១,៤លាននាក់ដាក់ពាក្យប្រលងមន្រ្ដីរដ្ឋការនៅចិន ដើម្បីប្រជែងយក២៧ពាន់កន្លែង
- 2015-12-01 19:02:32
- ចំនួនមតិ 0 | ចំនួនចែករំលែក 0
១,៤លាននាក់ដាក់ពាក្យប្រលងមន្រ្ដីរដ្ឋការនៅចិន ដើម្បីប្រជែងយក២៧ពាន់កន្លែង
ចន្លោះមិនឃើញ
ការប្រលងជ្រើសរើសមន្ត្រីរដ្ឋការចិន មានកៅអីតែ ២៧៨១៧កន្លែងប៉ុណ្ណោះ ប៉ុន្តែបេក្ខជនសម្រុកដាក់ពាក្យវិញប្រមាណ ១,៤លាននាក់ឯណោះសម្រាប់ឆ្នាំនេះ។ ការប្រលងបានប្រព្រឹត្តទៅនៅថ្ងៃអាទិត្យកន្លងទៅ ត្រូវគេនិយាយថាមានភាពតឹងតែងបំផុត និងប្រកួតប្រជែងបំផុតនៅទូទាំងប្រទេស។
ការប្រលងនេះទៀតសោត បេក្ខជននឹងត្រូវប្រឈមចំពោះមុខច្បាប់រហូតជាប់ពន្ធនាគារពី ៣ឆ្នាំដល់ ៧ឆ្នាំ ប្រសិនបើរកឃើញថាលួចបន្លំពេលប្រលង និងចាត់ចូលជាបទល្មើសឧក្រិដ្ឋ។ ក្នុងឆ្នាំនេះជាមធ្យម បេក្ខជនចំនួន ៥០នាក់ជ្រើសយកតែម្នាក់ប៉ុណ្ណោះ។
មជ្ឈដ្ឋានទូទៅបញ្ចេញចម្ងល់ថា ហេតុអ្វីមុខតំណែងក្នុងការងាររដ្ឋឆ្នាំនេះទំនេរដ៏ច្រើនបែបនេះ ឬពួកគេលាលែងទៅរកឱកាសការងារឯកជនវិញ? ទោះជាយ៉ាងណាក្ដីអ្នកនាំពាក្យក្រសួងសន្តិសុខសង្គម និងធនធានមនុស្សចិន បាននិយាយប្រាប់ថា បុគ្គលិករដ្ឋជាច្រើននាក់បានចូលនិវត្តន៍ឆ្នាំនេះ ដែលធ្វើឲ្យកៅអីទាំងនោះទំនេរត្រូវបំពេញ។
និយាយទៅកាន់អ្នកសារព័ត៌មាន បេក្ខនារីម្នាក់ប្រាប់ថា នាងបានធ្វើការឲ្យក្រុមហ៊ុនឯកជនជាយូរឆ្នាំ និងមានប្រាក់ខែខ្ពស់ ប៉ុន្តែការបម្រើការងារក្នុងជួររដ្ឋាភិបាលជាសុបិននាងយូរណាស់មកហើយ។ បន្ទាប់ពីរៀននៅសាកលវិទ្យាល័យល្បីឈ្មោះនៅចិនមួយ នាងចង់មានពេលធ្វើកិច្ចការជូនរដ្ឋខ្លះ។
ការប្រលងជ្រើសរើសមន្ត្រីរដ្ឋការថ្នាក់ជាតិលើកដំបូងរបស់ចិនបានចាប់ផ្ដើមតាំងពីឆ្នាំ១៩៩៤ ដែលពេលនោះមានបេក្ខជនដាក់ពាក្យតែ ៤៤០០នាក់ប៉ុណ្ណោះ ដើម្បីដណ្ដើមកៅអីចំនួន ៤៩០កន្លែង៕
ចុចអាន៖ ពិការដៃសងខាង តែអាចប្រលងបាក់ឌុបបានពិន្ទុខ្ពស់ដោយប្រើជើងសរសេរ
ប្រែសម្រួល៖ ឡេង ភារុណ ប្រភព៖ dailymail