលាញ់នារីណាម្នាក់ នារីនោះស្រលាញ់លោកវិញ លោកមិនគិតច្រើនទេ។ តែយុវជនរូបនេះ ក៏អន់ចិត្តបន្តិចដែរ បើដឹងថា នារីដែលខ្លួនស្រលាញ់ ធ្លាប់ជ្រុលជ្រួសជាមួយអ្នកមុននោះ។

សុំ ម៉ាយ បញ្ជាក់ថា៖ “មិនអីទេ! ធ្វើម៉េចយើងជួបក្រោយគេ...ឱ្យតែគេស្រលាញ់យើង និងធ្វើខ្លួនឱ្យល្អ ខ្ញុំមិនគិតទេអតីតកាល តែបើអត្តចរិតអត់ល្អ ខ្ញុំមិនអាចចាប់ដៃនាងចូលរោងការបានទេ"។

បើងាកមកមើល និងអានពីទស្សនៈរបស់ គឹម ឡាយ ឯណេះវិញ គឺថាបើនារីណាម្នាក់ដែលលោកត្រូវចិត្តហើយនោះ លោកមិនស៊ើបពីប្រវត្តិរបស់នាងឡើយ។ បើទោះក្នុងកំណាក់កាលស្រលាញ់គ្នាទៅវិញទៅមក ហើយដឹងថា នាងធ្លាប់មានប្រវត្តិមិនល្អជាមួយអ្នកមុនក្ដី ក៏លោកមិនប្រកាន់ និងនៅតែបន្តចំណងស្នេហ៍ដដែល។

“ចិត្តខ្ញុំផ្ទាល់ ខ្ញុំអត់ស៊ើបទេ សំខាន់តើគេស្រលាញ់យើងអត់? បើគេស្រលាញ់ អត់គិតរឿងពីមុនទេ។ ដូចខ្ញុំនិងសង្សារខ្ញុំចឹង យើងមិនប្រកាន់អតីតទេ តែគួរឱ្យស្ដាយយើងបានបែកគ្នាហើយ (ខាងស្រីសុំបែក)”។

រូបតំណាង

គេច្រើននិយាយថា បុរសសម្ដីផ្អែម មាត់ផ្សេងចិត្តផ្សេង បានឆ្ងាញ់មាត់ហើយ ដល់ត្រើយតែងសោយគូថ…តើមែនដែរឬទេ? មើលលើបរិបទសង្គមសព្វថ្ងៃ យុវជន គឹម ឡាយ ថ្លែងថា ស្រីៗក៏ត្រូវតែប្រុងប្រយ័ត្នខ្ពស់ដែរ ដើម្បីកុំអោយចាញ់កលល្បិចរបស់ប្រុសព្រាន។

“ស្រីត្រូវតែគិត វិភាគខ្លួនឯងដែរ មិនមែនគែនិយាយពាក្យផ្អែម អត់បានពិចារណា គិតថាគេល្អ ហើយផ្ដេសផ្ដាសជាមួយគេ។ មិនមែនប្រុសៗសុទ្ធតែល្អ ហើយក៏មិនមែនប្រុសៗសុទ្ធតែអាក្រក់ដែរ។ ក៏មានអ្នកខ្លះគេល្អដែរ នៅអោយស្ងៀម និងស្វែងយល់ពីគេ"។

អ្នកនឹងធ្វើអ្វី បើឪពុកម្ដាយមិនឱ្យអ្នករៀបការ ជាមួយមនុស្សដែលអ្នកស្រលាញ់

៧យ៉ាងអាចកើតជាស្នេហា តើអ្នកចូលចំណុចមួយណា?

អត្ថបទ៖ អ៊ុំ សុភក្តិ