តួឯកប្រុស "Titanic” Leonardo រៀបរាប់ពីគ្រោះថ្នាក់៣ដងវិះនឹងអស់ជីវិត

2015-12-15 18:05:38
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាហូលីវូដ Leonardo DiCaprioដែលជាតួឯកប្រុសក្នុងរឿង "Titanic”បានចូលរួមថតក្របមុខឲ្យទស្សនាវដ្ដី Wired សម្រាប់លេខថ្មីខែ មករានិងបានរៀបរាប់ពីការរួចជីវិត៣លើកដោយសារគ្រោះថ្នាក់ផ្សេងៗគ្នា។

តារាសម្ដែងវ័យ៤១ឆ្នាំបានប្រាប់ទៅទស្សនាវដ្ដី Wired ថា លោកវិះនឹងស្លាប់៣លើទៅហើយ។ គ្រោះថ្នាក់លើទី១ដោយសារការវាយប្រហាររបស់ត្រីឆ្លាម, លើកទី២ផ្ទុះម៉ាស៊ីនយន្តហោះនិងលើកទី៣មានបញ្ហាពេលលោតឆត្រយោង។

បុរសដែលជាតារាសម្ដែងនិងផលិតករភាពយន្តរូបនេះបាននិយាយតាមដំណើររឿងថា៖ "ពេលដែលខ្ញុំទៅហែលទឹកសមុទ្រនៅប្រទេសអាហ្វ្រិកខាងត្បូងដោយហែលនៅក្នុងទ្រុង មានត្រីឆ្លាមមួយក្បាលត្រូវគេបោះចូលក្នុងទ្រុងរបស់ខ្ញុំ។ ខ្លួនវាពាក់កណ្ដាលបានលយចូលក្នុងទ្រុង ហើយវាព្យាយាមត្របាក់ខ្ញុំ។ ខ្ញុំក៏បានឱនចុះទៅបាតទ្រុង ដើម្បីគេចពីការវាយប្រហារ។ ត្រីឆ្លាមបានត្របាក់មកខ្ញុំ៥-៦ដងវិះនឹងដាច់ក្បាលទៅហើយ ខ្វះតែប៉ុន្មានចង្អាមទៀតប៉ុណ្ណោះ។ ប៉ុន្តែសំណាងមានអ្នកមកជួយទាន់។ គេបាននិយាយថា នៅទីនោះជាង៣០ឆ្នាំមកហើយមិនដែលមានរឿងនេះកើតឡើងទេ។

ក្រោយគ្រោះថ្នាក់ត្រីឆ្លាមវាយប្រហារកន្លងផុតទៅ Leonardoក៏បានជួបរឿងអាក្រក់មួយទៀតគឺឆេះម៉ាស៊ីនភ្លើងយន្តហោះ។ តារាកើតក្នុងរដ្ឋ California បានប្រាប់ហេតុការណ៍ថា៖ "ខ្ញុំបានធ្វើដំណើរតាមជើងយន្តហោះ Delta Airlines សំដៅទៅប្រទេសរុស្សី។ ខ្ញុំបានឃើញម៉ាស៊ីនយន្តហោះផ្ទុះដោយផ្ទាល់ភ្នែក។ ខ្ញុំបានអង្គុយងាកទៅមើលស្លាបយន្តហោះ ភ្លាមនោះវាក៏ផ្ទុះចេញជាអណ្ដាតភ្លើង។ ពួកគេក៏បានពន្លត់ម៉ាស៊ីនហើយអ្នកធ្វើដំណើរអង្គុយយ៉ាងស្ងៀមស្ងាត់។ ប៉ុន្មាននាទីក្រោយមក ពួកគេបានសម្រួលម៉ាស៊ីនឡើងវិញហើយក៏ចុះចតដើម្បីរកជំនួយ។

លើកទី៣ Leonardo វិះនឹងស្លាប់ម្ដងទៀតដោយគ្រោះថ្នាក់ពេលលោតឆត្រយោង។ តារាក្នុងរឿង "The Wolf of Wall Street” បានលោតចុះមកក្រោម ជំពាក់ជំពិនឆត្រយោងជាមួយមនុស្សម្នាក់ទៀតកណ្ដាលអាកាស។ ប៉ុន្តែសំណាងល្អ ពួកគេបានគ្រប់គ្រងស្ថានការណ៍ល្អ ដោយធ្លាក់មកមានស្នាមជាំលើខ្លួនតិចតួចនិងគ្មានរបួសអ្វីធ្ងន់ធ្ងរនោះទេ៕

ចុចអាន៖តួឯកប្រុស “Titanic” ឈ្នះក្ដីរឿងគេចោទថាមានកូនជាមួយ Rihanna ប្រែសម្រួល៖ ហេង សុធារិទ្ធិ ប្រភព៖ dailymail