Messi ឆ្លើយតបនឹងអ្នករិះគន់ថាខ្លួនលេងមិនល្អឲ្យជម្រើសជាតិ

2015-12-14 18:36:17
ចំនួនមតិ 0 | ចំនួនចែករំលែក 0

ចន្លោះមិនឃើញ

Lionel Messi តារាឆ្នើមក្រុម FC Barcelona បាននិយាយឆ្លើយតបដល់អ្នករិះគន់ថាខ្លួនលេងមិនបានល្អ និងមិនបានឈ្នះពានធំៗអ្វីសោះជាមួយក្រុមជម្រើសជាតិអាហ្សង់ទីន។

អាហ្សង់ទីន ដែលមាន Messi ជាប្រធានក្រុម បានចាញ់នៅវគ្គផ្ដាច់ព្រ័ត្រពានរង្វាន់ធំៗ២ដង រយៈពេល២ឆ្នាំ ដោយចាញ់អាល្លឺម៉ង់ ១-០ កាល World Cup វគ្គផ្ដាច់ព្រ័ត្រឆ្នាំ២០១៤ និងចាញ់ឈីលី ដោយបាល់កាត់ក្តីប៉េណាល់ទី វគ្គផ្ដាច់ព្រ័ត្រ 2015 Copa America ទៀត ដែលធ្វើឲ្យមានមតិរិះគន់ខ្លះថា Messi លេងឲ្យជម្រើសជាតិ មិនល្អដូចលេងឲ្យក្រុម Barcelona។

កីឡាករវ័យ២៨ឆ្នាំរូបនេះ បានប្រាប់ដល់ TyC Sports ថា៖ "ខ្ញុំពិតជាទទួលការរំខាន ពេលដែលពួកគេប្រាប់ឲ្យប្រឹងប្រែងទៀត អ្នកដូចជាមិនមែនអារម្មណ៍នៅនឹងអាវហ្នឹង។ យើងសំណាងហើយ ដែលបានឡើងដល់វគ្គផ្ដាច់ព្រ័ត្រ World Cup និង Copa America។ យើងមិនបានឈ្នះមែន ប៉ុន្តែយើងបានដល់វគ្គផ្ដាច់ព្រ័ត្រ ហើយយើងក៏មិនបានធ្លាក់នៅវគ្គ១៦ក្រុមដែរ"។

អ្នកគាំទ្រអាហ្សង់ទីនខ្លះ លើកឡើងថា Messi មិនបានលេងឲ្យជម្រើសជាតិងប់ងុលអស់ពីចិត្ត ដូចដែលរូបគេលេងឲ្យក្លិបអាជីព Barca ទេ ហើយថែមទាំងមិនច្រៀងភ្លេងជាតិអាហ្សង់ទីនទៀត មុនពេលប្រកួត។

“បាល់ទាត់ មិនមែនត្រឹមតែការខំប្រឹងប្រែងទេ។ យើងធ្លាក់ World Cup ទល់នឹងអាល្លឺម៉ង់ ដែលជាក្រុមមានកីឡាករអស្ចារ្យៗជាច្រើន តែយើងក៏ជិតនឹងមានឱកាសឈ្នះវាដែរ។ ចាញ់ឈីលី ក៏ដូចគ្នាគឺយើងធ្លាក់ដោយប៉េណាល់ទី។ ខ្ញុំពិតទទួលការរំខាន ពេលដែលមនុស្សវាយប្រហារមកខ្ញុំ ដោយគ្មានការគិត។ ខ្ញុំមិនបានច្រៀងភ្លេងជាតិតាមមែន។ ខ្ញុំមិនច្រៀង ប៉ុន្តែខ្ញុំមានអារម្មណ៍ជាមួយវាស្រេចហើយ"។ ម្ចាស់ពានរង្វាន់ Ballon d'Or ៤សម័យកាល បញ្ជាក់បន្ថែម៕

-ចុចអាន៖ Messi បង្ហោះរូបជាមួយគ្រួសារយ៉ាងកម្រ នៅមុខដើម Christmas

ប្រែសម្រួល៖ វិន ជីវ័ន្ត ប្រភព៖ abc