ពី​មុន ​​គូ​ស្នេហ៍​​ដែល​បែក​គ្នា​នៅ​លើ​ Facebook ច្រើន​តែ​ធ្វើ​ការ​ Unfriend ឬ Block គ្នា ​​ប៉ុន្តែ​ឥឡូវ​នេះ​មាន​មុខងារ​ថ្មី​មួយ ​ដែល​បង្កើត​ឡើង​​​ដោយ​មិន​ចាំ​បាច់​ឲ្យ​គូ​ស្នេហ៍​ធ្វើ​ការ​ Unfriend ឬ Block គ្នា​​​ទៀត​នោះ​ឡើយ។​​

បណ្ដាញ​ Facebook បាន​បង្កើត​មុខងារ​ថ្មី​​ដែល​គេ​ហៅ​ថា​ “Break-up Tools” វា​នឹង​បង្ហាញ​ឡើង​​នៅ​ពេល​អ្នក​ប្រើ​ប្រាស់​ជា​គូ​ស្នេហ៍​ផ្ដាច់​ទំនាក់​ទំនង​គ្នា​លើ​ Facebook ។ មុខងារ​នេះ​​​នឹង​​សួរ​អ្នក​ប្រើ​ប្រាស់​ថា​​តើ​​គេ​ចង់​ឃើញ​​ព័ត៌មាន​​អំពី​គូ​ស្នេហ៍​ចាស់​ដូច​ជា​ ឈ្មោះ,​ រូប​ Profile និង​ព័ត៌មាន​ដទៃ​ទៀត​លើ​ News Feed របស់​គេ​ឬ​យ៉ាង​ណា។ នៅ​ពេល​ដែល​កំណត់​​ថា​​មិន​ចង់​ឃើញ​នោះ​ការ​បង្ហោះ​របស់​គូ​ស្នេហ៍​ចាស់​នឹង​មិន​បង្ហាញ​លើ​ News Feed ឡើយ​ ហើយ​ឈ្មោះ​របស់​គេ​ក៏​នឹង​មិន​ត្រូវ​បាន​បង្ហាញ​ដែរ​ ប្រសិន​បើ​គេ Comment ត្រូវ​បាន​​​ Tag លើ​ Post អ្វី​មួយ។

អ្នក​ប្រើ​ប្រាស់​ក៏​អាច​កំណត់​​បាន​ថា ​អ្នក​ណា​ខ្លះ​ដែល​អាច​មើល​ឃើញ​ Post ចាស់ៗ​របស់​គេ​ជា​មួយ​នឹង​អតីត​​គូ​ស្នេហ៍​បាន​ មិន​តែ​ប៉ុណ្ណោះ​ក៏​អាច​ធ្វើ​ការ​ Untag ចេញ​ពី​ Post ចាស់ៗ​ជា​មួយ​នឹង​ស្នេហា​ចាស់​បាន​ផង​ដែរ។ Kelly Winters អ្នក​គ្រប់​គ្រង​ខាង​ផ្នែក​ផលិត​ប្រចាំ​ក្រុមហ៊ុន​ Facebook សង្ឃឹម​ថា ​មុខងារ​ថ្មី​នេះ​​នឹង​ជួយ​​ដល់​​គូ​ស្នេហ៍​ដែល​បាន​​បែក​គ្នា​ឲ្យ​ឆ្លង​ផុត​ពី​ដំណាក់​កាល​លំបាក​ក្នុង​ឆាក​ជីវិត​បាន។

គួរ​បញ្ជាក់​ដែរ​ថា ​មុខងារ​នេះ​បាន​ដាក់​ឲ្យ​ប្រើ​ប្រាស់​ចាប់​ពី​ពេល​នេះ​ត​ទៅ​សម្រាប់​អ្នក​ដែល​ប្រើ​ប្រាស់​តាម​រយៈ​ទូរសព្ទ​​នៅ​ក្នុង​សហរដ្ឋអាមេរិក​ ចំណែក​ឯ​តំបន់​ដទៃ​ទៀត​នឹង​បញ្ចេញ​ឲ្យ​ប្រើ​ប្រាស់​នៅ​ពេល​បន្ត​បន្ទាប់៕

ចុច​អាន៖ កម្មវិធី​ដែល​ ISIS ប្រើ​ទាក់​ទង​គ្នា​មាន​សុវត្ថិភាព​ជាង​កម្មវិធី​របស់​ Facebook ទៅ​ទៀត

ប្រែ​សម្រួល៖ ហៃ​ សុខ​ហេង ប្រភព៖ BBC​​​​​​​​​​​​​​​​​​​