Petr Cech ជាក្ដីសង្ឃឹម Arsenal អាចយកឈ្នះ Barcelona?

2015-12-15 17:09:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកាំភ្លើងធំ Arsenal នឹងត្រូវប៉ះក្រុមម្ចាស់ជើងឯក FC Barcelona ក្នុងការប្រកួត UEFA Champions League វគ្គ១៦ក្រុមចុងក្រោយ បន្ទាប់ពីលទ្ធផលចាប់ឆ្នោត បានប្រកាសឲ្យដឹងកាលពីយប់មិញ។

Arsenal បានធ្លាក់នៅវគ្គ១៦ក្រុមនេះ ៥រដូវកាលជាប់ៗគ្នា ប៉ុន្តែសម្រាប់រដូវកាលនេះវិញ ពួកគេគ្រោងនឹងបញ្ចប់កំណត់ត្រាអាក្រក់នេះ ដោយសង្ឃឹមធំលើអ្នកចាំទីដៃស្អិត Petr Cech ដើម្បីអាចរាំងស្កាត់គ្រាប់បាល់ស៊ុតរបស់តារាសំខាន់ៗក្រុម Barca ដូចជា Lionel Messi, Neymar និង Luis Suarez ជាដើម។

កាលពីចុងសប្ដាហ៍កន្លងទៅ Cech បានតាមទាន់កំណត់ត្រា Clean sheet (ទប់មិនឲ្យគូប្រកួតស៊ុតបញ្ចូលទី) ច្រើនជាងគេរបស់ David James នៅ Premier League បន្ទាប់ពីជួយ Arsenal យកឈ្នះ Aston Villa ដោយលទ្ធផល ២-០។ ដូច្នេះចាំមើលថា តើអតីតអ្នកចាំទីក្រុម Chelsea រូបនេះ អាចបិទ Barca មិនឲ្យស៊ុតចូលទៀត ឬយ៉ាងណា?

ស្ថិតិ និងការពិតមួយចំនួនរបស់ Arsenal & Barcelona៖

- Barcelona ធ្លាប់ទម្លាក់ Arsenal វគ្គ៨ក្រុម រដូវកាល២០០៩/១០, ទម្លាក់វគ្គ១៦ក្រុម រដូវកាល២០១០/១១ និងធ្លាប់ឈ្នះវគ្គផ្ដាច់ព្រ័ត្រ UEFA Champions League ឆ្នាំ២០០៦ នៅកីឡាដ្ឋានជាតិបារាំង Stade de France។

- រដូវកាល២០០៩/១០ Arsenal តាមស្មើ ២-២ ទល់នឹង Barca នៅជើងទី១ តែចាញ់ Barca ៤-១ នៅជើងទី២ ខណៈដែល Messi ស៊ុត៤គ្រាប់ម្នាក់ឯង។

Messi ធ្លាប់លេងប៉ះ Arsenal ៤ប្រកួត ស៊ុតបាន៦គ្រាប់ និងធ្វើបានហែតទ្រីក១ដង។
យ៉ាងណា Messi មិនដែលស៊ុតចូលទី Petr Cech ទេ ក្នុងជំនួបគ្នា៧ប្រកួតចុងក្រោយ តាំងពីអ្នកចាំទីរូបនេះនៅក្រុម Chelsea។

Messi រកគ្រាប់អត់បាន កាលប៉ះ Petr Cech នៅឆ្នាំ២០១២

សម្រាប់ការប្រកួតគូនេះ ជើងទី១នឹងត្រូវធ្វើឡើងនៅថ្ងៃទី២៣ ខែកុម្ភៈ នាកីឡដ្ឋាន Emirates ទឹកដីអង់គ្លេស រីឯជើងទី២ នៅថ្ងៃទី១៦ ខែមិនា នាកីឡដ្ឋាន Camp Nou ប្រទេសអេស្ប៉ាញ៕

ចុះប្រិយមិត្តជឿថា Arsenal អាចបិទ Barcelona ជាប់ទេ?

-ចុចអាន៖ Olivier Giroud ស៊ុត hat-trick ជួយ Arsenal ឡើងវគ្គ១៦ក្រុមចុងក្រោយ

ប្រែសម្រួល៖ វិន ជីវ័ន្ត ប្រភព៖ UEFA